ନବରଙ୍ଗପୁର,୮।୧୧(ବି.ପ୍ର.):ନବରଙ୍ଗପୁର ଜିଲାରେ ଅନେକ ଶିକ୍ଷକ ନକଲି ସାର୍ଟିଫିକେଟ ଦେଇ ଚାକିରି କରୁଛନ୍ତି। କେତେଜଣ ଶିକ୍ଷକ ଲମ୍ବା ଛୁଟିରେ ଅଛନ୍ତି। ଯାଞ୍ଚ ପରେ ଧରାପଡିଲେ ପରବର୍ତ୍ତୀ ସମୟରେ ଚାକିରିରୁ ବହଷ୍କୃତ କରାଯାଉଛି। କେତେକ ସ୍ଥାନରେ ନକଲିି ଶିକ୍ଷକଙ୍କୁ ଆଗୁଆ ଜଣାଇଦେବା ଓ ପରେ ଥାନାରେ ଏତଲା ଦେବା ଭଳି ଘଟଣା ମଧ୍ୟ ନଜିର ରହିଛି । ଅନେକ ନକଲି ଶିକ୍ଷକଙ୍କ ନାମରେ ଜିଲାର ବିଭିନ୍ନ ଥାନାରେ ମାମଲା ପରେ ସେମାନେ ଏବେ ଫେରାର ଅଛନ୍ତି। ତେବେ ଦୀର୍ଘ ମାସ ଓ ବର୍ଷ ଛୁଟିରେ ରହିଥିଲେ ମଧ୍ୟ କାର୍ଯ୍ୟାନୁଷ୍ଠାନ ନାହିଁ। କେବଳ ରାଜ୍ୟ ଗଣ ଶିକ୍ଷା ବିଭାଗକୁ ଚିଠି କରି ଦେଇ ଚୁପ୍ ରହୁଛି ବ୍ଲକ ଓ ଜିଲା ଶିକ୍ଷା ବିଭାଗ। ରାଜ୍ୟ ସରକାରଙ୍କ ପକ୍ଷରୁ ଲମ୍ବା ଛୁଟି ତଥ୍ୟ ପ୍ରଦାନ ସମ୍ପର୍କରେ ନିର୍ଦ୍ଦେଶ ଆସିଥିଲା। ଜିଲା ଶିକ୍ଷା ବିଭାଗ ପକ୍ଷରୁ କେବଳ ପ୍ରାଥମିକ ଶିକ୍ଷୟିତ୍ରୀ ଶିକ୍ଷକଙ୍କ ତଥ୍ୟ ଦିଆଯାଇଛି। ମାଧ୍ୟମିକ ଶିକ୍ଷକଙ୍କର କୌଣସି ତଥ୍ୟ ରାଜ୍ୟ ଶକ୍ଷା ବିଭାଗକୁ ପଠାଯାଇ ନାହିଁ। ମାଧ୍ୟମିକ ଶିକ୍ଷକଙ୍କ ପ୍ରତି ଜିଲା ଶିକ୍ଷା ବିଭାଗର ଏତେ ବଦାନ୍ୟତା କାହିଁକି ବୋଲି ଶିକ୍ଷକଙ୍କ ମଧ୍ୟରେ ଆଲୋଚନା ହୋଇଛି।
ଗଣଶିକ୍ଷା ବିଭାଗ ଅତିରିକ୍ତ ସଚିବ ସମ୍ବିତ କୁମାର ନାୟକ ଚିଠି ନମ୍ବର ୨୩୫୦୭ରେ ରାଜ୍ୟର ସମସ୍ତ ଜିଲା ଶିକ୍ଷା ଅଧିକାରୀଙ୍କୁ ଲମ୍ବା ଛୁଟିରେ ଅନୁପସ୍ଥିତ ଥିବା ଶିକ୍ଷକଙ୍କ ତାଲିକା ଓ ତଥ୍ୟ ପ୍ରଦାନ କରିବା