ଛେଣ୍ଡିପଦା,୨୮।୪(ସ୍ବ.ପ୍ର.): ଅନୁଗୋଳ ଜିଲା ଛେଣ୍ତିପଦା ଗ୍ରାମର ନିଖୋଜ ପ୍ରାଣବନ୍ଧୁ ସେଠୀଙ୍କ ମୃତଦେହ ମଙ୍ଗଳବାର ଏକ କୂଅରୁ ଜବତ କରାଯାଇଥିଲା। ପ୍ରାଣବନ୍ଧୁଙ୍କୁ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିବା ପରେ ପୋଲିସ ଏ ନେଇ ଗଁାର ୨ ଅଭିଯୁକ୍ତ ବିପିନ ଦେହୁରୀ ଓ ଅମର ପ୍ରଧାନଙ୍କ ସହ ଅମରଙ୍କ ବାପା କଷ୍ଟୁ ପ୍ରଧାନଙ୍କୁ ଅଟକ ରଖି ପଚରାଉଚରା କରୁଥିଲା। ବୁଧବାର ପୋଲିସ ଏହା ଏକ ହତ୍ୟାକାଣ୍ଡ ବୋଲି ଜାଣିପାରିଛି। ଏଥିସହ ଅଭିଯୁକ୍ତ ଅମରଙ୍କୁ ଗଁା କୂଅ ନିକଟକୁ ନେବା ପରେ ପ୍ରାଣବନ୍ଧୁଙ୍କୁ କିପରି ହତ୍ୟା କରାଗଲା ତାହାର ସେ ଡେମୋ ଦେଖାଇବା ଚର୍ଚ୍ଚାର ବିଷୟ ହୋଇଛି। ପ୍ରକାଶ ଯେ, ଗତ ରବିବାର ପ୍ରାଣବନ୍ଧୁ ସେହି ଗ୍ରାମର ଅମର ପ୍ରଧାନ ଓ ବିପିନ ଦେହୁରୀଙ୍କ ସହ ଗାଁମୁଣ୍ତରେ ଥିବା ଏକ ବଗିଚା ନିକଟକୁ ଭୋଜି କରିବାକୁ ଯାଇଥିଲେ। ସେଠାରୁ ଘରକୁ ଫେରିବା ପରେ ପୁଣି ରାତି ୮ଟା ବେଳେ ଅମର ଓ ବିପିନଙ୍କ ସହ ଏକ ଦୋକାନ ସମ୍ମୁଖକୁ ଯାଇ ମୁଢି ଓ ମାଂସ ଖାଇଥିଲେ। ହେଲେ ବିଳମ୍ବିତ ରାତି ପର୍ଯ୍ୟନ୍ତ ପ୍ରାଣବନ୍ଧୁ ଘରକୁ ଫେରି ନ ଥିଲେ। ପରିବାର ଲୋକମାନେ ଖୋଜାଖୋଜି କରିବା ପରେ ସୋମବାର ଅପରାହ୍ନରେ ଥାନାରେ ନିଖୋଜ ସମ୍ପର୍କିତ ଲିଖିତ ଅଭିଯୋଗ କରିଥିଲେ। ଏହାପରେ ପୋଲିସ ଅଭିଯୁକ୍ତଙ୍କୁ ଥାନାକୁ ନେଇ ପଚରାଉଚରା କରୁଥିଲା। ସୋମବାର ବିଳମ୍ବିତ ରାତିରେ ମୃତଦେହ କୂଅରେ ଭାସୁଥିବା ପୋଲିସକୁ ଖବର ମିଳିଥିଲା। ତେବେ ବୁଧବାର ଅନୁଗୋଳ ଅତିରିକ୍ତ ଆରକ୍ଷୀ ଅଧିକାରୀ ପ୍ରସନ୍ନ କୁମାର ବିଶ୍ବାଳ ଓ ଡିଏସ୍ପି ଏ.କେ. ପଣ୍ଡା ଛେଣ୍ଡିପଦା ଥାନାକୁ ଆସି ଘଟଣାର ତଦନ୍ତ କରିଥିଲେ। ଅପରାହ୍ନରେ ଛେଣ୍ଡିପଦା ପୋଲିସ ଅଭିଯୁକ୍ତ ଅମରଙ୍କୁ ଘଟଣାସ୍ଥଳକୁ ନେଇଥିଲା। ସେଠାରେ ଅମର ହତ୍ୟାକାଣ୍ଡର ଡେମୋ ଦେଖାଇବା ସହ ବ୍ୟବହୃତ ରଶି କଦଳୀଗଛ ମୂଳରୁ ବାହାର କରି ପୋଲିସକୁ ଦେଇଥିଲେ। ଗୁରୁବାର ହତ୍ୟାକାଣ୍ଡର ପର୍ଦ୍ଦାଫାଶ କରାଯିବ ବୋଲି ଛେଣ୍ଡିପଦା ଥାନା ଅଧିକାରୀ ଧୀରେନ କୁମାର ବେହେରା ପ୍ରକାଶ କରିଛନ୍ତି।
