କାବୁଲ, ୨୩।୧୨:ଆଫଗାନିସ୍ତାନରେ ତାଲିବାନ ଶାସକ ଲୋକଙ୍କ ପାଇଁ ବୋଝ ସାଜିଛନ୍ତି। ବିଶେଷକରି ମହିଳା ଓ ଝିଅମାନଙ୍କ କ୍ଷେତ୍ରରେ ଏହି କଠୋରପନ୍ଥୀ ସରକାର ଅଧିକ କଡ଼ା ନିୟମ ଲାଗୁ କରି ସେମାନଙ୍କୁ ନିର୍ଯାତିତ କରିବାରେ ଲାଗିଛନ୍ତି। ଗତ ମଙ୍ଗଳବାର ଆଫଗାନ୍ ଉଚ୍ଚଶିକ୍ଷା ମନ୍ତ୍ରଣାଳୟ ଝିଅମାନଙ୍କ ଉଚ୍ଚଶିକ୍ଷା ଉପରେ ନିଷେଧାଦେଶ ଜାରି କରିଥିଲା। ଏହି ନିଷ୍ପତ୍ତି ଅନେକ ଛାତ୍ରୀଙ୍କ ସ୍ବପ୍ନକୁ ଭାଙ୍ଗି ଦେଇଛି। ତାଲିବାନ ସରକାରଙ୍କ ଘୋଷଣା ପରେ ଛାତ୍ରୀମାନେ କାନ୍ଦୁଥିବାବେଳର ଭିଡିଓ ସମାଜିକ ଗଣମାଧ୍ୟମରେ ବହୁଳ ପ୍ରସାରିତ ହୋଇଛି।
ଗତବର୍ଷ ଅଗଷ୍ଟ ୧୫ରେ ଦୁର୍ଦ୍ଧର୍ଷ ଆତଙ୍କବାଦୀ ସଙ୍ଗଠନ କାବୁଲ ଦଖଲ କରିବା ପରଠୁ ଗୋଟିଏ ପରେ ଗୋଟିଏ କଟକଣା ଜାରି କରିବାରେ ଲାଗିଛି। ଏହି କ୍ରମରେ ତାଲିବାନ ଶାସକ ଝିଅଙ୍କ ଉଚ୍ଚଶିକ୍ଷା ନିଷିଦ୍ଧ କରିଛି। ଉକ୍ତ ନିଷ୍ପତ୍ତି ବିରୋଧରେ ଗୁରୁବାର ୟୁନିଭର୍ସିଟି ଛାତ୍ରୀମାନେ ରାସ୍ତାକୁ ଓହ୍ଲାଇଛନ୍ତି। ‘ଅଧିକାର ସମସ୍ତଙ୍କ ପାଇଁ ନଚେତ୍ କାହାପାଇଁ ନୁହେଁ’ ସ୍ଲୋଗାନ ଦେଇ ସେମାନେ ପ୍ରତିବାଦ କରିଛନ୍ତି। ଏହାକୁ ଦୃଷ୍ଟିରେ ରଖି ୟୁନିଭର୍ସିଟିଗୁଡ଼ିକରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ପରବର୍ତ୍ତୀ ସମୟରେ ବିକ୍ଷୋଭରତ ଛାତ୍ରୀଙ୍କୁ ମହିଳା ପୋଲିସ ଗିରଫ କରିନେଇଥିଲା। ବୁଧବାର ଶତାଧିକ ହିଜାବପିନ୍ଧା ଛାତ୍ରୀ ଘଣ୍ଟା ଘଣ୍ଟା ଧରି ୟୁନିଭର୍ସିଟି ଫାଟକ ଆଗରେ ଛିଡ଼ାହୋଇ ରହିଥିଲେ। ସୁରକ୍ଷା ଗାର୍ଡ ସେମାନଙ୍କୁ ୟୁନିଭର୍ସିଟି ପରିସର ମଧ୍ୟକୁ ପ୍ରବେଶ ଅନୁମତି ଦେଇ ନ ଥିଲେ। ପରେ ଛାତ୍ରୀମାନେ ଫେସ୍ବୁକ୍ ଓ ଟୁଇଟର ଜରିଆରେ ଏହା ବିରୋଧରେ ପ୍ରତିବାଦ ଆରମ୍ଭ କରିଥିଲେ। ଏକ ଶ୍ରେଣୀଗୃହରେ ଛାତ୍ରୀମାନେ ବସି କାନ୍ଦୁଥିବାର ୨୩ ସେକେଣ୍ଡର ଭିଡିଓରେ ଦେଖିବାକୁ ମିଳିଛି। ଏ ନେଇ ହେରାତ ୟୁନିଭର୍ସିଟିର ଜର୍ନାଲିଜମ୍ ଛାତ୍ରୀ ଓ୍ବାହିଦା ଓ୍ବାହିଦ ଦୁରାନି କହିଛନ୍ତି, ‘ଆଫଗାନ୍ ଝିଅମାନେ ମୃତଦେହ ପାଲଟି ଯାଇଛନ୍ତି। ସେମାନଙ୍କ ଆଖିରୁ ରକ୍ତର ଲୁହ ଝରୁଛି। ମହିଳାଙ୍କ ବିରୋଧରେ ତାଲିବାନ ସରକାର ନିଜର ସବୁ ବଳ ପ୍ରୟୋଗ କରିଦେଇଛି। ଆମେ ସେଦିନକୁ ଅପେକ୍ଷା କରିଛୁ, ଯେଉଁଦିନ ସରକାର ଘୋଷଣା କରିବେ ଯେ, ମହିଳା ଶ୍ୱାସକ୍ରିୟା କରିପାରିବେ ନାହିଁ’।
ଆଫଗାନ୍ ଝିଅଙ୍କୁ ଉଚ୍ଚଶିକ୍ଷାରୁ ବଞ୍ଚିତ କରିବା ନେଇ ଗୁରୁବାର ଭାରତ ଚିନ୍ତା ପ୍ରକଟ କରିଛି। ତାଲିବାନ ସରକାର ପ୍ରତ୍ୟେକଙ୍କ ପାଇଁ ସମାନ ନିୟମ ଲାଗୁ କରିବା ଆବଶ୍ୟକ ବୋଲି ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଅରିନ୍ଦମ ବାଗ୍ଚୀ କହିଛନ୍ତି। ପୂର୍ବରୁ ଆମେରିକା, ଅଷ୍ଟ୍ରେଲିଆ, କାନାଡା, ଫ୍ରାନ୍ସ, ଜର୍ମାନ, ଜାପାନ ଓ ବ୍ରିଟେନ ତାଲିବାନୀ ସରକାରଙ୍କ ଏହି ନିଷ୍ପତ୍ତିକୁ ବିରୋଧ କରିଛନ୍ତି।
