ଛତିଶଗଡ ମଦ ଦୁର୍ନୀତି ମାମଲା: ମୁଖ୍ୟମନ୍ତ୍ରୀ ଭୁପେଶଙ୍କୁ ଗିରଫ କରିବାକୁ ଏଏପିର ଦାବି
ନୂଆଦିଲ୍ଲୀ,୮।୫: ଛତିଶଗଡରେ ୨୦୦୦ କୋଟିର ମଦ ଦୁର୍ନୀତି ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) କାର୍ଯ୍ୟାନୁଷ୍ଠାନ ଗ୍ରହଣ କରି ଶନିବାର ମୁଖ୍ୟ ଅଭିଯୁକ୍ତ ଅନୱର ଧେବାରଙ୍କୁ ଗିରଫ କରିଛି। ତେବେ ଏହି ପ୍ରସଙ୍ଗରେ ଆମ ଆଦମୀ ପାର୍ଟି (ଏଏପି) ପୁଣି କଂଗ୍ରେସକୁ ଟାର୍ଗେଟ କରିଛି। ଏଥିସହ ଛତିଶଗଡର ମୁଖ୍ୟମନ୍ତ୍ରୀ ଭୁପେଶ ବାଘେଲଙ୍କୁ ଗିରଫ କରିବାକୁ ଦାବି କରିଛି ଏବଂ ରାହୁଲ ଗାନ୍ଧୀଙ୍କୁ ମଧ୍ୟ ପଚରାଉଚରା କରିବା କଥା ଉଠାଇଛି। ଦିଲ୍ଲୀ ଏଏପି ସରକାରଙ୍କ ମନ୍ତ୍ରୀ ସୌରଭ ଭରଦ୍ୱାଜ କହିଛନ୍ତି, କଂଗ୍ରେସ ଶାସିତ ଛତିଶଗଡରେ ଇଡି ୨ ହଜାର କୋଟିର ମଦ ଦୁର୍ନୀତି ଉପରେ ତଦନ୍ତ ଚଳାଇଛି। ଏହି ପ୍ରସଙ୍ଗରେ ବଡ଼ ପ୍ରଶ୍ନ ଉଠିଛି। ଛତିଶଗଡରେ ସରକାରୀ ମଦ ଦୋକାନ ଅଛି। ରାଜ୍ୟରେ ଉଚ୍ଚସ୍ତରୀୟ ସରକାରୀ ଅଧିକାରୀ, ଘରୋଇ ବ୍ୟକ୍ତିବିଶେଷ ଏବଂ ରାଜନୈତିକ ପଦାଧିକାରୀମାନଙ୍କୁ ନେଇ ବେଆଇନ ମଦ ବ୍ୟବସାୟର ସିଣ୍ଡିକେଟ ଚାଲିଥିଲା। ପ୍ରଶ୍ନ ହେଉଛି ମେୟରଙ୍କ ଭାଇ ଏକ୍ସାଇଜ କମିଶନରଙ୍କୁ ପରିବର୍ତ୍ତନ କରିପାରିବେ କି? ଏହା ଏକ ସଂପୂର୍ଣ୍ଣ ରାଜ୍ୟ ଏବଂ ଏହି କାର୍ଯ୍ୟ ମୁଖ୍ୟମନ୍ତ୍ରୀଙ୍କ ମାଧ୍ୟମରେ କରାଯାଇଥାଏ।
ଅନଓ୍ବର ହେଉଛନ୍ତି କଂଗ୍ରେସ ନେତା ତଥା ରାୟପୁର ମେୟର ଐଜାଜ ଧେବରଙ୍କ ବଡ଼ଭାଇ। ୨୦୦୩ ବ୍ୟାଚ୍ରେ ଆଇଏଏସ ଅଫିସର ତୁତେଜା ଏବେ ଛତିଶଗଡ଼ ସରକାରରେ ଶିଳ୍ପ ଓ ବାଣିଜ୍ୟ ବିଭାଗ ଯୁଗ୍ମ ସଚିବ ଅଛନ୍ତି। ଶନିବାର ଅନଓ୍ବରଙ୍କୁ ଗିରଫ କରାଯିବା ପରେ ୪ ଦିନିଆ ଇଡି ରିମାଣ୍ଡରେ ପଠାଯାଇଛି।
