ସମ୍ବଲପୁର,୨୭।୭(ଶୁଭାଶିଷ ପାଢ଼ୀ): ପୂର୍ବତନ ମନ୍ତ୍ରୀ ନବ ଦାସ ହତ୍ୟା ଘଟଣାରେ ବୁଧବାର ଅଭିଯୁକ୍ତ ଗୋପାଳ ଦାସଙ୍କୁ କଡ଼ା ସୁରକ୍ଷା ବଳୟରେ ଝାରସୁଗୁଡ଼ା ଜିଲା ଜଜ୍ ଦିଗମ୍ବର ପୃଷ୍ଟିଙ୍କ ନିକଟରେ ହାଜର କରାଯାଇଥିଲା। ଅଭିଯୁକ୍ତ ଗୋପାଳ କୋର୍ଟ ଦ୍ୱାରରେ ମୁଣ୍ଡିଆ ମାରି ଭିତରକୁ ପ୍ରବେଶ କରିଥିଲେ। ପ୍ରାୟ ୧୫ମିନିଟ୍ ଧରି କୋର୍ଟ କାର୍ଯ୍ୟ ଚାଲିଥିଲା। ଗୋପାଳ ନିଜ ପକ୍ଷରୁ ଓକିଲ ଦେଇପାରିବେ ନାହିଁ ବୋଲି ଅସାମର୍ଥ୍ୟତା ପ୍ରକାଶ କରି କୋର୍ଟଙ୍କୁ ଗୁହାରି କରିଥିଲେ। ଏହାସହ ମାମଲା ଲଢିବାକୁ ମଧ୍ୟ ରାଜି ହୋଇଥିଲେ। ଜିଲା ଜଜ୍ଙ୍କ ନିର୍ଦ୍ଦେଶ କ୍ରମେ ନିୟମ ଅନୁସାରେ ଷ୍ଟେଟ ଡିଫେନ୍ସ କାଉନ୍ସିଲ ପକ୍ଷରୁ ଆଇନଜୀବୀ ନରେଶ ନାଏକଙ୍କୁ ଗୋପାଳଙ୍କ ଓକିଲ ଭାବେ ନିଯୁକ୍ତି ଦିଆଯାଇଥିଲା। ଏହି ମାମଲାର ପରବର୍ତ୍ତୀ ବିଚାର ପାଇଁ ଅତିରିକ୍ତ ଜିଲା ଜଜ୍ ସୁବାସ ଚନ୍ଦ୍ର ଧଳଙ୍କ କୋର୍ଟକୁ ସ୍ଥାନାନ୍ତର କରାଯାଇଥିଲା। ଅଗଷ୍ଟ ୯ରେ ଅତିରିକ୍ତ ଜିଲା ଜଜ୍ଙ୍କ କୋର୍ଟରେ ମାମଲାର ଶୁଣାଣି ହେବ। ଏହାପରେ କଡା ସୁରକ୍ଷା ମଧ୍ୟରେ ଗୋପାଳଙ୍କୁ କ୍ରାଇମ୍ବ୍ରାଞ୍ଚ ଫେରାଇ ନେଇଥିଲା। ଅନ୍ୟପଟେ ଗୋପାଳଙ୍କ ପାଇଁ ନିଯୁକ୍ତି ହୋଇଥିବା ଓକିଲ ନାଏକ କହିଛନ୍ତି, ଗୋପାଳଙ୍କ ମାମଲା ଲଢିବା ପାଇଁ ମୋତେ ନିଯୁକ୍ତି ଦିଆଯାଇଛି। ମାମଲାକୁ ନେଇ ଚାର୍ଜଶିଟ୍ରେ ଥିବା ତଥ୍ୟ ପ୍ରମାଣ ଦେଖିବା ପରେ କିଛି କହିହେବ। ଆସନ୍ତା ୯ ତାରିଖ ଭିତରେ ପ୍ରସ୍ତୁତି କରିବାକୁ ପଡିବ ବୋଲି ସେ କହିଥିଲେ। ପୂର୍ବରୁ ଜୁଲାଇ ୧୩ରେ କ୍ରାଇମ୍ବ୍ରାଞ୍ଚ ଜେଏମ୍ଏଫ୍ସି କୋର୍ଟରେ ଅଭିଯୁକ୍ତ ଗୋପାଳଙ୍କୁ ହାଜର କରିଥିଲା। ପ୍ରାୟ ୧୦ ମିନିଟ ଧରି କୋର୍ଟ କାର୍ଯ୍ୟ ଚାଲିଥିଲା। ସେତେବେଳେ ଏହି ମାମଲା ଜିଲା ଜଜ୍ଙ୍କ ପାଖକୁ ହସ୍ତାନ୍ତର କରାଯାଇଥିଲା।
ସୂଚନାଯୋଗ୍ୟ, ଜାନୁୟାରୀ ୨୯ରେ ଝାରସୁଗୁଡ଼ା ଜିଲା ବ୍ରାଜରାଜନଗର ଗସ୍ତରେ ଯାଇଥିବା ବେଳେ ଗାନ୍ଧୀ ଛକରେ ମନ୍ତ୍ରୀ ନବ ଦାସଙ୍କୁ ତତ୍କାଳୀନ ପୋଲିସ ଏଏସ୍ଆଇ ଗୋପାଳ ଦାସ ନିଜ ସର୍ଭିସ୍ ବନ୍ଧୁକରୁ ଗୁଳି କରି ହତ୍ୟା କରିଥିଲେ। ଗିରଫ କରାଯିବା ପରେ ପ୍ରଥମେ ଗୋପାଳଙ୍କୁ ଝାରସୁଗୁଡ଼ା ଜେଲରେ ରଖାଯାଇଥିଲା। ପରେ ତାଙ୍କୁ ଚୌଦ୍ୱାର ଜେଲକୁ ସ୍ଥାନାନ୍ତର କରାଯାଇଛି। ହତ୍ୟାକାଣ୍ଡର ୧୧୮ଦିନ ପରେ କ୍ରାଇମବ୍ରାଞ୍ଚ ୫୩୪ ପୃଷ୍ଠାର ଚାର୍ଜଶିଟ୍ ଦାଖଲ କରିଛି। ଏଥିରେ ୮୯ ଜଣଙ୍କ ସାକ୍ଷ୍ୟ ଓ ଜେରା କରାଯାଇଥିବା ରିପୋର୍ଟ ରହିଛି। ବ୍ୟକ୍ତିଗତ ଆକ୍ରୋଶ ରଖି ନବଙ୍କୁ ଗୋପାଳ ହତ୍ୟା କରିଥିବା ଚାର୍ଜଶିଟ୍ରେ ଉଲ୍ଲେଖ ରହିଛି ା ଏପରି କି ଅଭିଯୁକ୍ତ ଗୋପାଳ ସମ୍ପୂର୍ଣ୍ଣ ସୁସ୍ଥ ମସ୍ତିଷ୍କରେ ଏହି ହତ୍ୟାକାଣ୍ଡ ଘଟାଇଥିଲେ। ଏହା ଏକ ଯୋଜନାବଦ୍ଧ ହତ୍ୟାକାଣ୍ଡ ଥିଲା। ଯଦି ବ୍ୟକ୍ତିଗତ କାରଣ ତା’ହେଲେ ପାରିବାରିକ କିମ୍ବା ଚାକିରି କ୍ଷେତ୍ରକୁ ନେଇ ତାହା ସ୍ପଷ୍ଟ ହୋଇ ନାହିଁ। ଅନ୍ୟପଟେ ଘଟଣାକୁ ଦୀର୍ଘଦିନ ବିତିଯାଇଥିଲେ ମଧ୍ୟ କ୍ରାଇମବ୍ରାଞ୍ଚ ହତ୍ୟା ରହସ୍ୟ ଉପରୁ ପରଦା ହଟାଇପାରି ନାହିଁ।
