ଭୁବନେଶ୍ୱର/ଯାଜପୁର ଅଫିସ,୨୬।୧: ଓଡ଼ିଶାରେ ୨୦୨୦ ସୁଦ୍ଧା ସଡ଼କ ଦୁର୍ଘଟଣାଜନିତ ମୃତ୍ୟୁହାର ୫୦ ପ୍ରତିଶତ ହ୍ରାସ କରିବାକୁ ସୁପ୍ରିମକୋର୍ଟ ପକ୍ଷରୁ ଗଠିତ କମିଟି ନିର୍ଦ୍ଦେଶ ଦେଇଥିଲେ। ହେଲେ ସିଆଇଡି ଏବଂ କ୍ରାଇମବ୍ରାଞ୍ଚ ପକ୍ଷରୁ ମିଳିଥିବା ତଥ୍ୟ ଅନୁସାରେ ଗତ ଅକ୍ଟୋବର ସୁଦ୍ଧା ରାଜ୍ୟରେ ୧୨.୦୨% ଦୁର୍ଘଟଣା ମୃତ୍ୟୁହାର ବଢ଼ିଛି। ଏଥିରେ ନୂଆପଡ଼ା ଜିଲା ଶୀର୍ଷରେ (୪୦.୭୪%) ରହିଥିବାବେଳେ ଦ୍ୱିତୀୟରେ ଗଜପତି ଓ ରାୟଗଡ଼ା ଜିଲାରେ(୪୦%) ମୃତ୍ୟୁହାର ବୃଦ୍ଧି ପାଇଛି। ସୋନପୁର ଜିଲାରେ ୨୧% ଦୁର୍ଘଟଣାଜନିତ ମୃତ୍ୟୁହାର ହ୍ରାସ ପାଇ ରେକର୍ଡ ସୃଷ୍ଟି ହୋଇଛି। ତେବେ ଶିଳ୍ପ ଓ ଖଣି ସମୃଦ୍ଧ ଝାରସୁଗୁଡ଼ା, ଯାଜପୁର, ସୁନ୍ଦରଗଡ଼, ସମ୍ବଲପୁର, ଅନୁଗୋଳ, ଢେଙ୍କାନାଳ ଓ କେନ୍ଦୁଝର ଜିଲାରେ ମଧ୍ୟ ମୃତ୍ୟୁହାର ବୃଦ୍ଧି ପାଇବା ଚିନ୍ତାର କାରଣ ହୋଇଛି। ଏନେଇ ରାଜ୍ୟ ସରକାରଙ୍କ ବାଣିଜ୍ୟ ଓ ପରିବହନ ବିଭାଗ ପ୍ରମୁଖ ସଚିବ ବିଷ୍ଣୁପଦ ସେଠୀ ମଙ୍ଗଳବାର ସମସ୍ତ ଜିଲାପାଳ, ଏସ୍ପି, ଭୁବନେଶ୍ୱର ଓ କଟକ ଡିସିପି, କମିଶନରେଟ ପୋଲିସ(ଟ୍ରାଫିକ୍), ଆର୍ଟିଓଙ୍କୁ ଟ୍ରାଫିକ ନିୟମ ଉଲ୍ଲଂଘନକାରୀ, ଦ୍ରୁତ ଗାଡ଼ିଚାଳନା, ରାସ୍ତାପାର୍ଶ୍ୱ ପାର୍କିଂ ଇତ୍ୟାଦି ଉପରେ କାର୍ଯ୍ୟାନୁଷ୍ଠାନ ପାଇଁ ପ୍ରତି ଜିଲାରେ ଆର୍ଟିଓ ଏବଂ ପୋଲିସ ମିଶି ଯୁଗ୍ମ ଏନ୍ଫୋର୍ସମେଣ୍ଟ ସ୍କ୍ବାଡ୍ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି।
