ନୂଆଦିଲ୍ଲୀ,୨୩।୧୧: ଲିଭ୍-ଇନ୍ ପାର୍ଟନର ଶ୍ରଦ୍ଧା ଓ୍ବାକରଙ୍କୁ ହତ୍ୟା ଅଭିଯୋଗରେ ଗିରଫ ହୋଇ ପୋଲିସ ହାଜତରେ ଥିବା ଆଫ୍ତାବ ପୁନାଓ୍ବାଲାଙ୍କ ମଙ୍ଗଳବାର ସନ୍ଧ୍ୟାରେ ପଲିଗ୍ରାଫ୍ ଟେଷ୍ଟ କରାଯାଇଛି। ଇତିମଧ୍ୟରେ ଦିଲ୍ଲୀ ପୋଲିସ ପୂର୍ବରୁ ଦୁହେଁ ରହୁଥିବା ମେହରୁଲିସ୍ଥିତ ଭଡ଼ାଘର ବାଥ୍ରୁମ୍ରେ ରକ୍ତଦାଗ ସମେତ ଆଉ କେତେକ ପ୍ରମାଣ ପାଇଛି।
ହତ୍ୟା ଅଭିଯୁକ୍ତ ଆଫ୍ତାବଙ୍କୁ ଦିଲ୍ଲୀ ପୋଲିସ ମଙ୍ଗଳବାର ସାକେତ କୋର୍ଟରେ ହାଜର କରାଇ ପଲିଗ୍ରାଫ୍ ଟେଷ୍ଟ ପାଇଁ ଅନୁମତି ମାଗିଥିଲା। ବିଚାରପତି ବିଜୟଶ୍ରୀ ରାଠୋର ଆଫ୍ତାବଙ୍କ ପଲିଗ୍ରାଫ୍ ଟେଷ୍ଟ ପାଇଁ ଅନୁମତି ଦେଇଥିଲେ। ତଦନ୍ତକାରୀ ଅଧିକାରୀ ଦର୍ଶାଇଥିବା କାରଣ ମୁତାବକ ଅଧିକ ତଦନ୍ତ ପାଇଁ ଆଫ୍ତାବଙ୍କୁ ନଭେମ୍ବର ୨୬ ପର୍ଯ୍ୟନ୍ତ ରିମାଣ୍ଡରେ ରଖିବାକୁ ମେଟ୍ରୋପଲିଟାନ୍ ମାଜିଷ୍ଟ୍ରେଟ୍ ଅବିରଳ ଶୁକ୍ଳା ପୋଲିସକୁ ଅନୁମତି ପ୍ରଦାନ କରିଥିଲେ। ସେହିପରି ଆଫ୍ତାବଙ୍କୁ ଆଇନଜୀବୀ ଅବିନାଶ କୁମାର ଦେଇଥିବା ଆଇନଗତ ସହାୟତାକୁ ନେଇ କୋର୍ଟ ସନ୍ତୋଷ ବ୍ୟକ୍ତ କରିଥିଲେ। କୋର୍ଟରେ ଆଫ୍ତାବ ଦୋଷ ସ୍ବୀକାର କରିଥିବାବେଳେ ଓକିଲ ଅବିନାଶ କୁମାର କହିଛନ୍ତି, ତାଙ୍କ ମହକିଲ ତଦନ୍ତରେ ପୋଲିସକୁ ସହଯୋଗ କରୁଛନ୍ତି। ଶ୍ରଦ୍ଧାଙ୍କୁ ହତ୍ୟା କରିଥିବା ନେଇ କୋର୍ଟରେ ଆଫ୍ତାବ ଦୋଷ ସ୍ବୀକାର କରିନାହାନ୍ତି। ୨୮ ବର୍ଷୀୟ ଆଫ୍ତାବ ତାଙ୍କ ଲିଭ୍-ଇନ୍ ପାର୍ଟନରଙ୍କୁ ଗତ ମେ’ ୧୮ରେ ମେହରୁଲିର ଏକ ଆପାର୍ଟମେଣ୍ଟରେ ତଣ୍ଟିଚିପି ହତ୍ୟା କରିବା ପରେ ତାଙ୍କ ଶରୀରକୁ ୩୫ ଖଣ୍ଡ କରି ଜଙ୍ଗଲରେ ଫିଙ୍ଗିଥିବା ନେଇ ଦୋଷ ମାନିଥିବା ଦିଲ୍ଲୀ ପୋଲିସ କହିଥିଲା। ପଲିଗ୍ରାଫ୍ ଟେଷ୍ଟ ଦିନେରୁ ଦୁଇଦିନ ଚାଲିବା ପରେ ପୋଲିସ ତାଙ୍କର ନାର୍କେ ଟେଷ୍ଟ କରି ସତ ବାହାର କରିବ। ତେବେ ଏହି ପରୀକ୍ଷାରୁ ମିଳୁଥିବା ପ୍ରମାଣ ଆଧାରରେ କେବଳ ପୋଲିସ ନିଜ ତଦନ୍ତକୁ ଆଗକୁ ବଢ଼ାଇପାରିବ। ଏହା କୋର୍ଟରେ ଗ୍ରହଣୀୟ ନୁହେଁ ବୋଲି ଫରେନ୍ସିକ୍ ସାଇନ୍ସ ଲାବରେଟୋରିର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
