ନୂଆଦିଲ୍ଲୀ,୨୬ା୯:ଆଧାର କାର୍ଯ୍ୟକ୍ରମ ଗୋପନୀୟତା ଏବଂ ସୁରକ୍ଷା ପ୍ରତି ବିପଦ ଆଶଙ୍କା ସୃଷ୍ଟି କରିଥିବାବେଳେ ଏହାର ବାୟୋମେଟ୍ରିକ୍ ପ୍ରଯୁକ୍ତି ଭାରତର ଉତ୍ତପ୍ତ ଏବଂ ଆର୍ଦ୍ର ଜଳବାୟୁରେ ନିର୍ଭରଯୋଗ୍ୟ ନୁହେଁ ବୋଲି ରେଟିଂ ସଂସ୍ଥା ମୁଡିସ୍ ଇନ୍ଭେଷ୍ଟର୍ସ ସର୍ଭିସ ଏକ ରିପୋର୍ଟରେ କହିଛି। ସମାଜର ଅବହେଳିତ ବର୍ଗଙ୍କୁ ଏକତ୍ର କରି କଲ୍ୟାଣକାରୀ ଯୋଜନାଗୁଡ଼ିକର ସୁବିଧା ସେମାନଙ୍କ ନିକଟରେ ପହଞ୍ଚାଇବା ଲାଗି ଭାରତର ବିଶିଷ୍ଟ ପରିଚୟ ପ୍ରାଧିକରଣ (ୟୁଆଇଡିଏଆଇ) ଆଧାର ପରିଚୟପତ୍ର ପ୍ରଚଳନ କରିଥିଲା। ତେବେ ଏହି ବ୍ୟବସ୍ଥା ବେଳେବେଳେ କେତେକଙ୍କୁ ସେବାରୁ ବଞ୍ଚତ୍ତ କରୁଥିବାବେଳେ ଉତ୍ତପ୍ତ ଏବଂ ଆଦର୍ର ଜଳବାୟୁରେ ମୁଖ୍ୟତଃ ଶ୍ରମିକ ଶ୍ରେଣୀଙ୍କ କ୍ଷେତ୍ରରେ ବାୟୋମେଟ୍ରିକ୍ ଟେକ୍ନୋଲୋଜିର ନିର୍ଭରଯୋଗ୍ୟତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ମୁଡିସ୍ର ‘ଡିସେଣ୍ଟ୍ରାଲାଇଜ୍ଡ ଫାଇନାନ୍ସ ଆଣ୍ଡ ଡିଜିଟାଲ ଆସେଟ୍ସ’ ରିପୋର୍ଟରେ ଏହା କୁହାଯାଇଛି।
ଆଧାର ବିଶ୍ୱର ସର୍ବବୃହତ୍ ଡିଜିଟାଲ ପରିଚୟ କାର୍ଯ୍ୟକ୍ରମ ଭାବେ ରିପୋର୍ଟରେ ସ୍ବୀକାର କରାଯାଇଛି। ତେବେ ଅଧିକାର ସାବ୍ୟସ୍ତ କରିବାରେ ଏହା ପ୍ରତିବନ୍ଧକର ସମ୍ମୁଖୀନ ହେବା ସହ ବାୟୋମେଟ୍ରିକ୍ ନିର୍ଭରଯୋଗ୍ୟତାକୁ ନେଇ ଉଦ୍ବେଗ ପ୍ରକାଶ ପାଇଛି। କେନ୍ଦ୍ରୀକୃତ ବ୍ୟବସ୍ଥାରେ ତଥ୍ୟ ସଂଗ୍ରହକୁ ନେଇ ଆଶଙ୍କା ଦେଖାଦେବା ସହ ବ୍ୟବହାରକାରୀମାନଙ୍କର କ୍ୱଚିତ୍ ନିୟନ୍ତ୍ରଣ ରହୁଛି। ସେଣ୍ଟ୍ରାଲାଇଜ୍ଡ ସିଷ୍ଟମ୍ରେ ବ୍ୟାଙ୍କ, ସୋସିଆଲ ମିଡିଆ ପ୍ଲାଟ୍ଫର୍ମ କିମ୍ବା ସରକାରଙ୍କ ଭୋଟର ତାଲିକା ଭଳି ଏକକ ସଂସ୍ଥା ଜଣେ ବ୍ୟବହାରକାରୀଙ୍କ ପରିଚୟ ଗୋପନୀୟତାକୁ ନିୟନ୍ତ୍ରଣ ଓ ପରିଚାଳନା କରିବା ସହ ଅନ୍ଲାଇନ୍ ଉତ୍ସଗୁଡ଼ିକୁ ଏହା ଉପଲବ୍ଧ କରାଇଥାଏ। ଏହି ସଂସ୍ଥା ଜଣେ ବ୍ୟକ୍ତିଙ୍କ ନାମ, ଠିକଣା, ସାମାଜିକ ସୁରକ୍ଷା ନମ୍ବର ଆଭ୍ୟନ୍ତରୀଣ କିମ୍ବା ତୃତୀୟ ପକ୍ଷ ପ୍ରୋଫାଇଲିଂ ଉଦ୍ଦେଶ୍ୟରେ ଦେଇପାରେ ବୋଲି ରିପୋର୍ଟରେ କୁହାଯାଇଛି। ବିଭିନ୍ନ କଲ୍ୟାଣକାରୀ କାର୍ଯ୍ୟକ୍ରମର ଲାଭ ସିଧାସଳଖ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟରେ ପହଞ୍ଚାଇବା ପାଇଁ କେନ୍ଦ୍ର ସରକାର ଆଧାରକୁ ନିର୍ଭରଯୋଗ୍ୟ ଭାବେ ଗ୍ରହଣ କରିଥିବାବେଳେ ମୁଡିସ୍ ରିପୋର୍ଟ ପରେ ଏହା ଉପରେ ଚିନ୍ତା କରିବା ଆବଶ୍ୟକ ହୋଇପଡ଼ିଛି।