ଦେଶରେ ଓଡ଼ିଶା ଦୁର୍ଘଟଣାଜନିତ ମୃତ୍ୟୁରେ ୧୬ରୁ ୧୨ ର଼୍ୟାଙ୍କ୍କୁ ବୃଦ୍ଧି ହୋଇ ବଦନାମ ଆଣି ସାରିଛି। ସଡ଼କ ଦୁର୍ଘଟଣାକୁ ହ୍ରାସ କରିବାକୁ ଜଣେ ଅବସରପ୍ରାପ୍ତ ବିଚାରପତିଙ୍କ ନେତୃତ୍ୱରେ ସୁପ୍ରିମକୋର୍ଟ ପକ୍ଷରୁ ସଡ଼କ ସୁରକ୍ଷା ଉପରେ ଏକ କମିଟି ଗଠନ ହୋଇଛି। ହେଲେ କମିଟି ନିର୍ଦ୍ଦେଶକୁ କେହି ଉପଯୁକ୍ତ ଭାବେ ପାଳନ କରୁ ନ ଥିବାରୁ ଦୁର୍ଘଟଣା ସଂଖ୍ୟା ହ୍ରାସ ପାଇବା ବଦଳରେ ବୃଦ୍ଧି ଘଟିଛି। ରିପୋର୍ଟ ଅନୁସାରେ ଓଡ଼ିଶାରେ ୨୦୧୪ରେ ୩,୯୩୧ଜଣଙ୍କ ମୃତ୍ୟୁ ହୋଇଥିବାବେଳେ ୨୦୧୯ରେ ମୃତ୍ୟୁ ସଂଖ୍ୟା ୪,୭୩୮ରେ ପହଞ୍ଚତ୍ଥିଲା, ଯାହାକି ମୃତ୍ୟୁସଂଖ୍ୟା ୨୧% ବୃଦ୍ଧି ପାଇଥିଲା। ପରେ ୨୦୨୦ ପ୍ରଥମ ୪ ମାସ(ଜାନୁୟାରୀ-ଏପ୍ରିଲ) ଅପେକ୍ଷା ୨୦୨୧ର ଜାନୁୟାରୀ-ଏପ୍ରିଲ ସଡ଼କ ଦୁର୍ଘଟଣାରେ ମୃତ୍ୟୁସଂଖ୍ୟା ୨୭.୬୦% ବୃଦ୍ଧି ହୋଇଥିଲା। ଏହି ତାଲିକାରେ ମାଲକାନଗିରି ପ୍ରଥମ ଓ ଜଗତ୍ସିଂହପୁର ଦ୍ୱିତୀୟ ଏବଂ ଯାଜପୁର ଜିଲା ତୃତୀୟ ସ୍ଥାନରେ ରହିଥିଲା। ଅନୁରୂପ ଭାବେ ୨୦୨୦ (ଜାନୁୟାରୀ-ଅକ୍ଟୋବର)ରେ ୭,୬୧୯ ଦୁର୍ଘଟଣା ହୋଇଥିଲାବେଳେ ୩,୬୩୭ ମୃତ୍ୟୁ ଓ ୬,୯୭୭ ଆହତ ହୋଇଥିଲେ। ୨୦୨୧(ଜାନୁୟାରୀ-ଅକ୍ଟୋବର)ରେ ୮,୯୨୨ ଦୁର୍ଘଟଣାରେ ୪,୦୭୪ ମୃତ୍ୟୁ ଓ ୮,୦୮୭ ଆହତ ହୋଇଥିଲେ। ଏହି ସମୟରେ ଦୁର୍ଘଟଣାଜନିତ ମୃତ୍ୟୁହାରକୁ ଅବଲୋକନ କଲେ ପୁରୀ, ନୟାଗଡ଼, କୋରାପୁଟ, ଦେବଗଡ଼, କେନ୍ଦ୍ରାପଡ଼ା ଓ ସୋନପୁର ଜିଲାରେ ମୃତ୍ୟୁହାରକୁ ସାମାନ୍ୟ ହ୍ରାସ କରାଯାଇ ପାରିଛି। ଅନ୍ୟପକ୍ଷେ ନୂଆପଡ଼ା, ଗଜପତି, ରାୟଗଡ଼ା, ଜଗତ୍ସିଂହପୁର (୩୩.୮୭%), ବୌଦ୍ଧ(୩୨.୦୮%), ମାଲକାନଗିରି (୨୮.