କିଭ୍/ମସ୍କୋ,୧୪।୫: ୟୁକ୍ରେନ୍ ରାଜଧାନୀ କିଭ୍ସ୍ଥିତ ଏକ କୋର୍ଟରେ ଶୁକ୍ରବାର ରୁଷୀୟ ସୈନ୍ୟ ଭାଡିମ୍ ଶିଶିମାରିନ୍ଙ୍କ ବିରୋଧରେ ଯୁଦ୍ଧ ଅପରାଧ ଅଭିଯୋଗର ଶୁଣାଣି ଆରମ୍ଭ ହୋଇଛି। ୨୧ ବର୍ଷୀୟ ଶିଶିମାରିନ୍ ଯୁଦ୍ଧର ନିୟମ ଉଲ୍ଲଂଘନ କରି ଜଣେ ନିରସ୍ତ୍ର ୟୁକ୍ରେନୀୟଙ୍କୁ ହତ୍ୟା କରିଥିଲେ। ଗତ ଫେବୃୟାରୀ ୨୪ରେ ପଡ଼ୋଶୀ ୟୁକ୍ରେନ୍ ଉପରେ ରୁଷିଆ ଆକ୍ରମଣ କରିବା ପରଠୁ ଏହା ହେଉଛି କୌଣସି ରୁଷୀୟ ସୈନ୍ୟଙ୍କ ବିରୋଧରେ ପ୍ରଥମ ବିଚାର। ୟୁକ୍ରେନ୍ରେ ରୁଷିଆ ସୁରକ୍ଷା ବଳର ବର୍ବରତାକୁ ବିଶ୍ୱବ୍ୟାପୀ ନିନ୍ଦା କରାଯାଉଥିବାବେଳେ ଶିଶିମାରିନ୍ଙ୍କ ଟ୍ରାଏଲ୍ ଅନ୍ତର୍ଜାତୀୟ ସମୁଦାୟର ଦୃଷ୍ଟି ଆକର୍ଷଣ କରିଛି।
ଫେବୃୟାରୀ ୨୮ରେ ରୁଷିଆ ସେନାର ଟ୍ୟାଙ୍କଗୁଡ଼ିକ କିଭ୍ ଅଭିମୁଖେ ଅଗ୍ରସର ହେଉଥିବାବେଳେ ୟୁକ୍ରେନ୍ ସୁମି ଅଞ୍ଚଳର ଚୁପାଖିଭ୍କା ଗ୍ରାମରେ ଜଣେ ୬୨ ବର୍ଷୀୟ ବ୍ୟକ୍ତି ସାଇକେଲରେ ଯାଉଥିଲେ। ସେତେବେଳେ ସେ ଫୋନ୍ରେ କାହା ସହ କଥା ହେଉଥିଲେ। ବୃଦ୍ଧ ଜଣକ ରୁଷୀୟ ସୈନ୍ୟଙ୍କୁ ଅଟକାଇଥିଲେ। ଏକ ଚୋରା ଗାଡ଼ିରେ ଯାଉଥିବା ରୁଷିଆର ଟ୍ୟାଙ୍କ ୟୁନିଟ୍ ସଦସ୍ୟ ଭାଡିମ୍ ଶିଶିମାରିନ ସେହି ବୃଦ୍ଧଙ୍କ ମୁଣ୍ଡକୁ ଗୁଳି କରିଥିଲେ। ୟୁକ୍ରେନୀୟ ସୈନ୍ୟ ତାଙ୍କୁ ତତ୍କାଳ କାବୁ କରିଥିଲେ। ସେ ନିଜ ଦୋଷୀ ସ୍ବୀକାର କରିଥିବା ନେଇ ୟୁକ୍ରେନ୍ ସିକ୍ୟୁରିଟି ସର୍ଭିସ୍ ପକ୍ଷରୁ ଏକ ଭିଡିଓ ଜାରି କରାଯାଇଛି। ଗୁଳି ଚଳାଇବା ପାଇଁ ମୋତେ ନିର୍ଦ୍ଦେଶ ମିଳିଥିଲା। ଗୋଟିଏ ରାଉଣ୍ଡ ଗୁଳିରେ ବୃଦ୍ଧ ଟଳିପଡ଼ିଥିଲେ। ଆମେ ମାଡ଼ିଚାଲିଥିଲୁ ବୋଲି ଭିଡିଓରେ ଶିଶିମାରିନ୍ଙ୍କ ବୟାନ୍ ରହିଛି। ଏହା ଆକ୍ରମଣକାରୀ ଶତ୍ରୁଙ୍କ ପକ୍ଷରୁ ପ୍ରଥମ ସ୍ବୀକାରୋକ୍ତି। ଦୋଷୀ ସାବ୍ୟସ୍ତ ହେଲେ ଶିଶିମାରିନ୍ଙ୍କୁ ଆଜୀବନ କାରାଦଣ୍ଡାଦେଶ ହୋଇପାରେ ବୋଲି ୟୁକ୍ରେନ୍ ସେନା କହିଛି। ଶୁକ୍ରବାର କଡ଼ା ସୁରକ୍ଷା ବଳୟ ମଧ୍ୟରେ ତାଙ୍କୁ କିଭ୍ର ଏକ କୋର୍ଟକୁ ନିଆଯାଇଥିଲା। ଶୁଣାଣି ପାଇଁ କୋର୍ଟ ପରିସର ଲୋକାରଣ୍ୟ ହୋଇଥିଲା। ମାମଲାର ପରବର୍ତ୍ତୀ ଶୁଣାଣି ଆସନ୍ତା ସପ୍ତାହରେ କରାଯିବ।
କେବଳ ଶିଶିମାରିନ୍ ନୁହନ୍ତି, ରୁଷିଆର ବହୁ ସୈନ୍ୟ ୟୁକ୍ରେନୀୟ ପ୍ରତିପକ୍ଷଙ୍କ ସହ ଯୁଦ୍ଧ କରିବା ପରିବର୍ତ୍ତେ ସାଧାରଣ ନାଗରିକଙ୍କୁ ହତ୍ୟା କରୁଥିବା ଅଭିଯୋଗ ହୋଇଛି। ଏପରି କି ସେମାନେ ଯୁବତୀ, ମହିଳା ଓ ପୁଅପିଲାଙ୍କୁ ମଧ୍ୟ ବଳାତ୍କାର କରୁଛନ୍ତି। ୟୁକ୍ରେନ୍ର ଅନେକ ଅଞ୍ଚଳରେ ଗଡ଼ୁଥିବା ହଜାର ହଜାର ମୃତଦେହ ଗଣହତ୍ୟାକୁ ପ୍ରମାଣିତ କରିଛି। ଆମେରିକା ଓ ବ୍ରିଟେନ୍ ସମେତ ୟୁକ୍ରେନ୍ର ଅନେକ ସହଯୋଗୀ ରାଷ୍ଟ୍ର ରୁଷିଆ ବିରୋଧରେ ନରସଂହାର ଅଭିଯୋଗ ଆଣିଛନ୍ତି। ତେଣୁ ଏହା ଯୁଦ୍ଧ ଅପରାଧର ପ୍ରଥମ ମାମଲା। ଖୁବ୍ଶୀଘ୍ର ଏଭଳି ଅନେକ ମାମଲାର ଶୁଣାଣି କରାଯିବ ବୋଲି ସରକାରୀ ଓକିଲ ଆଣ୍ଡ୍ର୍ୟୁ ସିନ୍ୟୁକ୍ ସୂଚନା ଦେଇଛନ୍ତି। ଅନ୍ୟପକ୍ଷେ କ୍ରେମ୍ଲିନ୍ ୟୁକ୍ରେନ୍କୁ ଅନୁରୂପ ଭାବେ ଜବାବୀ କାର୍ଯ୍ୟାନୁଷ୍ଠାନର ଧମକ ଦେଇଛି।
