ଦେବଗଡ,୨୭।୪(ଶଶାଙ୍କ ଶେଖର ଝାଙ୍କର):ଦେବଗଡ଼ସ୍ଥିତ ନୂତନ ଜିଲା ମୁଖ୍ୟ ଚିକିତ୍ସାଳୟରେ ଚାକିରି ଦେବା ନାଁରେ ଲକ୍ଷାଧିକ ଟଙ୍କା ଠକେଇ ଅଭିଯୋଗ ହୋଇଛି। ଏହି ଘଟଣାରେ ଆକାଉଣ୍ଟ ମ୍ୟାନେଜର ପରମେଶ୍ୱର ନାଏକଙ୍କୁ ଗିରଫ କରିଛି ଦେବଗଡ ପୋଲିସ । ୧୨ ଜଣ ଆଶାୟୀଙ୍କଠାରୁ ୧୫ ଲକ୍ଷ ୬୦ ହଜାର ଟଙ୍କା ଠକି ନିଆଯାଇଥିବା ଅଭିଯୋଗ ହୋଇଛି। ଆଟେଣ୍ଡାଣ୍ଟ, ଝାଡୁଦାର, ସୁପରଭାଇଜର ପଦବୀରେ ନିଯୁକ୍ତି ଦେବା ପାଇଁ ପରମେଶ୍ୱର ଟଙ୍କା ନେଇଥିଲେ। ଉକ୍ତ ଘଟଣାରେ ଆଉ କିଏ କିଏ ସାମିଲ ଅଛନ୍ତି ଦେଖିବାକୁ ବାକି ରହିଲା।
ସୂଚନାଯୋଗ୍ୟ, ଦେବଗଡ଼ସ୍ଥିତ ନୂତନ ଜିଲା ମୁଖ୍ୟ ଚିକିତ୍ସାଳୟରେ ଚାକିରି ଆଶାରେ କେତେଜଣ ଯୁବତୀଯୁବକ ଟଙ୍କା ଦେଇ ଚାକିରି ନ ପାଇ ହତାଶ ହୋଇପଡ଼ିଛନ୍ତି। ଏହି ଯୁବତୀଯୁବକମାନେ କେତେଜଣ ଅଧିକାରୀ, ବରିଷ୍ଠ ଡାକ୍ତର, ଦଲାଲଙ୍କୁ ଟଙ୍କା ଦେଇଥିବା ନିଜ ନାମ ଗୋପନ ରଖି କହିଛନ୍ତି। ଏବେ ସେମାନେ ଚାକିରି ନ ପାଇବାରୁ ଚାକିରି ପାଇଁ ଟଙ୍କା ଦେଇଥିବା କଥା ଆଲୋଚନା କରୁଛନ୍ତି। ଦେବଗଡ଼ ଏକ ଚାଷୀ ବହୁଳ, ଶିଳ୍ପ ବିହନ ଜିଲା। ପ୍ରାୟ ସମସ୍ତେ ଚାଷ ଉପରେ ନିର୍ଭର କରନ୍ତି। ଜିଲାରେ ବେକାର ଯୁବତୀଯୁବକ ସଂଖ୍ୟା ବଢ଼ି ଚାଲୁଥିବାବେଳେ ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଗାର୍ଡ, ଡାଟା ଏଣ୍ଟ୍ରି ଅପରେଟର ଆଦି କେତେକ ପଦବୀରେ ଚାକିରିରେ ରଖି ଦେବି କହି ଯୁବତୀ ଯୁବକମାନଙ୍କଠାରୁ ଟଙ୍କା ନେଇଥିବା କିଛି ଅଧିକାରୀ, ନେତା, ଦଲାଲ। ଜିଲାର କେତେଜଣ ବରିଷ୍ଠ ଅଧିକାରୀ ଆଉଟ ସୋର୍ସିଂ ସହିତ ହାତ ମିଳେଇ ଚାକିରି ଦେଇ କହି ନିଜ ପକେଟ ଗରମ କରୁଥିବା ଅଭିଯୋଗ ହେଉଛି। ଏହି ଅଧିକାରୀ ନୂତନ ଜିଲା ମୁଖ୍ୟ ଚିକିତ୍ସାଳରେ ମଧ୍ୟ ଚାକିରିରେ ରଖିଦେବା କଥା କହି ବେକାର ଯୁବତୀଯୁବକଙ୍କଠାରୁ ଟଙ୍କା ନେଇଛନ୍ତି।
ନୂତନ ଜିଲା ମୁଖ୍ୟ ଚିକିତ୍ସାଳୟ ଆରମ୍ଭଠାରୁ କେତେଜଣ ନେତା ଓ ପୁରୁଣା ଡାକ୍ତରଖାନାର ନିର୍ଦ୍ଦିଷ୍ଟ କେତେଜଣ ବରିଷ୍ଠ ଡାକ୍ତର ଯୁବତୀ ଯୁବକଙ୍କୁ ନର୍ସ, ଗାର୍ଡ, ଡାଟା ଏଣ୍ଟ୍ରି ଅପରେଟର ଆଦି ପଦବୀରେ ଚାକିରିରେ ରଖି ଦେବି କହି ଲକ୍ଷ ଲକ୍ଷ ଟଙ୍କା ନେଇଥିବାବେଳେ ଆଜିଯାଏ କାହାକୁ ଚାକିରିରେ ରଖି ନ ଥିବା ଅଭିଯୋଗ ହେଉଛି। ବର୍ତ୍ତମାନ ସେହି ଯୁବତୀଯୁବକ କେମିତି ଟଙ୍କା ଫେରିପାଇବେ ଚିନ୍ତାରେ ରହିଛନ୍ତି।
Dharitri – Odisha’s No.1 Odia Daily
