ନୂଆଦିଲ୍ଲୀ, ୧୨।୯ : ଶ୍ରୀନଗରର ଚର୍ଚ୍ଚିତ ତଥା ବିବାଦୀୟ ହୈଦରପୋରା ଏନକାଉଣ୍ଟର ମାମଲାରେ ସୁପ୍ରିମକୋର୍ଟ (ଏସ୍ସି) ସୋମବାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଦେଇଛନ୍ତି। ୯ ମାସ ତଳେ ହୋଇଥିବା ଏହି ମାମଲାର ଶୁଣାଣି ବେଳେ ଏନକାଉଣ୍ଟରରେ ନିହତ ହୋଇଥିବା ଆମିର ମ୍ୟାଗ୍ରେଙ୍କ ପିତାଙ୍କ ଆବେଦନକୁ କୋର୍ଟ ଖାରଜ କରିଦେଇଛନ୍ତି। ମୃତ ଆମିରଙ୍କ ପିତା ଅବଦୁଲ ଲତିଫ ତାଙ୍କ ପୁଅଙ୍କ ମୃତଦେକୁ କବରରୁ ବାହାର କରିବା ପାଇଁ କୋର୍ଟରେ ଆବେଦନ କରିଥିଲେ। ଏହି ପ୍ରସଙ୍ଗରେ ଅଗଷ୍ଟ ୨୭ ରେ ସୁପ୍ରିମକୋର୍ଟ ତାଙ୍କ ରାୟ ସଂରକ୍ଷିତ ରଖିଥିଲେ।
ନଅ ମାସ ପୂର୍ବେ ହୈଦରପୋରାରେ ପୋଲିସ ଏନକାଉଣ୍ଟରରେ ୪ ଜଣଙ୍କର ମୃତ୍ୟୁ ଘଟିଥିଲା। ଏହି ଚାରିଜଣ ଆତଙ୍କବାଦୀ ବୋଲି ପୋଲିସ ଦାବି କରିଥିଲା। ଯାହାକୁ ତିନିଜଣ ମୃତକଙ୍କ ପରିବାର ସଦସ୍ୟ ବିରୋଧ କରିଥିଲେ। ସେମାନଙ୍କ ମଧ୍ୟରୁ ଆମିରଙ୍କ ପିତା ଅବଦୁଲ ଲତିଫ ମ୍ୟାଗ୍ରେ ମଧ୍ୟ ଥିଲେ। ମୃତକଙ୍କ ପରିବାର ଏବଂ ରାଜନୈତିକ ଦଳର ବିରୋଧ ପରେ ସରକାର ଅଲତାଫ ଭଟ୍ଟ ଏବଂ ମୁଦାସିରଙ୍କ ମୃତଦେହକୁ ସେମାନଙ୍କ ପରିବାରକୁ ଫେରାଇ ଦେଇଛନ୍ତି।
ଆମିରଙ୍କ ପିତା ଅବଦୁଲ ମ୍ୟାଗ୍ରେ ପୂର୍ବରୁ ଏହି ମାମଲାରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ପୁଅର ମୃତଦେହ ପାଇବା ପାଇଁ ସେ ଏକ ପିଟିଶନ ଦାଖଲ କରିଥିଲେ। ଏହା ପରେ ପରିବାର ସଦସ୍ୟଙ୍କୁ ପୁଅର ମୃତ ଶରୀରରୁ ବଞ୍ଚିତ କରାଯାଇପାରିବ ନାହିଁ ବୋଲି କୋର୍ଟ ନିର୍ଦ୍ଦେଶ ଦେଇଥିଲେ। ତେବେ ପରେ ମୃତ ଶରୀର କ୍ଷୟ ହୋଇଯାଇଥିବା କହି ସରକାର ସେହି ଆଦେଶକୁ ସ୍ଥଗିତ ରଖିଥିଲେ। ଏହା ପରେ ହାଇକୋର୍ଟ ପୀଡିତଙ୍କ ପରିବାରକୁ ୫ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରି ୧୦ ଜଣଙ୍କୁ ଆମିରଙ୍କ କବରରେ ଫାତିହା ପଢ଼ିବାକୁ ଅନୁମତି ଦେଇଥିଲେ। ଏହା ପରେ ଆମିରଙ୍କ ପିତା ସୁପ୍ରିମକୋର୍ଟରେ ଏକ ପିଟିଶନ ଦାଖଲ କରିଥିଲେ।
