ଭୁବନେଶ୍ୱର,୪।୧୨(ବ୍ୟୁରୋ): ମେକ୍ ଇନ୍ ଓଡ଼ିଶା କନ୍କ୍ଲେଭ୍ର ତୃତୀୟ ଦିବସରେ ମିଶନ ଶକ୍ତି ବିଭାଗ ଦ୍ୱାରା ମହିଳା ଉଦ୍ୟୋଗୀ ଅଧିବେଶନ ଅନୁଷ୍ଠିତ ହୋଇଯାଇଛି। ଶନିବାର ପୂର୍ବାହ୍ନରେ ଏହାର ଉଦ୍ଘାଟନୀ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁଖ୍ୟଅତିଥି ଭାବେ ଯୋଗଦେଇ ସ୍ବୟଂସହାୟକ ଗୋଷ୍ଠୀ(ଏସ୍ଏଚ୍ଜି)ଗୁଡ଼ିକ ନିମନ୍ତେ ନୂତନ ଅର୍ଥନୈତିକ କାର୍ଯ୍ୟକ୍ରମ ସମ୍ପର୍କରେ ଘୋଷଣା କରିବା ସହ ୨୦୨୨-୨୩ ବର୍ଷରେ ଉତ୍ତମ ପ୍ରଦର୍ଶନ କରିଥିବା ୩ଟି ସ୍ବୟଂସହାୟକ ଗୋଷ୍ଠୀ ଓ ବ୍ୟାଙ୍କକୁ ସମ୍ବର୍ଦ୍ଧିତ କରିଥିଲେ। ୨୦ ଲକ୍ଷ ଏସ୍ଏଚ୍ଜି ସଦସ୍ୟାଙ୍କ ମାଧ୍ୟମରେ ଅଣକାଷ୍ଠ ବନଜାତ ଦ୍ରବ୍ୟର ବ୍ୟବସାୟ ପାଇଁ ଇଣ୍ଡିଆନ୍ ସ୍କୁଲ ଅଫ୍ ବିଜ୍ନେସ ସହ ଏପିସି ମାଧ୍ୟମରେ ୧ ଲକ୍ଷ ଏସ୍ଏଚ୍ଜି ସଦସ୍ୟାଙ୍କ ଦ୍ୱାରା ସାମୂହିକ କୃଷି ଓ ବଜାର ବ୍ୟବସ୍ଥା, ବିଉଟି ଆଣ୍ଡ ୱେଲ୍ନେସ୍ ସେକ୍ଟର ସ୍କିଲ୍ କାଉନ୍ସିଲ୍ ମାଧ୍ୟମରେ ୧୫ ହଜାର ଏସ୍ଏଚ୍ଜି ସଦସ୍ୟାଙ୍କ ଦ୍ୱାରା ସୌନ୍ଦର୍ଯ୍ୟ କ୍ଷେତ୍ରରେ ଉଦ୍ୟୋଗ ପ୍ରତିଷ୍ଠା, ରବର କେମିକାଲ ଆଣ୍ଡ ପେଟ୍ରୋକେମିକାଲ୍ ସ୍କିଲ୍ ଡେଭଲପ୍ମେଣ୍ଟ ମାଧ୍ୟମରେ ୨ ହଜାର ଏସ୍ଏଚ୍ଜି ସଦସ୍ୟାଙ୍କ ଦ୍ୱାରା ଚପଲ ପ୍ରସ୍ତୁତି, ଫ୍ଲିପ୍କାର୍ଟ ମାଧ୍ୟମରେ ସମସ୍ତ ଏସ୍ଏଚ୍ଜିଙ୍କ ନିମନ୍ତେ ଇ-କମର୍ସ ସୁଯୋଗ ସୃଷ୍ଟି ତଥା ଉଦ୍ୟାନ କୃଷି ନିର୍ଦ୍ଦେଶାଳୟ ସହିତ ରାଜିନାମା ସ୍ବାକ୍ଷରିତ ହୋଇଛି। ପୁନଶ୍ଚ ଶୁଖୁଆ ଉତ୍ପାଦନ ଓ ବଜାର ବ୍ୟବସ୍ଥା ପାଇଁ ୱାର୍ଲଡ ଫିସ୍ ସହିତ, ଚାଉଳର ମୂଲ୍ୟଯୁକ୍ତ ପ୍ରକ୍ରିୟାକରଣ ପାଇଁ କେନ୍ଦ୍ରୀୟ ଧାନ ଗବେଷଣା କେନ୍ଦ୍ର(ଆଇଆର୍ଆର୍ଆଇ) ସହିତ ଏବଂ ଚିନାବାଦାମର ମୂଲ୍ୟଯୁକ୍ତ ପ୍ରକ୍ରିୟାକରଣ ନିମନ୍ତେ ଇକ୍ରିସାଟ୍ (ଆଇସିଆର୍ଆଇଏସ୍ଏଟି) ସହିତ ଖୁବ୍ଶୀଘ୍ର ରାଜିନାମା ସ୍ବାକ୍ଷରିତ ହେବ ବୋଲି ସୂଚନା ଦିଆଯାଇଛି।
ମିଶନ ଶକ୍ତି କମିଶନର ତଥା ଶାସନ ସଚିବ ସୁଜାତା କାର୍ତ୍ତିକେୟନ୍ଙ୍କ ପରିଚାଳନାରେ ଆୟୋଜିତ ପ୍ଲେନାରୀ ଅଧିବେଶନର ଆଲୋଚ୍ୟ ପ୍ରସଙ୍ଗ ରହିଥିଲା ମହିଳା ସଶକ୍ତୀକରଣ ନିମନ୍ତେ ଆର୍ଥିକ ସ୍ବାଧୀନତା ନିର୍ମାଣ (ବିଲ୍ଡିଂ ଇକୋନୋମିକ୍ ଇଣ୍ଡିପେଣ୍ଡେନ୍ସ ଫର୍ ଓମେନ ଏମ୍ପାୱାରମେଣ୍ଟ)। ଏହି ଅବସରରେ ୫ ଜଣଙ୍କୁ ଏସ୍ଏଚ୍ଜିରେ ଅଭିନବତ୍ୱ ନିମନ୍ତେ ପୁରସ୍କୃତ କରାଯାଇଥିବା ବେଳେ ଏସ୍ଏଚ୍ଜି ଉଦ୍ୟୋଗୀ ଭାବେ ଉଲ୍ଲେଖନୀୟ ପ୍ରଦର୍ଶନ ପାଇଁ ୨୯ଜଣଙ୍କୁ ପୁରସ୍କୃତ କରାଯାଇଥିଲା। ଓଡ଼ିଶା ଜୀବିକା ମିଶନର ମୁଖ୍ୟ କାର୍ଯ୍ୟନିର୍ବାହୀ ମାନସୀ ନିମ୍ବାଲ ପ୍ଲେନାରୀ ଅଧିବେଶନରେ ଧନ୍ୟବାଦ ଅର୍ପଣ କରିଥିଲେ।
ଅପରାହ୍ନରେ ମହିଳା ଉଦ୍ୟୋଗୀ ସୃଷ୍ଟି ଓ ସେମାନଙ୍କୁ ପ୍ରୋତ୍ସାହନ ପାଇଁ ରାଜ୍ୟ ସରକାରଙ୍କ ବହୁବିଧ ପଦକ୍ଷେପ ତଥା ବ୍ୟବସାୟ ସ୍ଥାପନ କ୍ଷେତ୍ରରେ ସଫଳତା ଅର୍ଜନ କରିଥିବା ମହିଳା ଉଦ୍ୟୋଗୀମାନଙ୍କୁ ନେଇ ଦୁଇଟି କ୍ଷେତ୍ରୀୟ ଅଧିବେଶନ ଅନୁଷ୍ଠିତ ହୋଇଥିଲା। ମହିଳା ଉଦ୍ୟୋଗୀ ଅଧିବେଶନରେ ରାଜ୍ୟର ୩୦ଟି ଜିଲାରୁ ପ୍ରାୟ ୧୫୦୦ରୁ ଊର୍ଦ୍ଧ୍ୱ ସ୍ବୟଂ ସହାୟକ ଗୋଷ୍ଠୀର ସଦସ୍ୟା ଯୋଗ ଦେଇଥିଲେ।
