ଭୁବନେଶ୍ୱର,(ବ୍ୟୁରୋ)୨୩ା୮:ଖଣ୍ଡଗିରି ଥାନା ଅନ୍ତର୍ଗତ ଡୁମୁଡୁମା ଫେଜ୍-୨ରେ ୨୦୧୬ ଡିସେମ୍ବର ୩୧ ରାତିରେ ଜଣେ ମହିଳାଙ୍କୁ ହତ୍ୟା କରିବା ମାମଲାରେ ସୋମବାର ରାୟ ପ୍ରକାଶ ପାଇଛି। ଅଭିଯୁକ୍ତ ସ୍ବାମୀ ରାଜେନ୍ଦ୍ର ସିଂ ଓରଫ ବାବୁ (୫୫)ଙ୍କୁ ଆଜୀବନ ଜେଲ ଦଣ୍ଡାଦେଶ ହୋଇଛି। ଏଥିସହ ତାଙ୍କୁ ୫୦ ହଜାର ଟଙ୍କା ଅର୍ଥଦଣ୍ଡରେ ମଧ୍ୟ ଦଣ୍ଡିତ କରାଯାଇଛି। ଏହି ଜରିମାନା ଅନାଦାୟ ଅଧିକ ୬ ମାସ ଜେଲଦଣ୍ଡ ଭୋଗିବାକୁ ଭୁବନେଶ୍ୱର ଅତିରିକ୍ତ ଦ୍ୱିତୀୟ ଜିଲା ଦୌରାଜଜ୍ (୨) ବିଚାରପତି ସତ୍ୟ ନାରାୟଣ ପାତ୍ର ତାଙ୍କ ରାୟରେ ଶୁଣାଇଛନ୍ତି।
ସୂଚନା ଅନୁଯାୟୀ, କଟକ ଖପୁରିଆ ଅଞ୍ଚଳର ରାଜେନ୍ଦ୍ର ଡୁମୁଡୁମା ଫେଜ-୨ରେ ସ୍ତ୍ରୀ ସସ୍ମିତା ସିଂଙ୍କ ସହ ରହୁଥିଲେ। ରାଜେନ୍ଦ୍ର ସ୍ଥାନୀୟ ଅଞ୍ଚଳରେ ଏକ ପରିବା ଦୋକାନ କରି ଘର ଚଳାଉଥିଲେ। ତାଙ୍କ ପୁଅ ଓ ଝିଅ ନିକଟରେ ଭଡ଼ାରେ ରହୁଥିବା ମାମୁଙ୍କ ଘରକୁ ଯାଇଥିଲେ। ୨୦୧୬ ଡିସେମ୍ବର ୩୧ ତଥା ଶନିବାର ରାତିରେ ରାଜେନ୍ଦ୍ର ଜଣେ ବ୍ୟକ୍ତିଙ୍କ ଠାରୁ ପାଇବାକୁ ଥିବା ୫ ହଜାର ଟଙ୍କା ଆଣିବାକୁ ଯାଇଥିଲେ। ହେଲେ ତାଙ୍କଠୁ ମାତ୍ର ୧ ହଜାର ଟଙ୍କା ଆଣି ସେଥିରେ ମଦ ପିଇଦେଇ ରାତି ୯ଟାରେ ଘରକୁ ଫେରିଥିଲେ। ଏହି ମଦ ପିଇବା ଘଟଣାକୁ ନେଇ ସ୍ତ୍ରୀଙ୍କ ସହ ଝଗଡ଼ା ହୋଇଥିଲା। କଥା କଟାକଟି ବେଳେ ନିଶାଶକ୍ତ ଥିବା ରାଜେନ୍ଦ୍ର ସସ୍ମିତାଙ୍କ ମୁଣ୍ଡକୁ କାନ୍ଥରେ ପିଟି ଦେଇଥିଲେ। ସସ୍ମିତାଙ୍କ ମୁଣ୍ଡରେ ଗଭୀର କ୍ଷତ ସୃଷ୍ଚି ହେବା ସହ ଚେତା ପଳାଇଥିଲା। ଏହାପରେ ଏକ କପଡ଼ାରେ ସସ୍ମିତାଙ୍କୁ ବେକକୁ ଭିଡ଼ି ହତ୍ୟା କରିଥିଲେ। ମୃତା ସସ୍ମିତା ଘରେ ରକ୍ତାକ୍ତ ଅବସ୍ଥାରେ ପଡ଼ିଥିବା ବେଳେ ରାଜେନ୍ଦ୍ର ନିଶାରେ ସେଠାରେ ଶୋଇପଡ଼ିଥିଲେ। ୨୦୧୭ ଜାନୁୟାରୀ ୧ ଅର୍ଥାତ ନୂଆବର୍ଷ ସକାଳେ ଶଳା ତପନ ସିଂଙ୍କୁ ଫୋନରେ ନୂଆ ବର୍ଷର ଶୁଭେଚ୍ଛା ଜଣାଇବା ସହ ହତ୍ୟା ଘଟଣା ସମ୍ପର୍କରେ କହିଥିଲେ। ଖବର ଦିଆଯିବା ପରେ ପୋଲିସ ପହଞ୍ଚି ମୃତଦେହ ଜବତ କରିବା ସହ ଅଭିଯୁକ୍ତ ରାଜେନ୍ଦ୍ରଙ୍କୁ କାବୁ କରିଥିଲା। ପୋଲିସ ଏକ ହତ୍ୟା ମାମଲା (ନଂ.୧/୨୦୧୭) ରୁଜୁ କରି ତଦନ୍ତ ଆରମ୍ଭ କରିବା ସହ ରାଜେନ୍ଦ୍ରଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଏହି ମାମଲାରେ ବିଚାରପତି ୨୦ ଜଣ ସାକ୍ଷୀଙ୍କ ବୟାନକୁ ଆଧାର କରି ସୋମବାର ରାୟ ଶୁଣାଇଛନ୍ତି। ପୀଡ଼ିତାଙ୍କ ପକ୍ଷରୁ ସରକାରୀ ଓକିଲ ଶଲୀଳ କୁମାର ପ୍ରଧାନ ମାମଲା ପରିଚାଳନା କରୁଥିଲେ।
