ନୂଆଦିଲ୍ଲୀ,୨୧।୬ : ଜଣେ ଯୁବତୀଙ୍କୁ ଅପହରଣ ମାମଲାର ଶୁଣାଣି ବେଳେ ଦିଲ୍ଲୀ ହାଇକୋର୍ଟ ଜଣେ ଅଭିଯୁକ୍ତଙ୍କୁ ଜାମିନ ପ୍ରଦାନ କରିଛନ୍ତି। ଜଷ୍ଟିସ ବିକାଶ ମହାଜନଙ୍କ ବେଞ୍ଚ କହିଛନ୍ତି ଅଭିଯୁକ୍ତଙ୍କୁ ଶିକ୍ଷା ଦେବା ପାଇଁ ଶୁଣାଣି ସମୟରେ ଜେଲଦଣ୍ଡକୁ ଅଧିକ ସମୟ ଦିଆଯାଇପାରିବ ନାହିଁ।
ପ୍ରାୟ ଦୁଇ ବର୍ଷ ନଅ ମାସ ଧରି ଜେଲରେ ଥିବା ଅଭିଯୁକ୍ତଙ୍କ ଏହି ମାମଲା ଶେଷ କରିବାକୁ ବହୁ ସମୟ ଲାଗିବ ବୋଲି କୋର୍ଟ କହିଛନ୍ତି। ଏଭଳି ପରିସ୍ଥିତିରେ କେବଳ ଅଭିଯୁକ୍ତଙ୍କୁ ଶିକ୍ଷା ଦେବା ଉଦ୍ଦେଶ୍ୟରେ ବିଚାର ଜାରି ରହିଥିବା ସମୟରେ ଜେଲ ସମୟ ସୀମା ବୃଦ୍ଧି କରାଯାଇପାରିବ ନାହିଁ। ଏଭଳି ପରିସ୍ଥିତିରେ ଆବେଦନକାରୀଙ୍କୁ ଜାମିନରେ ମୁକ୍ତ କରିବାକୁ ନିର୍ଦ୍ଦେଶ ଦିଆଯାଇଛି।
ସେପ୍ଟେମ୍ବର ୨୦୨୦ରେ ପୀଡିତା ଯୁବତୀଙ୍କ ସମ୍ପର୍କୀୟ ନିଖୋଜ ଅଭିଯୋଗ କରିବା ପରେ ଅଭିଯୁକ୍ତଙ୍କୁ ଗିରଫ କରାଯାଇଥିଲା। ଯୁବତୀଙ୍କ ବାପା ଅଭିଯୋଗ କରିଥିଲେ ଅପହରଣକାରୀ ମୁକ୍ତି ପାଇଁ ୪୦ ଲକ୍ଷ ଟଙ୍କା ମାଗିଥିଲେ ଏବଂ ଯଦି ଦାବି ପୂରଣ ନ ହୁଏ ତେବେ ତାଙ୍କ ଝିଅକୁ ହତ୍ୟା କରାଯିବ ବୋଲି ଧମକ ଦେଇଥିଲେ। ଶୁଣାଣି ବେଳେ କୋର୍ଟ କହିଛନ୍ତି ଜାମିନ ନାମଞ୍ଜୁର ହେବାର ଏହା ଏକମାତ୍ର ମାପଦଣ୍ଡ ନୁହେଁ।
କୋର୍ଟ କହିଛନ୍ତି ଦୋଷୀ ସାବ୍ୟସ୍ତ ହୋଇ ନ ଥିବା ବ୍ୟକ୍ତିଙ୍କୁ କେବଳ ସେତେବେଳେ ଜେଲରେ ରଖାଯିବା ଉଚିତ, ଯେତେବେଳେ ସେ ପ୍ରମାଈ ଅଦଳବଦଳ କିମ୍ବା ସାକ୍ଷୀମାନଙ୍କୁ ଧମକ ଦେବେ। ପ୍ରବର୍ତ୍ତନ ନିର୍ଦ୍ଦେଶାଳୟ ଅନୁଯାୟୀ, ପୀଡିତା ସିଆରପିସିର ଧାରା ୧୬୪ ଅନୁଯାୟୀ ଏକ ବିବୃତ୍ତି ଦେଇଛନ୍ତି ତାଙ୍କୁ ଅଭିଯୁକ୍ତ ତଥା ତାଙ୍କ ପ୍ରେମିକା ଟଙ୍କା ପାଇଁ ଅପହରଣ କରି ନେଇଥିଲେ। ପୀଡିତା ଅଭିଯୋଗ କରିଛନ୍ତି, ତାଙ୍କୁ ମଧ୍ୟ ଆକ୍ରମଣ କରାଯାଇଥିଲା। ଅଭିଯୁକ୍ତଙ୍କ ଦ୍ୱାରା ତାଙ୍କ ମୋବାଇଲ ଫୋନ ମଧ୍ୟ ଛଡ଼ାଇ ନିଆ ଯାଇଥିଲା ଯେଉଁଥିରୁ କଲ ଏବଂ ହ୍ବାଟସ ଆପ ମେସେଜ ପଠାଯାଇଥିଲା।
