ପୁଣେ,୫।୩: ଶିବସେନା (ୟୁବିଟି) ରାଜ୍ୟ ସଭା ସଦସ୍ୟ ସଞ୍ଜୟ ରାଉତ କଶ୍ମୀରୀ ପଣ୍ଡିତ ହତ୍ୟା ପ୍ରସଙ୍ଗରେ ଭାଜପାକୁ ଟାର୍ଗେଟ୍ କରିଛନ୍ତି। ନରେନ୍ଦ୍ର ମୋଦି ସରକାରଙ୍କ ଦ୍ୱାରା ଜମ୍ମୁ କଶ୍ମୀରରେ ଧାରା ୩୭୦ ରଦ୍ଦ କେବଳ କାଗଜରେ ଥିଲା ଏବଂ ଭାରତୀୟ ଜନତା ପାର୍ଟି (ଭାଜପା) ର ରାଜନୈତିକ ସ୍ବାର୍ଥ ପାଇଁ କାର୍ଯ୍ୟ କରାଯାଇଥିବା ରାଉତ ଅଭିଯୋଗ କରିଛନ୍ତି।
ପାର୍ଟି ମୁଖପାତ୍ର ‘ସାମ୍ନା’ର ରୋକଟୋକ ସ୍ତମ୍ଭରେ ରାଉତ କହିଛନ୍ତି, ଏହି ପଦକ୍ଷେପ ସତ୍ତ୍ୱେ କଶ୍ମୀର ପଣ୍ଡିତମାନେ ସେମାନଙ୍କର ଅଧିକାର ପାଇ ନାହାଁନ୍ତି ଏବଂ ଭାଜପା ନେତାଙ୍କ ପାଖରେ ସେମାନଙ୍କ ସମସ୍ୟାର କୌଣସି ଉତ୍ତର ନାହିଁ। ନିକଟରେ ପୁଲୱାମାରେ ଆତଙ୍କବାଦୀମାନେ କଶ୍ମୀରୀ ପଣ୍ଡିତଙ୍କୁ ହତ୍ୟା କରିଥିଲେ, କିନ୍ତୁ ଭାଜପା ଦିଲ୍ଲୀର ଉପମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟି ନେତା ମନୀଷ ସିସୋଡିଆଙ୍କୁ ଏକ ଅବକାରୀ ଦୁର୍ନୀତିରେ ଗିରଫ କରି କଶ୍ମୀରୀ ପଣ୍ଡିତଙ୍କ ହତ୍ୟା ଉପରେ ଲୋକଙ୍କ ଧ୍ୟାନ ହଟାଇ ଦେଇଥିଲା।
ରାଉତ ଆହୁରି ମଧ୍ୟ କହିଛନ୍ତି, ଜମ୍ମୁ କଶ୍ମୀର ଭାରତର ଏକ ଅବିଚ୍ଛେଦ୍ୟ ଅଙ୍ଗ ଥିଲା ଏବଂ ରହିବ। ଧାରା ୩୭୦ର ଅଧିକାଂଶ ବ୍ୟବସ୍ଥା କେବଳ କାଗଜରେ ରଦ୍ଦ କରାଯାଇଛି ଏବଂ ଏହା ଭାଜପାର ରାଜନୈତିକ ସ୍ବାର୍ଥ ପୂରଣ ପାଇଁ କରାଯାଇଛି।
