ଭବାନୀପାଟଣା/କୋକସରା/ଗୋଲାମୁଣ୍ଡା/ କର୍ଲାମୁଣ୍ଡା,୨୮।୪(ଉତ୍ତମ କୁମାର ଦାଶ/ ଦୁଷ୍ମନ୍ତ ପଟ୍ଟଯୋଶୀ/ବଟକୃଷ୍ଣ ପଣ୍ଡା/ପ୍ରଦୀପ ସାହୁ): ୫-ଟି ଅଧ୍ୟକ୍ଷ ତଥା ବିଜେଡିର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ ଶନିବାର କଳାହାଣ୍ଡି ଜିଲାର ଧର୍ମଗଡ଼, ଜୁନାଗଡ଼, ଲାଞ୍ଜିଗଡ଼ ଓ ନର୍ଲା ନିର୍ବାଚନ ମଣ୍ଡଳୀରେ ମାରାଥନ ପ୍ରଚାର କରିଛନ୍ତି। ନୂଆପଡ଼ାରୁ ହେଲିକପ୍ଟର ଯୋଗେ ଅପରାହ୍ନ ୧ଟାରେ ସେ କଳାହାଣ୍ଡି ଜିଲା ଧର୍ମଗଡ଼ ନିର୍ବାଚନ ମଣ୍ଡଳୀ ଅନ୍ତର୍ଗତ ଗୋତୋମୁଣ୍ଡା ହାଇସ୍କୁଲ ପଡିଆରେ ପହଞ୍ଚତ୍ ସେଠାରେ ଅନୁଷ୍ଠିତ ସାଧାରଣ ସଭାରେ ଯୋଗଦେଇଥିଲେ। ଜନସଭାକୁ ସମ୍ବୋଧିତ କରି ସେ କହିଥିଲେ, ଏବେ ନିର୍ବାଚନ ସମୟ। କେତେକ ନେତା ଡବଲ ଇଞ୍ଜିନ କଥା କହିବେ। ପଡ଼ୋଶୀ ଛତିଗଡ଼ରେ ପ୍ରଥମେ ଡବଲ ଇଞ୍ଜିନ ଥିଲା, ପରେ ସିଙ୍ଗଲ ହୋଇଗଲା। ଏବେ ଆଉ ଗୋଟେ ଇଞ୍ଜିନ ସରକାରରେ ଅଛି। ଓଡ଼ିଶାରେ କେବଳ ନବୀନ ଇଞ୍ଜିନ ହିଁ କାମ କରିବ। ଏମିତି ପ୍ରାର୍ଥୀଙ୍କୁ ଜିତାନ୍ତୁ ଯିଏ ସାଥିରେ ରହିବ ଆଉ ଲୋକଙ୍କ କାମ କରିବ ବୋଲି କହିଥିଲେ।
ଗତ ୭ମାସ ମଧ୍ୟରେ ଲୋକଙ୍କ ଆବେଦନ ଆଧାରରେ ମୁଖ୍ୟମନ୍ତ୍ରୀ ଧର୍ମଗଡ ବିଧାନସଭା କ୍ଷେତ୍ର ପାଇଁ ୧୧୦ କୋଟି ଟଙ୍କାର ବିଭିନ୍ନ ପ୍ରକଳ୍ପକୁ ମଞ୍ଜୁରୀ ଦେଇଛନ୍ତି। ଭଣ୍ଡାରଘରଣୀ ମନ୍ଦିରର ଉନ୍ନତୀକରଣ ପାଇଁ ୧କୋଟି ୯ଲକ୍ଷ ମିଳିଥିବା ବେଳେ ଧର୍ମଗଡ଼ରେ ୨୪ ଘଣ୍ଟିଆ ପିଇବା ପାଣି ପ୍ରକଳ୍ପ ପାଇଁ ୨୦୦ କୋଟି ଟଙ୍କା ପ୍ରଦାନ କରିଛନ୍ତି। ମୁଖ୍ୟମନ୍ତ୍ରୀଙ୍କ ହୃଦୟରେ ଆଦିବାସୀଙ୍କ ପାଇଁ ସ୍ବତନ୍ତ୍ର ସ୍ଥାନ ରହିଛି। ଯେଉଁଥିପାଇଁ ଆଦିବାସୀ ଭାଷା, କଳା ଓ ସଂସ୍କୃତିର ରକ୍ଷଣାବେକ୍ଷଣ ପାଇଁ ସ୍ବତନ୍ତ୍ର ବିକାଶ ପରିଷଦ ଗଠନ କରାଯାଇଛି ବୋଲି କହିଥିଲେ। ପରେ ସେ ଜୁନାଗଡ଼ ନିର୍ବାଚନ ମଣ୍ଡଳୀ ଅନ୍ତର୍ଗତ ଦଶପୁରଠାରେ ଅନୁଷ୍ଠିତ ନିର୍ବାଚନୀ ସଭାରେ ଯୋଗଦେଇଥିଲେ। ମଞ୍ଚକୁ ଉଠିବା ପୂର୍ବରୁ ସେ ଲୋକଙ୍କ ଗହଣରେ ବିରୋଧୀ ଦଳକୁ ଟାର୍ଗେଟ କରିଥିଲେ। ୨୦୧୯ରେ ଯେଉଁ ନେତା କଳାହାଣ୍ଡି ସାଂସଦ ଭାବେ ନିର୍ବାଚିତ ହୋଇଥିଲେ ସେ ନିର୍ବାଚନ ପରେ ଆଉ ଦେଖାଦେଲେନି ବୋଲି ପାଣ୍ଡିଆନ କହିଥିଲେ।
