ନିରାକାରପୁର,୧୩।୭(ଡି.ଏନ୍.ଏ.): ଖୋର୍ଦ୍ଧା ଜିଲା ଜଙ୍କିଆ ଥାନା ଅଧୀନ ମଳିପଡ଼ା ଅଞ୍ଚଳରୁ ଅପହୃତ ଜଣେ ଯୁବକଙ୍କୁ ଗୁରୁତର ଅବସ୍ଥାରେ ରବିବାର ଅପରାହ୍ନରେ ପୋଲିସ ଜଟଣୀ ଥାନା ହରିରାଜପୁର ନିକଟ ଏକ ଜଙ୍ଗଲରୁ ଉଦ୍ଧାର କରିଛି। ସେ ହେଲେ ମଳିପଡ଼ା ଗ୍ରାମର ସତ୍ୟନାରାୟଣ ବେହେରା। ଏହି ଘଟଣାରେ ପୋଲିସ ୩ଜଣ ଅପହରଣକାରୀଙ୍କୁ ଗିରଫ କରି ସୋମବାର କୋର୍ଟଚାଲାଣ କରିଛି। ଅଭିଯୁକ୍ତମାନେ ହେଲେ ଖୋର୍ଦ୍ଧା ଟାଉନ ଥାନା ଅଧୀନ ଭାଲିଆବାଡିର ସୁଶିଲ ବଳିୟାରସିଂହ, ସଦର ଥାନା ବାରଘରପାଟଣାର ଶିବସୁନ୍ଦର ଦାଶ ଓ ଜଟଣୀ ଥାନା ଅରଗୁଳର ଆଦିତ୍ୟ ସାହୁ। ଏମାନଙ୍କ ନିକଟରୁ ଏକ କାର୍ ଜବତ ହୋଇଛି। ତେବେ ଏହି ଘଟଣାର ମୁଖ୍ୟ ଅଭିଯୁକ୍ତ ଫେରାର ଥିବା ପୋଲିସ କହିଛି।
ପୋଲିସ ସୂଚନା ମୁତାବକ, ସତ୍ୟନାରାୟଣ ମଳିପଡ଼ା ଅଞ୍ଚଳର ରସାନନ୍ଦ କଳସଙ୍କ ପାଖରେ ରହି ଖଣି କାମ ବୁଝାଶୁଝା କରୁଥିଲେ। ତେବେ କୌଣସି କାରଣକୁ ନେଇ ସତ୍ୟନାରାୟଣଙ୍କୁ ରବିବାର ସକାଳେ ଦେଉଳଟାଙ୍ଗୀର ସୂର୍ଯ୍ୟ ଖଣ୍ଡି ଓ ତା’ର ସହଯୋଗୀମାନେ ଏକ କାରରେ ଅପହରଣ କରିନେଇଥିଲେ। ତେବେ ସତ୍ୟନାରାୟଣଙ୍କୁ ଛାଡ଼ିବା ପାଇଁ ଅପହରଣକାରୀମାନେ ୫ଲକ୍ଷ ଟଙ୍କା ଦାବି କରୁଥିଲେ ବୋଲି ରସାନନ୍ଦ ଥାନାରେ ଅଭିଯୋଗ କରିଥିଲେ। ଏନେଇ ଥାନାରେ ଏକ ମାମଲା (ନଂ.୧୪୬/୨୧) ରୁଜୁ ହୋଇଥିଲା। ଏହା ପରେ ଏସ୍ପି ରାଜକିଶୋର ଦୋରାଙ୍କ ନିର୍ଦ୍ଦେଶକ୍ରମେ ଜଙ୍କିଆ ଆଇଆଇସିଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇ ବିଭିନ୍ନ ସ୍ଥାନରେ ଚଢ଼ାଉ କରାଯାଇଥିଲା। ଜଟଣୀ ଥାନା ହରିରାଜପୁର ନିକଟରେ ଥିବା ଏକ ଜଙ୍ଗଲରେ ଏହି ଟିମ୍ ଜଟଣୀ ପୋଲିସ ସହାୟତାରେ ଚଢ଼ାଉ କରି ସତ୍ୟନାରାୟଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିଥିଲା। ଏଥିସହ ପୋଲିସ ୩ ଅପହରଣକାରୀଙ୍କୁ ଧରିବା ସହ ଏକ କାର(ଓଡି୦୫ ଏବି ୮୯୭୯) ଜବତ କରିଥିଲା। କିନ୍ତୁ ଘଟଣାସ୍ଥଳରୁ ମୁଖ୍ୟ ଅଭିଯୁକ୍ତ ଫେରାର ହୋଇଯାଇଥିଲା। ସୂଚନାଯୋଗ୍ୟ, ସୂର୍ଯ୍ୟ ଖଣ୍ଡି ଓ ତା’ର ସହଯୋଗୀମାନେ ପୂର୍ବରୁ ରସାନନ୍ଦଙ୍କ ଅଫିସରୁ ୧ଲକ୍ଷ ୫୦ହଜାର ଟଙ୍କା ଓ ଦୁଇଟି ବାଇକ୍ ଡକାୟତି କରିନେଇଥିଲେ। ଏନେଇ ରସାନନ୍ଦଙ୍କ ଅଭିଯୋଗକୁ ଭିତ୍ତିକରି ପୋଲିସ ଏକ ମାମଲା (ନଂ.୩୨/୨୧) ରୁଜୁକରି ସୂର୍ଯ୍ୟ ଓ ତା’ର ସହଯୋଗୀମାନଙ୍କୁ ଗିରଫ କରିଥିଲା। ତେବେ ୧୫ଦିନ ପୂର୍ବେ ଅଭିଯୁକ୍ତମାନେ ଜେଲରୁ ଆସିବା ପରେ ଏଭଳି ଘଟଣା ଘଟାଇଛନ୍ତି ବୋଲି ପୋଲିସ କହିଛି।
