ନୂଆଦିଲ୍ଲୀ,୨୯।୬: ଭାରତୀୟ ରେଲଓ୍ବେ ତା’ର ଶୀତତାପ ନିୟନ୍ତ୍ରିତ(ଏସି) ଟ୍ରେନ ଗୁଡିକରେ ଅପରେଶନ ଥିଏଟର(ଓଟି)ରେ ଉପଲବ୍ଧ ହେଉଥିବା ନିର୍ମଳ ବାୟୁ ସୁବିଧା ପ୍ରଦାନ କରିବ। ବର୍ତ୍ତମାନ ବ୍ୟବହାର ହେଉଥିବା ସର୍କୁଲେଟେଡ ଏୟାର ସୁବିଧା ପରିବର୍ତ୍ତେ ନୂଆ ବ୍ୟବସ୍ଥା ଲାଗୁ କରାଇବା ନେଇ ନିଷ୍ପତ୍ତି ହୋଇଛି। ପୂର୍ବ ବ୍ୟବସ୍ଥା ଦ୍ୱାରା କରୋନା ବ୍ୟାପିବାର ସମ୍ଭାବନା ରହିଥିବାରୁ ଏଭଳି ଯୋଜନା ହାତକୁ ନିଆଯାଉଛି ବୋଲି ରେଲଓ୍ବେର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ମେ ୧୨ରୁ ପରୀକ୍ଷଣ ଭିତ୍ତିରେ ରାଜଧାନୀ ଏକ୍ସପ୍ରେସ ରୁଟର ୧୫ ଯୋଡା ଏସି ଟ୍ରେନରେ ନୂଆ ବ୍ୟବସ୍ଥାକୁ କାର୍ଯ୍ୟକାରୀ କରାଯାଇଛି। ରୁଫ୍ ମାଉଣ୍ଟେଡ ଏସି ପ୍ୟାକେଜ ୟୁନିଟ(ଆର୍ଏମ୍ପିୟୁ) ସିଷ୍ଟମ ଦ୍ୱାରା ଉକ୍ତ ସେବା ଯୋଗାଇ ଦିଆଯିବ। ଓଟି ଭଳି ପ୍ରତି ଘଣ୍ଟାରେ ୧୬ରୁ ୧୮ଥର ଟ୍ରେନ କୋଚ୍ର ବାୟୁକୁ ପରିବର୍ତ୍ତନ କରିବା ସହ ସ୍ବଚ୍ଛ ପରିବେଶ ଯୋଗାଣରେ ଏହା ସହାୟକ ହେବ ବୋଲି ଅଧିକାରୀ ଜଣକ କହିଛନ୍ତି। ପୂର୍ବରୁ ଏସି କୋଚ ଗୁଡିକରେ ଘଣ୍ଟାକୁ ୬ରୁ ୮ଥର ବାୟୁର ପରିବର୍ତ୍ତନ ହୋଇପାରୁଥିଲା। ଏହା ଦ୍ୱାରା ମାତ୍ର ୨୦% ସ୍ବଚ୍ଛ ବାୟୁ ମିଳି ପାରୁ ଥିବା ବେଳେ ବ୍ୟବହୃତ ବାୟୁର ଭାଗ ୮୦% ରହିଥିଲା। ଯାତ୍ରୀଙ୍କ ସୁରକ୍ଷାକୁ ଧ୍ୟାନରେ ରଖି ଏଭଳି ଯୋଜନା ହାତକୁ ନିଆଯାଇଛି। ସଂକ୍ରମଣକୁ ରୋକିବା ଲକ୍ଷ୍ୟରେ ମନ୍ତ୍ରଣାଳୟ ପକ୍ଷରୁ ସ୍ବତନ୍ତ୍ର ଗାଇଡଲାଇନ ଜାରି ସହ କୋଚ୍ଗୁଡିକୁ ଆଇସୋଲେଶନ ଓ୍ବାର୍ଡରେ ପରିଣତ କରାଯାଇଛି।
