ଭବାନୀପାଟଣା,୨୦।୧(ଉତ୍ତମ କୁମାର ଦାଶ): କଳାହାଣ୍ଡି ଜିଲାର ବିଭିନ୍ନ ତହସିଲରେ ବେଆଇନ ଭାବେ ବାଲି ଓ ପଥର ଚୋରାଚାଲାଣ ରୋକିବା ପାଇଁ ଜିଲା ମାଇନିଂ(ଖଣି) ବିଭାଗ ଅଣ୍ଟା ଭିଡିଛି। ଜିଲାରେ ଏସବୁ ରୋକିବା ପାଇଁ ଆକ୍ସନ ମୁଡକୁ ଓହ୍ଲାଇଛି ଖଣି ବିଭାଗ। ଏଥିପାଇଁ ଜିଲାରେ ଖଣି ବିଭାଗ ସମେତ ରାଜସ୍ବ ବିଭାଗ ଓ ପୋଲିସ କର୍ମଚାରୀଙ୍କୁ ନେଇଁ ୨ଟି ଟିମ୍ ଗଠନ କରାଯାଇ ବିଭିନ୍ନ ସ୍ଥାନରେ ଚଢାଉ କରାଯାଉଛି।
ରବିବାର ରାତିରେ ଭବାନୀପାଟଣା ତହସିଲରେ ଚଢାଉ ସମୟରେ ୪ଟି ଟ୍ରାକ୍ଟର ଠାରୁ ୯୦ ହଜାର ଟଙ୍କା ଫାଇନ ଆଦାୟ କରାଯାଇଥିବାବେଳେ ୨ ଟି ହାଇଓ୍ବା ଠାରୁ ୨ ଲକ୍ଷ ଟଙ୍କା ଫାଇନ ଆଦାୟ କରାଯାଇଛି । ସେହିପରି ସୋମବାର ଥୁଆମୁଲ ରାମପୁର ତହସିଲରେ ଚଢାଉ କରାଯାଇ ୩ଟି ଟ୍ରାକ୍ଟରରୁ ୧ଲକ୍ଷ ୨୦ ହଜାର ଓ ଗୋଟିଏ ହାଇଓ୍ବା ଠାରୁ ୧ଲକ୍ଷ ୨୦ ହଜାର ଟଙ୍କା ଫାଇନ ଆଦାୟ କରାଯାଇଛି । ଏହାସହ କଲମପୁର ତହସିଲ ଅଞ୍ଚଳରେ ଗୋଟିଏ ଟ୍ରାକ୍ଟରକୁ ଜବତ କରାଯାଇ ସ୍ଥାନୀୟ ଥାନାରେ ଜିମା ଦିଆଯାଇଛି । ସମୁଦାୟ ୭ଟି ଟ୍ରାକ୍ଟର ଓ ୩ଟି ହାଇଓ୍ବାରୁ ୫ଲକ୍ଷ ୩୦ହଜାର ଫାଇନ ଆଦାୟ କରାଯାଇଛି ।
ଭବାନୀପାଟଣା ତହସିଲ ଅଞ୍ଚଳରେ ଚଢ଼ାଉରେ କଳାହାଣ୍ଡି ଖଣି ଉପନିର୍ଦ୍ଦେଶକ ବିଶ୍ବନାଥ ସୋରେନ ଓ ତାଙ୍କ ଟିମ୍ ସ୍ଥାନୀୟ ତହସିଲାଦାର ଶୁଭସ୍ମିତା ମିଶ୍ର ଓ ତାଙ୍କ ଟିମ୍ ସମେତ ପୋଲିସ କର୍ମଚାରୀ ସାମିଲ ଥିଲେ । ସେହିପରି ଥୁଆମୁଳ ରାମପୁର ଓ କଲମପୁର ତହସିଲ ଅଞ୍ଚଳରେ ହୋଇଥିବା ଚଢାଉରେ ଖଣି ଅଧିକାରୀ ମୁରଲୀଧର ନାଏକ, କ୍ଷେତ୍ର ଅଧିକାରୀ ମଳୟ ରଞ୍ଜନ ବିଶ୍ବାଲ ସମେତ ସ୍ଥାନୀୟ ତହସିଲଦାର ଓ ପୋଲିସ କର୍ମଚାରୀ ସାମିଲ ଥିଲେ । କଳାହାଣ୍ଡି ଜିଲା ଖଣି ବିଭାଗ କାର୍ଯ୍ୟାଳୟରେ କମ୍ ସଂଖ୍ୟକ କର୍ମଚାରୀ ଥିବା ସତ୍ତ୍ବେ ମଧ୍ୟ ବିଭିନ୍ନ ଅଞ୍ଚଳରେ ଏପରି ଚଢାଉକୁ ନେଇଁ ଜିଲାରେ ଚୋରାଚାଲାଣ କରୁଥିବା ବାଲି ଓ ପଥର ମାଫିଆଙ୍କ ମଧ୍ୟରେ ଭୟର ବାତା ବରଣ ଦେଖାଦେଇଛି।
