ଦିଗପହଣ୍ଡି,୨୩।୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ ନିଳିମା ଷଡଙ୍ଗୀ ଏକ ଚୋରି ମାମଲା (ଜିଆର -୫୪୪/୨୪)ର ଚୂଡାନ୍ତ ରାୟ ପ୍ରକାଶ କରି ଶୁକ୍ରବାର ଅଭିଯୁକ୍ତଙ୍କୁ ଦୋଷୀସାବ୍ୟସ୍ତ କରିଛନ୍ତି। ଅଭିଯୁକ୍ତ ଜଣକ ହେଲେ ପାଟପୁର ଥାନା ଜଗନ୍ନାଥପୁର ଗ୍ରାମର ଜଗନ୍ନାଥ ବିଷୋୟୀ। ସମସ୍ତ ସାକ୍ଷ୍ୟ ପ୍ରମାଣକୁ ଭିତ୍ତିକରି ଭାରତୀୟ ନ୍ୟାୟ ସଂହିତା ଧାରା-୩୩୧(୪) ଏବଂ ୩୦୫ ଅନୁଯାୟୀ ଅଭିଯୁକ୍ତଙ୍କୁ ୧ ବର୍ଷ ସଶ୍ରମ କାରାଦଣ୍ଡ ଏବଂ ୨ ହଜାର ଟଙ୍କା ଜରିମାନା ଏବଂ ଜରିମାନା ଅନାଦୟେ ଅଧିକା ୧ ମାସ କାରାଦଣ୍ଡ ପାଇଁ ମାଜିଷ୍ଟ୍ରେଟ ଆଦେଶ ଦେଇଛନ୍ତି। ତେବେ ଅଭିଯୁକ୍ତ ଜଣକ ଏହି ଆଦେଶ ବିରୋଧରେ ଉପରିସ୍ଥ କୋର୍ଟରେ ଆବେଦନ କରିପାରିବେ ବୋଲି ରାୟରେ ଉଲ୍ଲେଖ ରହିଛି।
ସୂଚନା ପ୍ରକାରେ, ଗତ ୨୦୨୪ ନଭେମ୍ବର ୨୧ ତାରିଖ ବିଳମ୍ବିତ ରାତିରେ ଦିଗପହଣ୍ଡିସ୍ଥିତ ଖେମୁଣ୍ଡି କଲେଜ ସମ୍ମୁଖରେ ଥିବା ଅଶୋକ ସ୍ବାଇଁଙ୍କ ମାର୍କେଟ କମ୍ପ୍ଲେକ୍ସ ରେ ବିଭିନ୍ନ ବ୍ୟବସାୟ କରୁଥିବା ସୁମିତ ପଟ୍ଟନାୟକ,ଆଶିଷ ରାଉତ, ସନିଆ ଡାକୁଆ, ଜନାର୍ଦ୍ଦନ ନାୟକଙ୍କ ଦୋକାନ ଘର ତାଲା ଭାଙ୍ଗି ଲାପଟପ, ସେଲୁନ ସାମଗ୍ରୀ,ସିସିଟିଭି କ୍ୟାମେରା, ସ୍ପିକର ବକ୍ସ, ସିସିଟିଭି ଯନ୍ତ୍ରାଂଶ,ଖାଦ୍ୟ ସାମଗ୍ରୀ ଏବଂ ୧୭୩୦୦ ଟଙ୍କା ଚୋରି ହୋଇଥିଲା। ଘଟଣାର ପରଦିନ ସକାଳେ ଏନେଇ ଦୋକାନ ମାଲିକମାନେ ଜାଣିବା ପରେ ଦିଗପହଣ୍ଡି ଥାନାରେ ମିଳିତ ଭାବେ ଏତଲା ଦେଇଥିଲେ।
ଥାନା ଆଇଆଇସି ପ୍ରଶାନ୍ତ କୁମାର ପାତ୍ର ଥାନା ମାମଲା ନଂ.୪୬୩/୨୪ ଅନୁଯାୟୀ ମକଦ୍ଦମା ରୁଜୁ କରିଥିଲେ। ତଦନ୍ତକାରୀ ଅଧିକାରୀ ଏଏସଆଇ ନିଗମ ଚଦ୍ର ପ୍ରଧାନ ଘଟଣାର ତଦନ୍ତ କରି ଅଭିଯୁକ୍ତଙ୍କୁ ଗିରଫ କରିବା ସହ ସାକ୍ଷ୍ୟ ମାନଙ୍କ ଉପସ୍ଥିତିରେ ତାଙ୍କ ନିକଟରୁ ତାଲା ଭାଙ୍ଗିବା ପାଇଁ ବ୍ୟବହୃତ ସାମଗ୍ରୀ ଏବଂ ଚୋରି ଲାପଟପ ଜବତ କରି ଗତ ୨୦୨୪ ନଭେମ୍ବର ୨୮ ତାରିଖରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିଲେ।ଏହି ଚୋରି ଘଟଣାର ସବିଶେଷ ତଦନ୍ତ କରି ତଦନ୍ତକାରୀ ଅଧିକାରୀ ଏଏସଆଇ ଗତ ଜାନୁଆରୀ ୨୫ ତାରିଖରେ ଅଭିଯୁକ୍ତଙ୍କ ବିରୋଧରେ କୋର୍ଟରେ ଚାର୍ଜସିଟ ଦାଖଲ କରିଥିଲେ। ମାମଲାରେ ସମୁଦାୟ ୧୦ ଜଣ ସାକ୍ଷୀଙ୍କ ବୟାନ ଲିପିବଦ୍ଧ କରାଯାଇଥିଲା। ସରକାରଙ୍କ ପକ୍ଷରୁ କ୍ୟାଡର ଏପିପି ବିପ୍ଲବ କୁମାର ମୁଦୁଲି ଏବଂ ସରକାରୀ ଓକିଲ ନକୁଳ ପ୍ରଧାନ ମାମଲା ପରିଚାଳନା କରୁଥିଲେ। ଗିରଫ ହେବା ପରଠାରୁ ଅଭିଯୁକ୍ତ ଜଣକ ଦିଗପହଣ୍ଡି ସବ ଜେଲରେ ଅନ୍ତେବାସୀ ଭାବେ ରହୁଥିବା ଜଣାପଡିଛି।
