ନୂଆଦିଲ୍ଲୀ,୨୮।୧୧ : ଦିଲ୍ଲୀ ମ୍ୟୁନିସିପାଲିଟି କର୍ପୋରେଶନ (ଏମସିଡି) ନିର୍ବାଚନ ପୂର୍ବରୁ ଅଲ ଇଣ୍ଡିଆ ମୁସଲିମ ଇତେହାଦୁଲ ମୁସଲିମନ (ଏଆଇଏମଆଇଏମ) ମୁଖ୍ୟ ଅସଦୁଦ୍ଦିନ ଓୱାଇସି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ଆମ ଆଦମୀ ପାର୍ଟି (ଏଏପି)କୁ କଟାକ୍ଷ କରି ଏହାକୁ ଏକ ଛୋଟ ରିଚାର୍ଜ ବୋଲି କହିଛନ୍ତି। ଡିସେମ୍ବର ୪ ରେ ଅନୁଷ୍ଠିତ ହେବାକୁ ଥିବା ଏମସିଡି ନିର୍ବାଚନରେ ସେଲାମପୁରରୁ ଏଆଇଏମଆଇଏମ ପ୍ରାର୍ଥୀଙ୍କ ପାଇଁ ପ୍ରଚାର କରି ଓୱାଇସି ଅଭିଯୋଗ କରିଛନ୍ତି ଯେ ଦିଲ୍ଲୀ ମୁଖ୍ୟମନ୍ତ୍ରୀ ମୁସଲମାନମାନଙ୍କୁ ବଦନାମ କରିଛନ୍ତି ଏବଂ ସେ ହେଉଛନ୍ତି ୨୦୧୩ର ନରେନ୍ଦ୍ର ମୋଦି। କେଜରିଓ୍ବାଲ ମୋଦିଙ୍କର ସମସ୍ତ ରେକର୍ଡ ଭାଙ୍ଗିବାକୁ ଚାହୁଁଛନ୍ତି। କେଜରିୱାଲ ଦଙ୍ଗା ସମୟରେ ନିଖୋଜ ହୋଇଯାଇଥିଲେ। ଯେତେବେଳେ ସେ ଶାହିନ ବାଗରେ ବିକ୍ଷୋଭକାରୀଙ୍କ ବିରୋଧରେ ନାଗରିକତ୍ୱ ସଂଶୋଧନ ଅଧିନିୟମ (ସିଏଏ) ବିରୋଧରେ କହିଥିଲେ।
ଏଆଇଏମଆଇଏମ ମୁଖ୍ୟ କହିଛନ୍ତି ଯେ ଯେତେବେଳେ ଲୋକମାନେ କରୋନା ସହିତ ଲଢ଼ୁଥିଲେ, ଅମ୍ଳଜାନ ଏବଂ ଡାକ୍ତରଖାନା ଶଯ୍ୟା ପାଇଁ ଲୋକେ ସଙ୍କଟରେ ପଡ଼ିଥିଲେ ସେତେବେଳେ ଦିଲ୍ଲୀ ମୁଖ୍ୟମନ୍ତ୍ରୀ ତବଲିଗ ଜମାତ କାରଣରୁ କରୋନା ସଂକ୍ରମଣ ବିସ୍ତାର କରୁଥିବା କହିଥିଲେ। ସେ ଏହାଦ୍ୱାରା ତବଲିଗ ଜମାତକୁ ଅପମାନିତ କରିଥିଲେ। ସେ କହିଛନ୍ତି ଯେ ଦିଲ୍ଲୀର କୋଭିଡ ମାମଲାର ତାଲିକାରେ ତବଲିଗ ଜମାତ ସଦସ୍ୟଙ୍କୁ ସୁପର ସ୍ପ୍ରେଡର୍ ବୋଲି ଅଭିଯୋଗ ଅଣାଯାଇଥିଲା। ଫଳରେ ସମଗ୍ର ଦେଶ ମୁସଲମାନମାନଙ୍କ ଉପରେ ସନ୍ଦେହ କରିବା ଆରମ୍ଭ କରିଥିଲା। ଘୃଣା ବୃଦ୍ଧି ପାଇଲା ଏବଂ ଅନେକ ଲୋକଙ୍କୁ ଆକ୍ରମଣ କରାଯାଇଥିଲା। ଏଥିପାଇଁ ଦିଲ୍ଲୀ ମୁଖ୍ୟମନ୍ତ୍ରୀ ଦାୟୀ। ଓୱାଇସି ଅଭିଯୋଗ କରିଛନ୍ତି ଯେ ଦିଲ୍ଲୀ ମୁଖ୍ୟମନ୍ତ୍ରୀ କହିଥିଲେ ଯେ ସେ ଶାହିନ ବାଗରେସିଏଏ ବିରୋଧୀ ପ୍ରଦର୍ଶନକାରୀଙ୍କୁ ଅଧ ଘଣ୍ଟା ମଧ୍ୟରେ ସଫା କରିଦେବେ।
ଓୱାଇସି କହିଛନ୍ତି ଯେ ୨୦୨୦ ଦିଲ୍ଲୀ ଦଙ୍ଗାରେ ଘର ପୋଡି ପାଉଁଶ ହୋଇଯାଇଥିଲା। ଦିଲ୍ଲୀର ମୁଖ୍ୟମନ୍ତ୍ରୀଙ୍କୁ ଆଉ କେଉଁଠାରେ ଦେଖିବାକୁ ମିଳି ନଥିଲା। ସେ ଅଭିଯୋଗ କରିଛନ୍ତି ଯେ କୌଣସି ଦଳ ମୁସଲମାନ, ଦଳିତ ଏବଂ ଆଦିବାସୀଙ୍କ କଲ୍ୟାଣ ପାଇଁ କାମ କରିବାକୁ ଚାହୁଁନାହାଁନ୍ତି। ସୂଚନାଯୋଗ୍ୟ ଏଆଇଏମଆଇଏମ ଏମସିଡି ନିର୍ବାଚନରେ ୧୬ ଜଣ ପ୍ରାର୍ଥୀ ଦେଇଛି।