ପାଇଁ ନିର୍ଦ୍ଦେଶ ଦେଇଥିଲେ। ଆଞ୍ଚଳିକ ଶିକ୍ଷା ନିର୍ଦ୍ଦେଶକ ଏହାର ତଦାରଖ କରିବା ପାଇଁ ନିର୍ଦ୍ଦେଶ ରିହିଛି। କ୍ରମିକ ନମ୍ବର, ଶିକ୍ଷକଙ୍କ ନାମ, କି ପ୍ରକାର ଶିକ୍ଷକ, କେଉଁ ତାରିଖରୁ ଓ କେଉଁ କାରଣରୁ ଛୁଟିରେ ରହିଛନ୍ତି, ତାଙ୍କ ଉପରେ କ’ଣ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ସବିଶେଷ ତଥ୍ୟ ପ୍ରଦାନ କରିବାକୁ ନିର୍ଦ୍ଦେଶ ରହିଛି। ନବରଙ୍ଗପୁର ଜିଲା ଶିକ୍ଷା ଅଧିକାରୀ ଚିଠି ନମ୍ବର ୬୩୪୧ ପ୍ରକାରେ ଆଞ୍ଚଳିକ ଶିକ୍ଷା ନିର୍ଦ୍ଦେଶାଳୟ ବ୍ରହ୍ମପୁରକୁ କେବଳ ପ୍ରାଥମିକ ଶିକ୍ଷକଙ୍କ ତଥ୍ୟ ପ୍ରଦାନ କରିଛନ୍ତି। ଚାକିରିରୁ ବହିଷ୍କୃତ ଶିକ୍ଷକଙ୍କ ନାମ ଓ କେଉଁ ତାରିଖରୁ ବହିଷ୍କୃତ ହୋଇଛନ୍ତି ତାହା ଦର୍ଶାଯାଇଛି। ଜଣେ କୋର୍ଟ ମାମଲାରେ ଲମ୍ବା ଛୁଟିରେ ଥିବା ଦର୍ଶାଇଛନ୍ତି। ଅନ୍ୟତ୍ର ୧୭ ଜଣ ଶିକ୍ଷୟିତ୍ରୀ ଶିକ୍ଷକ ଦାର୍ଘ ବର୍ଷ ଧରି ଲମ୍ବା ଛୁଟିରେ କ’ଣ ପାଇଁ ରହିଛନ୍ତି ତାହାର କୌଣସି କାରଣ ଦର୍ଶାଯାଇନାହିଁ। ଚିଠିକୁ ଆଧାର କଲେ ଶିକ୍ଷୟିତ୍ରୀ ଓ ଶିକ୍ଷକଙ୍କୁ କାରଣ ଦର୍ଶାଅ ନୋଟିସ ଏବଂ ପ୍ରଶାସନିକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିବା ଜଣାପଡିଛି। ଜିଲାର ନନ୍ଦାହାଣ୍ଡି ବ୍ଲକର ୨ ଶିକ୍ଷକ ମାର୍ଚ୍ଚ ଓ ଜୁଲାଇ ୨୦୧୯ରୁ ଅନୁପସ୍ଥିତ, କୋଷାଗୁମୁଡା ବ୍ଲକର ୭ ଜଣ ମଧ୍ୟରୁ ୨ ଜଣ ଶିକ୍ଷକ ଫେବୃୟାରୀ ୨୦୨୧, ୨୦୨୨ରୁ ୨ଜଣ, ଜୁନ୍ ୨୦୧୮ ମସିହାରୁ ୨ଜଣ ଅନୁପସ୍ଥିତ ଅଛନ୍ତି। ପାପଡାହାଣ୍ଡି ବ୍ଲକର ୬ ଜଣଙ୍କ ମଧ୍ୟରୁ ଏପ୍ରିଲ ୨୦୧୮ରେ ୨, ୨୦୧୪ ଅକ୍ଟୋବରରେ ୧, ନଭେମ୍ବର ୨୦୧୦ରେ ୧, ଅକ୍ଟୋବର ୨୦୧୬ରେ ୧ ଓ ୨୦୧୮ ଏପ୍ରିଲରୁ କୋର୍ଟ କେସରେ ଜଣେ ଶିକ୍ଷକ ଅନୁପସ୍ଥିତ ଅଛନ୍ତି। ଡାବୁଗାଁର ବ୍ଲକର ୫ ଜଣଙ୍କ ମଧ୍ୟରୁ ୨ ଜଣ ସେପ୍ଟେମ୍ବର ୨୦୧୮ ଓ ଜାନୁୟାରୀ ୨୦୨୨ରୁ ୨ଜଣ ଶିକ୍ଷକ ଲମ୍ବା ଛୁଟିରେ ରହିଛନ୍ତି। ଝରିଗାଁ ବ୍ଲକର ଜଣେ ଶିକ୍ଷକ ମେ’ ୨୦୨୧ରୁ ଓ ଚନ୍ଦାହାଣ୍ଡି ବ୍ଲକର ଜଣେ ଶିକ୍ଷକ ଜାନୁୟାରୀ ୨୦୨୦ରୁ ଅନୁପସ୍ଥିତ। ୭ଜଣ ଶିକ୍ଷକଙ୍କୁ ନକଲି ସାର୍ଟିଫିକେଟ ଯାଞ୍ଚ ପରେ ଚାକିରିରୁ ବହିଷ୍କୃତ କରାଯାଇଛି। ଏହି ତଥ୍ୟ ଜିଲା ଶିକ୍ଷା ଅଧିକାରୀ ଗଣ ଶିକ୍ଷା ବିଭାଗ ତଥା ବ୍ରହ୍ମପୁର ଆଞ୍ଚଳିକ ଶିକ୍ଷା ନିର୍ଦ୍ଦେଶାଳୟକୁ ପ୍ରଦାନ କରିଛନ୍ତି। ତେବେ ଗଣ ଶିକ୍ଷା ବିଭାଗ ଅଧୀନରେ ଥିବା ମାଧ୍ୟମିକ ଶିକ୍ଷକଙ୍କ ଲମ୍ବାଛୁଟି ସମ୍ପର୍କରେ କୌଣସି ତଥ୍ୟ ପ୍ରଦାନ କରା ନ ଯିବାକୁ ନେଇ ସନ୍ଦେହ ପ୍ରକାଶ ପାଇଛି। ଜିଲା ଶିକ୍ଷା ବିଭାଗରେ ବାରମ୍ବାର ବିଭିନ୍ନ ତ୍ରୁଟିପୂର୍ଣ୍ଣ ତଥ୍ୟ ଓ ଛୁଟିରେ ଥିବା ଶିକ୍ଷକଙ୍କୁ ଦରମା ପ୍ରଦାନ କରାଯାଉଥିବା ଭଳି ଅଭିଯୋଗ ଆସୁଥିଲେ ମଧ୍ୟ ପ୍ରଶାସନ, ଜିଲା ଶିକ୍ଷା ଅଧିକାରୀ ଓ ତାଙ୍କ ଅଧୀନ କର୍ମଚାରୀ ଚୁପ୍ ରହୁଥିବାରୁ ଅସନ୍ତୋଷ ପ୍ରକାଶ ପାଇଛି। ଘଟଣା ସମ୍ପର୍କରେ ଡିଇଓ ପ୍ରଦୀପ ନାଗଙ୍କୁ ତାଙ୍କ ମୋବାଇଲ ନଂ. ୯୪୩୭୧୨୦୬୪୦ରେ ୨ଥର ଯୋଗାଯୋଗ କରିଥିଲେ ମଧ୍ୟ ସେ ଏହାର ଉତ୍ତର ଦେଇ ନ ଥିଲେ।
