ଯାଜପୁର ଅଫିସ/ପ୍ରୀତିପୁର/ଦଶରଥପୁର(ଡି.ଏନ୍.ଏ.),୪ା୯ କମେଣ୍ଟମରାକୁ କେନ୍ଦ୍ରକରି ଜଣେ ଛାତ୍ରୀଙ୍କୁ ହତ୍ୟା କରାଯାଇଛି। ସେ ହେଲେ ଯାଜପୁର ଜିଲା ବିଞ୍ଝାରପୁର ବ୍ଲକ ଉତ୍ତଙ୍ଗରା ପଞ୍ଚାୟତ ଅଧୀନ ବରିକୂଳ ଗ୍ରାମର ଅମୂଲ୍ୟ ଦାସଙ୍କ ଝିଅ ଅମ୍ରିତା(୧୪)। ତାଙ୍କ ମୃତଦେହକୁ ଗାଁର ନାଳକୂଳ ପୋଖରୀରୁ ଶନିବାର ରାତିରେ ଜବତ କରାଯାଇଛି। ଘଟଣା ପୂର୍ବରୁ ଅମ୍ରିତାଙ୍କୁ କେତେଜଣ ଧମକ ଦେଇଥିବାରୁ ଏହା ଏକ ସୁଚିନ୍ତିତ ହତ୍ୟାକାଣ୍ଡ ବୋଲି ପରିବାର ଲୋକେ ମଙ୍ଗଳପୁର ଥାନାରେ ରବିବାର ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତିକରି ଯାଜପୁର ଏସଡିପିଓ ସରୋଜ କୁମାର ଉପାଧ୍ୟାୟ ଓ ଆଇଆଇସି ରୀନାରାଣୀ ସାହୁ ରବିବାର ସକାଳେ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି। ପରେ ଅଗ୍ନିଶମ ବାହିନୀ ସହାୟତାରେ ଉକ୍ତ ପୋଖରୀରୁ ଅମ୍ରିତାଙ୍କ ସାଇକେଲ ମଧ୍ୟ ଉଦ୍ଧାର କରାଯାଇଛି। ହେଲେ ରିପୋର୍ଟ ଲେଖାହେବା ପର୍ଯ୍ୟନ୍ତ ପୋଲିସ ପକ୍ଷରୁ ସାଇଣ୍ଟିଫିକ୍ ଟିମ୍ ନିୟୋଜନ କରାଯାଇ ନ ଥିଲା।
ଅଭିଯୋଗ ଅନୁସାରେ ଅମ୍ରିତା ନିକଟସ୍ଥ ନନ୍ଦିପୁର ହାଇସ୍କୁଲରେ ନବମ ଶ୍ରେଣୀରେ ପାଠ ପଢ଼ନ୍ତି। ଶନିବାର ଅପରାହ୍ନରେ ସେ ମଙ୍ଗଳପୁର ଥାନା ନନ୍ଦିପୁର ପଞ୍ଚାୟତ ଅନ୍ତର୍ଗତ ବାବଲପୁର ଗ୍ରାମର ବିଷ୍ଣୁଚରଣ ପାଢ଼ୀଙ୍କ ନିକଟକୁ ଟ୍ୟୁଶନ ପାଇଁ ଯାଇଥିଲେ। ଟ୍ୟୁଶନ ଛୁଟି ପରେ ଅମ୍ରିତା ସନ୍ଧ୍ୟା ୬ ଟା୧୫ ମିନିଟ୍ରେ ନନ୍ଦିପୁର ଛକସ୍ଥିତ ଏକ ବହି ଦୋକାନରୁ ଖାତା ଓ କଲମ କିଣି ନିଜ ଘର ଅଭିମୁଖେ ଯାଇଥିଲେ। ନନ୍ଦିପୁର ଛକରୁ ତାଙ୍କ ଘରର ଦୂରତା ପ୍ରାୟ ୨ କିମି ହେବ। ଦୀର୍ଘ ସମୟ ପର୍ଯ୍ୟନ୍ତ ସେ ଘରେ ନ ପହଞ୍ଚତ୍ବାରୁ ତାଙ୍କ ମା’ସୁପ୍ରିୟା ସାହିପଡ଼ିଶା ଲୋକଙ୍କ ସହାୟତାରେ ବରିକୂଳଠାରୁ ନନ୍ଦିପୁର ଛକ ପର୍ଯ୍ୟନ୍ତ ବିଭିନ୍ନ ସ୍ଥାନ ଖୋଜାଖୋଜି କରିବାକୁ ଲାଗିଲେ। ରାତି ପ୍ରାୟ ୯ଟାରେ ନନ୍ଦିପୁର ଛକଠାରୁ ପ୍ରୀତିପୁର ରାସ୍ତାରେ ବରିକୂଳ ଛକ ପୂର୍ବରୁ ରାସ୍ତାକଡ଼ରେ ଥିବା ନାଳକୂଳ ପୋଖରୀରେ ଏକ କଳାରଙ୍ଗର ସ୍କୁଲ ବ୍ୟାଗ୍ ଭାସୁଥିବା ବରିକୂଳ ଗ୍ରାମର କେତେଜଣ ଲୋକ ଦେଖିବାକୁ ପାଇଥିଲେ। ସେମାନେ ତୁରନ୍ତ ଅନ୍ୟମାନଙ୍କୁ ଅବଗତ କରିବା ସହିତ ପୋଖରୀ ଭିତରକୁ ପଶି ଉକ୍ତ ବ୍ୟାଗ୍କୁ ଟାଣିବାରୁ ବ୍ୟାଗ ସହିତ ଛାତ୍ରୀଙ୍କ ମୃତଦେହ ବାହାରିଥିଲା। କାଳେ ସେ ବଞ୍ଚଥିବେ ସେହି ଆଶଙ୍କାରେ ତାଙ୍କ ପରିବାର ଲୋକେ ଅମ୍ରିତାଙ୍କୁ ରାତିରେ ଯାଜପୁର ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ରବିବାର ମଙ୍ଗଳପୁର ଥାନାରେ ଅମ୍ରିତାଙ୍କ ଭାଇ ଅମିତ୍ ଚରଣ ଦାସ ହତ୍ୟା ଅଭିଯୋଗ କରିଛନ୍ତି। ତଦନୁୁଯାୟୀ ଅମ୍ରିତା ସେହି ରାସ୍ତାରେ ଟ୍ୟୁଶନ ଯିବାବେଳେ କିଛିଦିନ ତଳେ କେତେଜଣ ଯୁବକ ତାଙ୍କୁ କମେଣ୍ଟ ମାରିଥିଲେ। ଏ ନେଇ ଅମ୍ରିତା ଓ ସେମାନଙ୍କ ମଧ୍ୟରେ ଝଗଡ଼ା ହୋଇଥିଲା। ସେମାନେ ଅମ୍ରିତାଙ୍କୁ ଦେଖିନେବେ ବୋଲି ଧମକ ଦେଇଥିଲେ। ତେଣୁ ଉକ୍ତ ଯୁବକମାନେ ସନ୍ଧ୍ୟା ସମୟରେ ଅମ୍ରିତାଙ୍କ ଏକୁଟିଆର ସୁଯୋଗ ନେଇ ହତ୍ୟା କରିଛନ୍ତି ବୋଲି ଅମିତ୍ ଅଭିଯୋଗରେ ଦର୍ଶାଇଛନ୍ତି। ପୋଲିସ ମୃତଦେହ ବ୍ୟବଚ୍ଛେଦ କରିବା ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ଥାନାରେ ୪୭୭/୨୨ନମ୍ବରରେ ଏକ ହତ୍ୟା ମାମଲା ରୁଜୁ ହୋଇଛି। ତଦନ୍ତକାରୀ ଅଧିକାରୀ ଘନଶ୍ୟାମ ହଁାସଦା କହିଛନ୍ତି, ତଦନ୍ତ ଚାଲିଛି, ଖୁବ୍ଶୀଘ୍ର ଏହାର ପର୍ଦ୍ଦାଫାଶ ହେବ।
