ଭୁବନେଶ୍ୱର,୧୪।୭(ବ୍ୟୁରୋ): ଲିଙ୍ଗରାଜ ଷ୍ଟେଶନ ନିକଟ ରେଳଲାଇନ୍ରୁ ସାମାଜିକ କର୍ମୀ ଆଦିତ୍ୟ ଦାଶଙ୍କ ମୃତଦେହ ମିଳିବା ଘଟଣାକୁ ନେଇ ଏବେବି ରହସ୍ୟ ଲାଗି ରହିଛି। ଆତ୍ମହତ୍ୟା ନା ହତ୍ୟା, ଏପର୍ଯ୍ୟନ୍ତ କିଛି ସ୍ପଷ୍ଟ ହୋଇପାରିନି। ଜବତ ଡାଏରିରେ ରହିଥିବା ଲେଖା ଆଦିତ୍ୟଙ୍କର ନା ଆଉକାହାର ତାହାକୁ ନେଇ ଜିଆର୍ପି ଥାନା ପୋଲିସ ଖୋଳତାଡ଼ ଚଳାଇଛି। ଏପଟେ ଡାଏରିରେ ୪ ଫର୍ଦ୍ଦର ସୁଇସାଇଡ୍ ନୋଟକୁ ମିଛ ବୋଲି ଆଦିତ୍ୟଙ୍କ ପିପୁଲ ଫର୍ ସେବାର ସଦସ୍ୟମାନେ କହିଛନ୍ତି। ଏପରିସ୍ଥିତିରେ ପୋଲିସ ଉକ୍ତ ଡାଏରିକୁ ସୋମବାର ରସୁଲଗଡ଼ସ୍ଥିତ ଷ୍ଟେଟ୍ ହ୍ୟାଣ୍ଡ୍ ରାଇଟିଂ ବ୍ୟୁରୋକୁ ପଠାଇଛି। ୩ରୁ ୪ ଦିନ ଭିତରେ ରିପୋର୍ଟ ମିଳିଯିବା ପରେ ସେହି ହାତଲେଖା ଆଦିତ୍ୟଙ୍କର କି ନୁହେଁ ତାହାସ୍ପଷ୍ଟ ହେବ ବୋଲି ପୋଲିସ ଆଶା ରଖିଛି। ଅନ୍ୟପକ୍ଷରେ ଆଦିତ୍ୟଙ୍କ ସାଙ୍ଗ ପପୁଙ୍କୁ ପୋଲିସ ଦୀର୍ଘସମୟ ଧରି ଜେରା କରିଛି। ପପୁ ନେଇଥିବା ୧ଲକ୍ଷ ଟଙ୍କା ଓ ଅନ୍ୟ କେତେକ ପ୍ରସଙ୍ଗରେ ତଥ୍ୟ ହାସଲ କରିଛି। ସେହିଭଳି ଆଦିତ୍ୟଙ୍କୁ ମୃତ୍ୟୁର ପୂର୍ବଦିନ ଲିଙ୍ଗରାଜ ଷ୍ଟେଶନରେ ଦେଖିଥିବା ୨ଜଣ ପ୍ରତ୍ୟକ୍ଷଦର୍ଶୀଙ୍କୁ ପୋଲିସ ପଚରାଉଚରା କରିଛି। ଗତ ୭ ତାରିଖ ସନ୍ଧ୍ୟାରେ ଆଦିତ୍ୟ ଲିଙ୍ଗରାଜ ଷ୍ଟେଶନରେ ବସିଥିଲେ ବୋଲି ସ୍ଥାନୀୟ ବସ୍ତିର ଏହି ଦୁଇ ଯୁବକ କହିଛନ୍ତି। ଆଦିତ୍ୟଙ୍କୁ କେଉଁ ପ୍ଲାର୍ଟଫର୍ମରେ ବସିଥିଲେ ଓ ତାଙ୍କ ସ୍ବଭାବ ସେଦିନ କିଭଳି ଥଲା, ସେସମ୍ପର୍କରେ ଜାଣିବାକୁ ଚାହିଁଥିଲା ପୋଲିସ। ହେଲେ ଆଦିତ୍ୟ ଆତ୍ମହତ୍ୟା କରିବା ସମୟରେ କେହି ଦେଖି ନ ଥିବା ସେମାନେ କହିଛନ୍ତି। ଇତିମଧ୍ୟରେ ଜିଆର୍ପି ହାତରେ ବଡ଼ ପ୍ରମାଣ ଲାଗିଥିବା ଓ ଖୁବ୍ଶୀଘ୍ର ଏହା ଖୁଲାସା ହେବ ବୋଲି ସୂଚନା ମିଳିଛି। ଏହି ସ୍ପର୍ଶକାତର ଘଟଣାର ତଦନ୍ତ ଚାଲିଥିବାରୁ ପୋଲିସ ମୁହଁ ଖୋଲୁନାହିଁ।
ସେପଟରେ ଘଟଣା ଘଟିଥିବା ୭ ତାରିଖ ସନ୍ଧ୍ୟା ୬ଟାରୁ ରାତି ୧୦ ଭିତରେ ଷ୍ଟେଶନ ଦେଇ ଯାଇଥିବା ଟ୍ରେନଗୁଡ଼ିକର ତାଲିକା ପୋଲିସକୁ ମିଳିଛି। ଏହି ସମୟରେ ୭ଟି ଟ୍ରେନ୍ ଯାଇଥିବା ଜଣାପଡ଼ଇବା ପରେ ୪ଜଣ ପାଇଲଟଙ୍କୁ ପୋଲିସ ପଚରାଉଚରା କରିଛି। ତେବେ ଷ୍ଟେଶନ ନିକଟ ଟ୍ରେନ୍ ଲାଇନ୍ରେ ସେଭଳି କେହି ଛିଡ଼ା ହୋଇ ନ ଥିଲେ କି ଟ୍ରେନ୍ ଆଗକୁ ଡେଇଁ ଆତ୍ମହତ୍ୟା କରି ନ ଥିବା ସେମାନେ କହିଛନ୍ତି। ବାକି ୩ ପାଇଲଟ୍ଙ୍କୁ ପଚରାଉଚରା କରାଯିବ ବୋଲି ପୋଲିସ କହିଛି।
ଆଦିତ୍ୟଙ୍କ ମୃତ୍ୟୁକୁ ନେଇ ତଦନ୍ତ ସହ ଆରୋପ ପ୍ରତ୍ୟାରୋପ ଲାଗି ରହିଥିବାବେଳେ ସୋମବାର ତାଙ୍କ ସ୍ତ୍ରୀ ବିଦ୍ୟାଶ୍ରୀଙ୍କ ଏକ ବନ୍ଧୁକଧରା ଫଟୋ ଭାଇରାଲ ହୋଇଛି। ସେ ଜଣେ ପୁରୁଷଙ୍କ ନିକଟରେ ଛିଡାହୋଇ ବନ୍ଧୁକ ଧରି ଫଟୋ ପୋଜ୍ ଦେଇଛନ୍ତି। ହେଲେ ଏହି ବନ୍ଧୁକ ଅସଲି ନା ନକଲି ତାହା ସ୍ପଷ୍ଟ ହୋଇନାହିଁ। ପୋଲିସ ଏସବୁ ଦିଗକୁ ନେଇ ତଦନ୍ତ କରୁ ବୋଲି ସୋସିଆଲ ମିଡିଆରେ ଦାବି ହୋଇଛି।
