ଢେଙ୍କାନାଳ ଅଫିସ, ୮।୫: ବନ ବିଭାଗର ବିନା ଅନୁମତିରେ ରଥ ନିର୍ମାଣ ପାଇଁ କପିଳାସ ସଂରକ୍ଷିତ ଅଭୟାରଣ୍ୟରୁ ଧଉରା ଗଛ କାଟି ଅଡୁଆରେ ପଡ଼ିଛି ଢେଙ୍କାନାଳ ଜିଲା ଦେବୋତ୍ତର ବିଭାଗ। ଏଥିରେ ସମ୍ପୃକ୍ତ ଥିବା ବ୍ୟକ୍ତିଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲା ବନଖଣ୍ଡ ଅଧିକାରୀ ସ୍ପଷ୍ଟ କରିଛନ୍ତି। ଏଥିସହ ଘଟଣାର ନିରପେକ୍ଷ ତଦନ୍ତ କରିବାକୁ ସେ ନିର୍ଦ୍ଦେଶ ଦେବା ପରେ ବିଭାଗୀୟ ଅଧିକାରୀ ଖୋଳତାଡ଼ ଆରମ୍ଭ କରିଛନ୍ତି।
ଢେଙ୍କାନାଳର ଐତିହାସିକ ରଥଯାତ୍ରା ପାଇଁ ପରମ୍ପରା ଅନୁଯାୟୀ ଅକ୍ଷୟ ତୃତୀୟାରେ ରଥକାଠ ଅନୁକୂଳ କରାଯିବା ନିୟମ ରହିଛି। ତେବେ ଏହାର ଦୁଇଦିନ ପୂର୍ବରୁ ଦେବୋତ୍ତର ବିଭାଗ ଅଖ ନିର୍ମାଣ ପାଇଁ ଯୋଗାଡ଼ କରିଥିବା ୨ଟି ଧଉରାକାଠକୁ ବନ ବିଭାଗ ଜବତ କରିଥିଲା। ବନ ବିଭାଗ ଅଧିକାରୀଙ୍କ ବିନା ଅନୁମତିରେ କପିଳାସ ଅଭୟାରଣ୍ୟରୁ ଏହାକୁ କଟାଯାଇଥିବାରୁ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବାବେଳେ ଦାୟିତ୍ୱହୀନତା ପାଇଁ ନିନ୍ଦିତ ହୋଇଥିଲା ଦେବୋତ୍ତର ବିଭାଗ। ରଥକାଠ ସଂଗ୍ରହ ଏକ ମିଳିତ ପ୍ରକ୍ରିୟା। ଜିଲା ପ୍ରଶାସନ, ଦେବୋତ୍ତର ବିଭାଗ ଏବଂ ବନ ବିଭାଗ ମଧ୍ୟରେ ଏଥିଲାଗି ପୂର୍ବରୁ ଆଲୋଚନା ହେବା କଥା। ଏହାପରେ ଅନୁମତି ନିଆଯାଇ ନିର୍ଦ୍ଧାରିତ ସ୍ଥାନରୁ ଧଉରା କାଠ ସଂଗ୍ରହ କରାଯାଇଥାଏ। ତେବେ ଦେବୋତ୍ତର ବିଭାଗ ଏଥିରେ ଖିଲାପ କରିଛି। ତେଣୁ ଏହାର ବିଭାଗୀୟ ତଦନ୍ତ ଆରମ୍ଭ ହୋଇଥିବା ଜିଲା ବନଖଣ୍ଡ ଅଧିକାରୀ ଡ. ପ୍ରକାଶ ଚାନ୍ଦ ଗୋଗିନେନି ସୂଚନା ଦେଇଛନ୍ତି। ଘଟଣାର ତଦନ୍ତ ପାଇଁ କପିଳାସ ରେଞ୍ଜ୍ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ତଦନ୍ତ ପରେ ଯିଏ ଦୋଷୀ ସାବ୍ୟସ୍ତ ହେବେ, ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ରାଜରାଜୁଡ଼ା ଅମଳର ଐତିହାସିକ ରଥଯାତ୍ରା ପାଇଁ ଦେବୋତ୍ତର ବିଭାଗର ପ୍ରସ୍ତୁତି ଯେ ସନ୍ତୋଷଜନକ ନୁହେଁ, ତାହା ଧଉରା କାଠ ଜବତ ଘଟଣାରୁ ସ୍ପଷ୍ଟ ହୋଇଛି। କରୋନା ସଂକ୍ରମଣ ପାଇଁ ଦୀର୍ଘ ୨ବର୍ଷ ହେଲା ବନ୍ଦ ଥିବା ରଥଯାତ୍ରାକୁ ଆଡମ୍ବର ସହକାରେ ଆୟୋଜନ କରିବାକୁ ଜଗନ୍ନାଥପ୍ରେମୀ ଚାହିଁ ବସିଥିବାବେଳେ ରଥ ଅନୁକୂଳ ଦିନ ପରମ୍ପରା ଭଙ୍ଗ ହୋଇଛି। ବନ ବିଭାଗ କାଠ ଜବତ କରିବା ପରେ ଏକ ସ’ ମିଲ୍ରୁ କାଠ କିଣି ଦେବୋତ୍ତର ବିଭାଗ କାମ ଚଳାଇଥିଲା, ଯାହାକୁ ସହରର ବୁଦ୍ଧିଜୀବୀ ନାପସନ୍ଦ କରିଛନ୍ତି।