ଏହାସହ ଗତ ମେ ମାସରେ ମିଳିଥିବା ଆବେଦନ ଆଧାରରେ ଗ୍ରହଣ କରାଯାଇଥିବା କାର୍ଯ୍ୟକ୍ରମର ସେ ହିସାବ ଦେଇଛନ୍ତି। କେବଳ ଜୁନାଗଡ ନିର୍ବାଚନମଣ୍ଡଳୀ ପାଇଁ ମୁଖ୍ୟମନ୍ତ୍ରୀ ୨୨୫ କୋଟି ମଞ୍ଜୁର କରିଛନ୍ତି। ମା’ ଲଙ୍କେଶ୍ବରୀ ମନ୍ଦିର ପାଇଁ ଅଢେଇକୋଟି ଟଙ୍କା ମଞ୍ଜୁର ହୋଇଥିବାବେଳେ ଇନ୍ଦ୍ରାବତୀ ଦକ୍ଷିଣପଟ କେନାଲ ପାଇଁ ୧୫୦ କୋଟି ଟଙ୍କା ମଞ୍ଜୁର ହୋଇଛି। ୨ହଜାର ମହିଳା ସ୍ବୟଂ ସହାୟକ ଗୋଷ୍ଠୀକୁ ବିନା ସୁଧରେ ଋଣ ମିଳିଛି। ଜୁନାଗଡର ୯୦ ହଜାର ହିତାଧିକାରୀ ବିଏସ୍କେୱାଇ ଯୋଜନାରେ ସାମିଲ ହୋଇ ୩୦ କୋଟି ୪୦ଲକ୍ଷ ଟଙ୍କାର ଚିକିତ୍ସା ସହାୟତା ପାଇଛନ୍ତି।
ଅପରାହ୍ନ ୪ଟାରେ ପାଣ୍ଡିଆନ ଲାଞ୍ଜିଗଡ଼ ନିର୍ବାଚନ ମଣ୍ଡଳୀର ଜୟପାଟଣା ବଜାର ପଡିଆରେ ଆୟୋଜିତ ସଭାରେ ଯୋଗଦେଇ ନିର୍ବାଚନ ମଣ୍ଡଳୀ ବିକାଶର ହିସାବ ଦେଇଥିଲେ। ଥୁଆମୂଳ ରାମପୁର ଡିଗ୍ରୀ କଲେଜ ମଞ୍ଜୁର, ମାଣିକେଶ୍ୱରୀ ମନ୍ଦିର, ଜଗନ୍ନାଥ ମନ୍ଦିର ଉନ୍ନତି କରଣ, ଜୟ ପାଟଣାକୁ ଏନ୍ଏସି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ। ଏବେ ଲାଞ୍ଜିଗଡ଼ ନିର୍ବାଚନ ମଣ୍ଡଳୀର ଉନ୍ନତୀକରଣ ପାଇଁ ୧୧୦ କୋଟି ଟଙ୍କା ଅନୁମୋଦନ କରିଛନ୍ତି।
ଅପରାହ୍ନ ୫ଟା ୨୮ରେ ସେ ନର୍ଲା ନିର୍ବାଚନ ମଣ୍ଡଳୀ ଅନ୍ତର୍ଗତ ଜୋରଡୋବ୍ରାଠାରେ ଅନୁଷ୍ଠିତ ନିର୍ବାଚନୀ ସଭାରେ ଯୋଗଦେଇ ନବୀନଙ୍କ ନେତୃତ୍ୱରେ ଅଞ୍ଚଳରେ ହୋଇଥିବା ଉନ୍ନତିମୂଳକ କାର୍ଯ୍ୟକ୍ରମ ଉପରେ କହି ବିରୋଧୀଙ୍କୁ କଟାକ୍ଷ କରିଥିଲେ। ଏହି ନିର୍ବାଚନ ମଣ୍ଡଳୀର ଉନ୍ନୟନ ମୂଳକ କାର୍ଯ୍ୟ ପାଇଁ ମୁଖ୍ୟମନ୍ତ୍ରୀ ୫୮୦ କୋଟି ଟଙ୍କା ଅନୁମୋଦନ କରିଥିବା କହିଥିଲେ। ଏହି ଅବସରରେ ଜିଲାର ଅନେକ ଭାଜପା ଓ କଂଗ୍ରେସ କର୍ମୀ ବିଜେଡିରେ ସାମିଲ ହୋଇଥିଲେ। ପାଣ୍ଡିଆନଙ୍କ ସହ ବିଭିନ୍ନ କାର୍ଯ୍ୟକ୍ରମରେ ବିଜେଡି ଲୋକ ସଭା ପ୍ରାର୍ଥୀ ଲମ୍ବୋଦର ନିଆଲ, ଜୁନାଗଡ଼ ବିଧାୟକ ପ୍ରାର୍ଥୀ କ୍ୟାପଟେନ ଦିବ୍ୟ ଶଙ୍କର ମିଶ୍ର, ଧର୍ମଗଡ଼ର ପୁଷ୍ପେନ୍ଦ୍ର ସିଂଦେଓ, ଲାଞ୍ଜିଗଡ଼ର ପ୍ରଦୀପ ଦିଶାରୀ, ନର୍ଲାର ମନୋରମା ମହାନ୍ତି ପ୍ରମୁଖ ଉପସ୍ଥିତ ଥିଲେ।
