ପାରଳାଖେମୁଣ୍ଡି,୯ା୨(ଡି.ଏନ୍.ଏ.):ଗଜପତି ଜିଲା ସଦର ମହକୁମା ପାରଳାଖେମୁଣ୍ଡିର ଯୁକ୍ତ ୨(କଳା) ପ୍ରଥମ ବର୍ଷର ଛାତ୍ର ଅଭିନନ୍ଦନ ଡି.ଲାଲ୍କୁମାର ୮ସେକେଣ୍ଡରେ ୨୮ ରାଜ୍ୟର ନାମ କହି ଇଣ୍ଡିଆ ବୁକ୍ ଅଫ୍ ରେକର୍ଡସରେ ସ୍ଥାନ ପାଇଛନ୍ତି। ପାରଳାଖେମୁଣ୍ଡି ସହର କାବିଟି ସାହି ନିବାସୀ ଅଭିନନ୍ଦନ ସ୍ଥାନୀୟ ଶ୍ରୀକୃଷ୍ଣଚନ୍ଦ୍ର ଗଜପତି ଉଚ୍ଚ ମାଧ୍ୟମିକ ବିଦ୍ୟାଳୟରେ ପଢ଼ୁଛନ୍ତି। ସେ ଅନ୍ଲାଇନ ମାଧ୍ୟମରେ ରେକର୍ଡ ସ୍ଥାପନ ପାଇଁ ପ୍ରତିଯୋଗିତାରେ ଭାଗ ନେଇଥିଲେ। ସେଥିରେ ସଫଳ ହେବାରୁ ଇଣ୍ଡିଆ ବୁକ ଅଫ୍ ରେକର୍ଡସ ପକ୍ଷରୁ ମୁଖ୍ୟ ସମ୍ପାଦକ ବିଶ୍ୱରୂପ ରାୟଚୌଧୁରୀ ତାଙ୍କୁ ପ୍ରମାଣପତ୍ର, ସିଲ୍ଡ୍ ଓ ପଦକ ଡାକ ଯୋଗେ ପଠାଇଛନ୍ତି। ସଫଳତା ପାଇଁ ଅଭିନନ୍ଦନ ତାଙ୍କ ମା’, ବାପାଙ୍କୁ ଶ୍ରେୟ ଦେଇଛନ୍ତି। ବିଭିନ୍ନ ମହଲରୁ ତାଙ୍କୁ ଶୁଭେଚ୍ଛା ମିଳିଛି।
