ନୂଆପଡ଼ା,୨୯ା୯ (ମକାରୁ ବେମାଲ): ନୂଆପଡ଼ା ଉପନିର୍ବାଚନ ପାଇଁ ଜିଲା ପ୍ରଶାସନ ତପତ୍ରତା ପ୍ରକାଶ କରିଛି। ରବିବାର ଉତ୍ତରାଞ୍ଚଳ ରାଜସ୍ବ କମିଶନର ତଥା ଇଲେକ୍ଟୋରାଲ ରୋଲ ଅବଜର୍ଭର ସଚିନ ରାମଚନ୍ଦ୍ର ଯାଦବ ନୂଆପଡ଼ା ଗସ୍ତ କରି ଜିଲାପାଳ, ଏସ୍ପି, ପ୍ରଶାସନିକ ଅଧିକାରୀ, ବିଭିନ୍ନ ରାଜନୈତିକ ଦଳର ପ୍ରତିନିଧିଙ୍କ ସହ ବିଶେଷ କରି ଏସ୍ଏସ୍ଆର୍ ଉପରେ ଆଲୋଚନା କରିଛନ୍ତି। ଜିଲା ସମ୍ମିଳନୀ କକ୍ଷରେ ଆୟୋଜିତ ବୈଠକରେ ଜିଲାପାଳ ମଧୁସୂଦନ ଦାଶ ସମସ୍ତଙ୍କୁ ସ୍ବାଗତ କରି ବୈଠକର ଉଦ୍ଦେଶ୍ୟ ଜ୍ଞାପନ କରିଥିଲେ। ନୂଆପଡାରେ ଚିଠା ଭୋଟର ତାଲିକା ପ୍ରକାଶିତ ହୋଇସାରିଛି। ନୂଆପଡ଼ା ନିର୍ବାଚନ ମଣ୍ଡଳୀରେ ମୋଟ ୩୫୮ ଭୋଟ ଗ୍ରହଣ କେନ୍ଦ୍ର ରହିଛି। ସମସ୍ତ କେନ୍ଦ୍ର ପାଇଁ ୩୫୮ ଜଣ ପ୍ରାଥମିକ ବିଦ୍ୟାଳୟ ଶିକ୍ଷକ ବିଏଲ୍ଓ ଭାବରେ ନିଯୁକ୍ତ ହୋଇଛନ୍ତି। ଏଠାରେ ମୋଟ ୬ ହଜାର ୭୧୨ଟି ଆବେଦନ ଭୋଟର ତାଲିକା ସଂଶୋଧନ ପାଇଁ ମିଳିଛି। ନିର୍ବାଚନମଣ୍ଡଳୀର ମୋଟ ଭୋଟର ସଂଖ୍ୟା ୨ ଲକ୍ଷ ୪୮ ହଜାର ୩୮୨ ଥିବାବେଳେ ପୁରୁଷ ୧ ଲକ୍ଷ ୨୨ ହଜାର ୧୪୮, ମହିଳା ୧ ଲକ୍ଷ ୨୬ ହଜାର ୨୧୩ ଓ ତୃତୀୟ ଲିଙ୍ଗ ୨୧ ଜଣ ରହିଛନ୍ତି। କମିଶନର ଯାଦବ ସମସ୍ତ ରାଜନୈତିକ ଦଳ ଉପନିର୍ବାଚନକୁ ସୁଚାରୁରୂପେ ସମ୍ପାଦନ କରିବା ପାଇଁ ପ୍ରଶାସନକୁ ସହଯୋଗ କରିବାକୁ କହିଥିଲେ। ସେ ଆହୁରି କହିଥିଲେ, ସବୁ ଯୋଗ୍ୟ ଭୋଟର ତାଲିକାରେ ରହିବା ଆବଶ୍ୟକ। ୮୫ ବର୍ଷରୁ ଊର୍ଦ୍ଧ୍ୱ ସମସ୍ତ ଭୋଟରଙ୍କ ଯାଞ୍ଚ ଠିକ ଭାବରେ ହେବ। ସମସ୍ତ ଦଳ ବୁଥ୍ ଲେବୁଲ ଏଜେଣ୍ଟଙ୍କ ତାଲିକା ଶୀଘ୍ର ଦାଖଲ କରିବେ। ଯେଉଁ ଝିଅମାନେ ବିବାହ ହୋଇସାରିଛନ୍ତି ସେମାନଙ୍କ ଭୋଟର ତାଲିକା କେବଳ ଗୋଟିଏ ସ୍ଥାନରେ ରହିବ। ସମ୍ଭାବ୍ୟ ବିଧାୟକ ପ୍ରାର୍ଥୀଙ୍କ ନାମ ଭୋଟର ତାଲିକାରେ ଅଛି କି ନାହିଁ ତାହା ଯାଞ୍ଚ କରିବାକୁ କହିଥିଲେ। ବୈଠକରେ ଜିଲାପାଳଙ୍କ ସମେତ ଏସ୍ପି ଅମୃତ ପାଲ ସିଂ, ଅତିରିକ୍ତ ଜିଲାପାଳ ସୁବାସ ଚନ୍ଦ୍ର ରଇତ, ଜିଲା ମୁଖ୍ୟ ଉନ୍ନୟନ ଅଧିକାରୀ ଲମ୍ବୋଦର ଧରୁଆ, ଉପଜିଲାପାଳ ତଥା ଇଆର୍ଓ ସୁର୍ମି ସୋରେନ, ଏଇଆର୍ଓ ତଥା କୋମନା ବିଡିଓ ସର୍ବେଶ୍ୱର ଜାଲ, ନୂଆପଡା ବିଡିଓ ରୋହିତ ଭୋଇ, ନୂଆପଡା ତହସିଲଦାର ପ୍ରଣବ ରଞ୍ଜନ ସାହୁ ପ୍ରମୁଖ ଯୋଗ ଦେଇଥିଲେ। ରାଜନୈତିକ ଦଳରୁ ଭାଜପା ଜିଲା ସଭାପତି କମଲେଶ ଦୀକ୍ଷିତ, ଆଇଏନ୍ସିରୁ ଦେବଦତ୍ତ ଦୀକ୍ଷିତ, ବିଜେଡିରୁ ରମାକାନ୍ତ ସିଂ କ୍ଷେତ୍ରିୟ ଓ ଆପ୍ରୁ ଗନନ ମାଝି ପ୍ରମୁଖ ଉପସ୍ଥିତ ଥିଲେ।