୮୯%), ଝାରସୁଗୁଡ଼ା(୨୮.୫୭%), ମୟୂରଭଞ୍ଜ(୨୬.୬୦%), ଭଦ୍ରକ (୨୬.୫୮%), ଯାଜପୁର(୨୫.୬୪%), କନ୍ଧମାଳ(୨୩.୦୮%), ବରଗଡ଼ରେ (୨୧.୮୮%) ବୃଦ୍ଧି ପାଇଛି। ସେହିପରି କଟକରେ(୧୬.୭୪%), ବାଲେଶ୍ୱର(୧୫.୦୯%), ଖୋର୍ଦ୍ଧା (୧୩.୬୧%), ବଲାଙ୍ଗୀର(୧୧.୧୧%), ସୁନ୍ଦରଗଡ଼(୯.୮୬%), ଢେଙ୍କାନାଳ (୬.୫୬%), ସମ୍ବଲପୁର(୬.୨୯%), କଳାହାଣ୍ଡି(୫.୯୮%), ଅନୁଗୋଳ(୪.୮୬%), ନବରଙ୍ଗପୁର(୪.୭୧%), ଗଞ୍ଜାମରେ(୩.୩୮%), କେନ୍ଦୁଝରରେ(୨.୫୯%) ବଢ଼ିଛି। ଅପରପକ୍ଷରେ ପୁରୀରେ (୧.୦୨%), ନୟାଗଡ଼(୧.୪୧%), କୋରାପୁଟ(୩.୧୩%), ଦେବଗଡ଼(୪.୭୬%), କେନ୍ଦ୍ରାପଡ଼ା(୬.୮୨%), ସୋନପୁର(୨୧.୪୩%) ମୃତ୍ୟୁହାର ହ୍ରାସ ପାଇଛି। ଏହି କ୍ରମରେ ରାଜ୍ୟ ସରକାରଙ୍କ ବାଣିଜ୍ୟ ଏବଂ ପରିବହନ ବିଭାଗ ତପତ୍ରତା ପ୍ରକାଶ କରି ଜିଲା ସଡ଼କ ସୁରକ୍ଷା କମିଟି(ଡିଆର୍ଏସ୍ସି)ର ନିୟମିତ ବୈଠକ କରି ଆବଶ୍ୟକ ପ୍ରତିକାର ବ୍ୟବସ୍ଥା ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି।
ରାଜ୍ୟର ଖଣି ଓ ଶିଳ୍ପ ସମୃଦ୍ଧ ଜିଲାଗୁଡ଼ିକରେ ଓଭରଲୋଡିଂ ଗାଡ଼ି ଚଳାଚଳ ବୃଦ୍ଧି ପାଇବାରେ ଲାଗିଛି। କେତେକ ଜିଲାରେ ନକଲି ଟ୍ରାନ୍ଜିଟ୍ ପାସ୍ରେ କ୍ଷମତାଠାରୁ ଅଧିକ ପଥର ଓ ବାଲି ଚାଲାଣ ହେଉଛି। ଭିଡ଼ ସମୟରେ ଖଣି ପରିବହନ ହେଉଥିବାରୁ ଲୋକଙ୍କ ଜୀବନ ପ୍ରତି ବିପଦ ହେଉଛି। ଏହି କାରବାରରେ ପୋଲିସ ଓ ପରିବହନ ବିଭାଗର କେତେଜଣ ଅଧିକାରୀଙ୍କ ପକେଟ୍ ଗରମ ହେଉଥିବାବେଳେ ସାଧାରଣ ଲୋକଙ୍କ ଜୀବନ ଯାଉଥିବା ମତ ପ୍ରକାଶ ପାଇଛି।