କୋରେଇ,୨୫ା୨(ଡି.ଏନ.ଏ.): ଯାଜପୁର ଜିଲା ପାଣିକୋଇଲିଠାରୁ ରାଜାମୁଣ୍ଡା ପର୍ଯ୍ୟନ୍ତ ଯାଇଥିବା ଜାତୀୟ ରାଜପଥ ୨୦ର କୋରେଇ ଥାନା ଅନ୍ତର୍ଗତ ଲକ୍ଷ୍ମୀନଗର ଛକ ନିକଟ ଡାଇଭର୍ସନରେ ଦୁର୍ଘଟଣା ବଢ଼ି ଚାଲିଛି। ଏଠାରେ ପଥଚାରୀଙ୍କ ସୁରକ୍ଷା ପ୍ରତି ଧ୍ୟାନ ଦିଆ ନ ଯିବା କାରଣରୁ ଏଭଳି ପରସ୍ଥିତି ସୃଷ୍ଟି ହୋଇଛି।
ଗୁରୁବାର କେନ୍ଦୁଝର ଜିଲା ରାମଚନ୍ଦ୍ରପୁର ଥାନା ଅଳତୀ ଗ୍ରାମର ବିଶ୍ବନାଥ ସେଠୀ ଓ ଶୁକଦେବ ରାଉଳ ଯାଜପୁର ରୋଡ୍ରୁ ବାଇକରେ ଘରକୁ ଫେରୁଥିଲେ। ଏତିକିବେଳେ ଡାଇଭର୍ସନଠାରେ ପଛରୁ ଆସୁଥିବା ଏକ ବୋଲର ଧକ୍କା ଦେବାରୁ ଉଭୟ ଛିଟିକି ପଡ଼ିଥିଲେ। ବିଶ୍ୱନାଥଙ୍କ ଗୋଡହାତ ଖଣ୍ଡିଆ ଖାବରା ହେବା ସହିତ ମୁଣ୍ଡରେ ଆଘାତ ଲାଗିଥିବାରୁ ତାଙ୍କୁ ତୁରନ୍ତ ମେଡିକାଲ ନିଆଯାଇଥିଲା। ପ୍ରତ୍ୟକ୍ଷଦର୍ଶିଙ୍କ କହିବା ଅନୁଯାୟୀ, ବୋଲରଟି ଧକ୍କା ଦେଇ ଚାଲି ଯାଇଥିଲା। ରେଙ୍ଗାଲିରୁ କେନାଲ ଯୋଗେ ପାଣି ଆସିବା ପାଇଁ କେନାଲ କାର୍ଯ୍ୟ ଚାଲୁଛି। ସେହିପରି ୬ମାସରୁ ଅଧିକ ହେବ ଏହି ଛକର ଜାତୀୟ ରାଜପଥ ଉପରେ ପୋଲ ନିର୍ମାଣ ହେଉଛି। ତେଣୁ ନିର୍ମାଣ କାର୍ଯ୍ୟ ଚାଲୁଥିବା ରାସ୍ତା ପାର୍ଶ୍ୱକୁ ବନ୍ଦ କରାଯାଇ ଅନ୍ୟ ପଟରେ ଗାଡି ଚଳାଚଳ କରୁଛି। ଗାଡ଼ିଗୁଡ଼ିକ ଏ ପଟରୁ ସେପଟକୁ ଯିବା ପାଇଁ ଡାଇଭର୍ସନ ନିର୍ମାଣ କରାଯାଇଛି। କିନ୍ତୁ ପରିତାପର ବିଷୟ ଏହି ଡାଇଭର୍ସନ ନିକଟରେ ପଥଚାରୀଙ୍କ ପାଇଁ କୌଣସି ସୁରକ୍ଷା ବ୍ୟବସ୍ଥା ନାହିଁ। ଏଠାରେ କୌଣସି ଟ୍ରାଫିକ କି ଲାଇଟ ବ୍ୟବସ୍ଥା ମଧ୍ୟ କରାଯାଇ ନାହିଁ। ଆଗରୁ ଟ୍ରାଫିକ ପାଇଁ ଦୁଇ ସ୍ଥାନୀୟ ପିଲା କାମ କରୁଥିଲା ବେଳେ ଏବେ ସେମାନଙ୍କ ଦେଖା ମିଳୁନାହିଁ। ଯେଉଁ ହମ୍ପସ କରାଯାଇଥିଲା ସେସବୁ ନଷ୍ଟ ହୋଇଗଲାଣି। ଚିପସ, ବାଲି, ଏଣେତେଣେ ପଡିଛି। ଫଳରେ ପୋଲ ନିର୍ମାଣ ଅଞ୍ଚଳରେ ପଥଚାରୀଙ୍କ ଧନ ଜୀବନ ପ୍ରତି ବିପଦ ସୃଷ୍ଟି ହେଉଛି।
୪ମାସ ତଳେ ଏହି ଡାଇଭର୍ସନ ନିକଟରେ ଏକ ଟ୍ରଲର ସହିତ କେନ୍ଦୁଝର ଜିଲା ଘଷିପୁରା ଥାନା ବସନ୍ତପୁରା ଗ୍ରାମର କାଳନ୍ଦୀ ଚରଣ ସାହୁ(୫୩)ଙ୍କ ବାଇକ୍ ଧକ୍କା ହେବାରୁ ତାଙ୍କର ମୃତ୍ୟୁହୋଇଥିବା ବେଳେ ସ୍ତ୍ରୀ ସାବିତ୍ରୀଙ୍କ ଅବସ୍ଥା ସଙ୍କଟାପନ୍ନ ହୋଇଥିଲା। ପ୍ରତିଦିନ ଏହି ସ୍ଥାନରେ ଛୋଟ ମୋଟ ଦୁର୍ଘଟଣା ଘଟୁଥିଲେ ମଧ୍ୟ ଜଳ ସମ୍ପଦ ବିଭାଗ କିମ୍ବା ଏନ୍ଏଚ୍ଏଆଇ କର୍ତ୍ତୃପକ୍ଷ ଏଥିପ୍ରତି କୌଣସି ଦୃଷ୍ଟି ନ ଦେବା ବିଡମ୍ବନାର ବିଷୟ ହୋଇଛି, ଯାହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଉଛି। ରାସ୍ତା ଦେଇ ଅନେକ ଉଚ୍ଚପଦସ୍ଥ ଅଧିକାରୀ ଯାଉଥିଲେ ମଧ୍ୟ ଏସବୁ ପ୍ରତି କାହାର ଧ୍ୟାନ ନାହିଁ। ସ୍ଥାନୀୟ ଲୋକମାନେ ବାରମ୍ବାର ଅଭିଯୋଗ କଲେ ମଧ୍ୟ ନିର୍ମାଣାଧୀନ ଠିକାସଂସ୍ଥା କି ବିଭାଗୀୟ ଅଧିକାରୀ ଏଥିପ୍ରତି କର୍ଣ୍ଣପାତ କରୁନାହାନ୍ତି। ସେହିପରି ପୋଲ କାମରେ ନିୟୋଜିତ ଶ୍ରମିକମାନେ କୌଣସି ସେଫ୍ଟି କିଟ ବ୍ୟବହାର କରୁ ନ ଥିବା ଦେଖାଯାଉଛି। ତେଣୁ ଏଥିପ୍ରତି ଧ୍ୟାନ ଦିଆଯିବା ସହିତ ପଥଚାରୀଙ୍କ ସୁରକ୍ଷା ପ୍ରତି ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ପ୍ରଶାସନ ନିକଟରେ ଦାବି ହୋଇଛି।
