ରଘୁନାଥପୁର,୯ା୧(ରାଜେନ୍ଦ୍ର ନାରାୟଣ ସିଂହ):ଜଗତ୍ସିଂହପୁର ଜିଲା ରଘୁନାଥପୁର ବ୍ଲକ ଅଞ୍ଚଳରେ ବୁଧବାର ଚାଷୀ ଆତ୍ମହତ୍ୟା କରିଥିବା ଜଣାପଡ଼ିଛି। ଧାନ ଫସଲ ଉଜୁଡ଼ି ଯିବା ପରେ କରଜ ଶୁଝିବା ଚିନ୍ତାରେ ତଅଁରା ବିଲସାହିର ପ୍ରହଲ୍ଲାଦ ପରିଡ଼ାଙ୍କ ସାନପୁଅ ଯୁବଚାଷୀ ଅଶୋକ(୩୮) ନିଜ ଘରେ ବେକରେ ଗାମୁଛା ବାନ୍ଧି ଜୀବନ ହାରିଛନ୍ତି।
ଅଶୋକ ନିଜ ଜମି ସହ ନିକଟସ୍ଥ ବିଜୟ କୁମାର ପରିଡ଼ା, ବାବୁଲାଲ ପରିଡ଼ା, ଦୟାନିଧି ରାଉତ, ନିଶାକର ମହାନ୍ତି ଓ ପ୍ରକାଶ ସାମଲଙ୍କଠାରୁ ୧୦ ଏକର ଜମି ଆଣି ଭାଗଚାଷ କରିଥିଲେ। ବୁଧବାର ସକାଳୁ ଧାନ କିଆରିକୁ ଯାଇ ଉଜୁଡ଼ି ଯାଇଥିବା ଫସଲକୁ ଦେଖି ମ୍ରିୟମାଣ ହୋଇ ଘରକୁ ଫେରି ଆସିଥିଲେ। ଘରେ ସ୍ତ୍ରୀ ମାମିନା ନାୟକଙ୍କୁ ଏତେ ଗୁଡ଼ିଏ ଧାନ ଫସଲ ନଷ୍ଟ ହୋଇଗଲା, ଖାଇବା କ’ଣ, କରଜ କେମିତି ଶୁଝିବା କହି ବ୍ୟସ୍ତ ହୋଇପଡ଼ିଥିଲେ। ମାମିନା ଅଶୋକଙ୍କୁ ବୁଝାଶୁଝା କରି ଚା ପିଇବାକୁ ଦେଇ ଗାଧୋଇବାକୁ ଚାଲି ଯାଇଥିଲେ। ମାନସିକ ଭାରସାମ୍ୟ ହରାଇ ଅଶୋକ ଘର ଭିତରେ ବେକରେ ଗାମୁଛା ବାନ୍ଧି ଫ୍ୟାନରେ ଝୁଲି ପଡ଼ିଥିଲେ। ମାମିନା ଗାଧୋଇ ଆସି ଏହା ଦେଖି ପଡ଼ୋଶୀଙ୍କୁ ଡାକ ପକାଇଥିଲେ। ତୁରନ୍ତ ଅଶୋକଙ୍କୁ ସ୍ଥାନୀୟ ରେଢୁଆ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଘଟଣାସ୍ଥଳରେ ରଘୁନାଥପୁର ଥାନା ଏସ୍ଆଇ ଯୋଗେଶ୍ୱର ବେହେରା ପହଞ୍ଚତ୍ ମୃତଦେହ ଜବତ କରିଥିଲେ। ଏ ସମ୍ପର୍କରେ ମୃତ ଅଶୋକଙ୍କ ସ୍ତ୍ରୀ ମାମିନାଙ୍କ ପକ୍ଷରୁ ଲିଖିତ ଅଭିଯୋଗ କରାଯିବା ପରେ ପୋଲିସ ଅପମୃତ୍ୟୁ ମାମଲା (୧/୨୫) ରୁଜୁ କରି ମୃତଦେହକୁ ଜଗତ୍ସିଂହପୁର ଜିଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଇଥିଲେ। ଧାନ ଫସଲରେ ବ୍ୟାପକ କ୍ଷତି ଓ କରଜ ଶୁଝିବା ଚିନ୍ତାରେ କିଛିଦିନ ହେବ ଅଶୋକ ଚାପଗ୍ରସ୍ତ ଥିଲେ ବୋଲି ମଝିଆ ଭାଇ ପ୍ରମୋଦ କହିଛନ୍ତି। ଏହାଛଡ଼ା ସେ ସୋସାଇଟି, ଏସ୍ଏଚଜି ଗ୍ରୁପ ଓ ଅନ୍ୟାନ୍ୟ ହାତ ଉଧାରିରେ ୩ ଲକ୍ଷ ଟଙ୍କା ଋଣ କରି ଚାଷରେ ବିନିଯୋଗ କରିଥିବାନେଇ ମାମିନା ପ୍ରକାଶ କରିଛନ୍ତି। ଘରେ ତାଙ୍କ ସ୍ତ୍ରୀ ସହ ଏକ ୭ ବର୍ଷର ଝିଅ ଅଛନ୍ତି। ଅଶୋକ ଋଣ ଶୁଝିବା ଚିନ୍ତାରେ ଜୀବନ ହାରିବା ପରେ ତାଙ୍କ ପରିବାର ଉପାୟଶୂନ୍ୟ ହୋଇପଡ଼ିଛନ୍ତି। ସରପଞ୍ଚ ବଟକୃଷ୍ଣ ନାୟକ ଓ ସମିତି ସଭ୍ୟା ଶାନ୍ତିଲତା ଦ୍ୱିବେଦୀ ସାନ୍ତ୍ୱନା ଦେବା ସହ ଆନୁଷଙ୍ଗିକ ସହଯୋଗ କରିଛନ୍ତି।
