ଲାହୋର,୧୬ା୧୦: ବାବର ଆଜମଙ୍କୁ ଭେଟିବା ପାଇଁ ଜଣେ ପ୍ରଶଂସକ ଗଦ୍ଦାଫି ଷ୍ଟାଡିୟମରେ ସୁରକ୍ଷା ବ୍ୟାରିକେଡ୍ ଡେଇଁ ପାକିସ୍ତାନ ଡ୍ରେସିଂ ରୁମ୍ରେ ପଶିବାକୁ ଚେଷ୍ଟା କରିଥିଲେ। ଉକ୍ତ ପ୍ରଶଂସକଙ୍କୁ ରିମାଣ୍ଡରେ ନିଆଯିବା ପରେ ପୋଲିସ ଛାଡ଼ି ଦେଇଛି।
ଉକ୍ତ ଯୁବକଙ୍କ ନାମ ଓଭାଇସ। ଡବ୍ଲ୍ୟୁଟିସି ଚାମ୍ପିୟନ ଦକ୍ଷିଣ ଆଫ୍ରିକା ଓ ପାକିସ୍ତାନ ମଧ୍ୟରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚ୍ର ଚତୁର୍ଥ ଦିନ ଓଭାଇସ ପାକିସ୍ତାନ ଡ୍ରେସିଂ ରୁମର ବାଲକୋନିକୁ ଚଢ଼ି ଯାଇଥିଲେ। ଏହା ପାକିସ୍ତାନ ଦଳର ମୁଖ୍ୟ କୋଚ୍ ଆଝାର ମହମୁଦଙ୍କ ସମେତ ସପୋର୍ଟ ଷ୍ଟାଫ୍ଙ୍କୁ ଚକିତ କରିଥିଲା।
ପରେ ମହମୁଦ ସୁରକ୍ଷା ଅଧିକାରୀଙ୍କୁ ପରିସ୍ଥିତି ସମ୍ଭାଳିବାକୁ କହିଥିଲେ। ତାଙ୍କୁ ସୁରକ୍ଷା କର୍ମୀଙ୍କ ଦ୍ୱାରା ଏସକର୍ଟ କରି ନିଆଯାଉଥିବା ବେଳେ ସେ ବାବରଙ୍କୁ ତାଙ୍କ ଜନ୍ମଦିନରେ ଭେଟିବାକୁ ବାରମ୍ବାର ଅନୁରୋଧ କରୁଥିଲେ। ତାଙ୍କୁ ଗୁଲବର୍ଗ ଥାନା ନିଆଯାଇ ସେଠାରେ ପଚାରଉଚରା କରାଯାଇଥିଲା। ପାକିସ୍ତାନ କ୍ରିକେଟ ବୋର୍ଡ (ପିସିବି) ପକ୍ଷରୁ କୌଣସି ମକଦ୍ଦମା ରୁଜୁ କରାଯାଇ ନ ଥିବାରୁ ପୋଲିସ ଉକ୍ତ ପ୍ରଶଂସକଙ୍କୁ ଛାଡ଼ି ଦେଇଥିଲା।
Dharitri – Odisha’s No.1 Odia Daily
