ଭୁବନେଶ୍ୱର: ଓଡ଼ିଆ ଅଭିନେତା ବିରାଜ ଦାଶଙ୍କର ମଙ୍ଗଳବାର ପରଲୋକ ଘଟିଛି। ତାଙ୍କୁ ୬୩ ବର୍ଷ ବୟସ ହୋଇଥିଲା। ସେ କର୍କଟ ରୋଗରେ ପୀଡିତ ହୋଇ ୪ ମାସ ହେବ ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିଲେ। ମୃତ୍ୟୁ ସମ୍ପର୍କରେ ତାଙ୍କ ସାନ ପୁଅ ଅର୍ଣ୍ଣବ ଦାସ ସୂଚନା ଦେଇଛନ୍ତି।
୧୯୫୯ ଜୁନ୍ ୧୫ରେ ଜନ୍ମ ଗ୍ରହଣ କରିଥିବା ବିରାଜ କଟକ ତୁଳସୀପୁରରେ ପରିବାର ସହ ରହୁଥିଲେ। ତାଙ୍କର ପ୍ରଥମ ସିନେମା ଥିଲା ‘ବଗୁଲା ବଗୁଲୀ’। ଯା ଦେବୀ ସର୍ବ ଭୂତେଷୁ, ମା ପରି କିଏ ହେବ, ଗୋଲାମ୍ ଗିରି, ପ୍ରେମ ବନ୍ଧନ ଭଳି ଅନେକ ସିନେମାରେ ସେ ଅଭିନୟ କରିଛନ୍ତି। ଦୂରଦର୍ଶନରେ ପ୍ରସାରିତ ଟେଲି ଫିଲ୍ମ ‘ତମସା ତୀରେ’ ଓ ‘ଡାକ ମୁନ୍ସୀ’ ତାଙ୍କୁ ଭିନ୍ନ ସଫଳତା ଦେଇଥିଲା। ସେହିଭଳି ଧାରାବାହିକ ‘ଦୁନିଆ’ ତାଙ୍କୁ ନୂଆ ପରିଚୟ ଦେଇଥିଲା। କେବଳ ସିନେମା ନୁହେଁ, ଦୂରଦର୍ଶନ, ଅଲ୍ ଇଣ୍ଡିଆ ରେଡ଼ିଓ, ପାଲା, ନାଟକ ଆଦିରେ ସେ ନିଜର ଛାପ ଛାଡ଼ି ଯାଇଛନ୍ତି। କମେଡ଼ିରୁ ଆରମ୍ଭ କରି ସିନେମାରେ ବିଭିନ୍ନ ଭୂମିକାରେ ସେ ଦର୍ଶକଙ୍କୁ ବାନ୍ଧି ରଖି ପାରିଥିଲେ। ପରିବାରରେ ସମସ୍ତେ ଅଭିନୟ ସହ ଜଡ଼ିତ ଥିବାରୁ ତାହା ତାଙ୍କୁ ଛୋଟବେଳୁ ଅଭିନୟ ପ୍ରତି ଆତ୍କୃଷ୍ଟ କରିଥିଲା। ତୃତୀୟ ଶ୍ରେଣୀରୁ ସେ ଅଭିନୟ ଆରମ୍ଭ କରିଥିଲେ। ଅଭିନୟ ବ୍ୟତୀତ ସେ ସ୍କ୍ରିପ୍ଟ ମଧ୍ୟ ଲେଖୁଥିଲେ। ସେ ସବୁ ସମୟରେ ନିଜକୁ ଚରିତ୍ର ସହ ଖାପ ଖୁଆଇ ଅଭିନୟ କରୁଥିଲେ। ଅଭିନୟ ସହ ସେ ବୃତ୍ତିଗତ ଜୀବନରେ ବ୍ୟାଙ୍କ ପିଓ ଭାବେ ଦୀର୍ଘ ବର୍ଷ କାର୍ଯ୍ୟ କରିଥିଲେ। ସେଥିପାଇଁ ସେ କିଛିବର୍ଷ ଅଭିନୟଠାରୁ ଦୂରେଇ ଯାଇ ପରବର୍ତ୍ତୀ ସମୟରେ ପୁଣି ଚଳଚ୍ଚିତ୍ର ଜଗତକୁ ଫେରିଥିଲେ।
