ଝାରବନ୍ଧ,୧୨।୬(ଡି.ଏନ୍.ଏ.): ବରଗଡ଼ ଜିଲା ଝାରବନ୍ଧ ଥାନା କୁର୍ଲୁପାଲ ପଞ୍ଚାୟତ ଅଧୀନ ବେହେରାଡୁବୁରୀ ଗ୍ରାମରେ ସୋମବାର ଏକ ଅଘଟଣ ଘଟିଛି। ଜଣେ ନବ ବିବାହିତା ମହିଳା ଆତ୍ମହତ୍ୟା କରିଛନ୍ତି। ମୃତା ମହିଳା ହେଲେ ଅଞ୍ଜଳି ପ୍ରଧାନ(୨୫)। ଖବର ପାଇ ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଦ୍ମପୁର ପଠାଇଛି। ଏ ନେଇ ଝାରବନ୍ଧ ଥାନାରେ ଏକ ଅପମୃତ୍ୟୁ ମାମଲା (ନଂ.୮।୨୩) ରୁଜୁ କରି ପୋଲିସ ତଦନ୍ତ ଚଳାଇଛି।
ମିଳିଥିବା ସୂଚନା ମୁତାବକ, ଝାରବନ୍ଧ ଥାନା ବେହେରାଡୁବୁରୀ ଗ୍ରାମର ଶାନ୍ତିଲାଲ ପ୍ରଧାନଙ୍କ ଝିଅ ଅଞ୍ଜଳି ଗତ ୧ ତାରିଖରେ ପାଇକମାଳ ଥାନା ଅଧୀନ ବରତୁଣ୍ଡା ଗ୍ରାମର ଦୁର୍ଲଭ ପ୍ରଧାନଙ୍କ ପୁଅ ଗଙ୍ଗାଧରଙ୍କୁ ବୈଦିକ ରୀତିରେ ବିବାହ କରିଥିଲେ। ଶନିବାର ଝିଅର ଶାଶୂ ଘର ଲୋକେ ନିଜ ବୋହୂକୁ ଧରି ବେହେରାଡୁବୁରୀ ଗ୍ରାମକୁ ଆସିଥିଲେ। ତେବେ ଅଞ୍ଜଳି ନିଜ ବାପଘରେ ଦଉଡି ଲଗାଇ ଆତ୍ମହତ୍ୟା କରିଥିଲେ। ପରିବାର ଲୋକେ ଘର କବାଟ ବାଡେଇଥିଲେ ମଧ୍ୟ ସେ ନ ଶୁଣିବାରୁ ଝାରବନ୍ଧ ଥାନାକୁ ଖବର ଦେଇଥିଲେ। ଖବର ପାଇ ଝାରବନ୍ଧ ଥାନା ଅଧିକାରୀଙ୍କ ଦାୟିତ୍ୱରେ ଥିବା ପାଇକମାଳ ଥାନାଧିକାରୀ ସୁଶାନ୍ତ କୁମାର ବଢେଇ ସଦଳବଳ ଘଟଣାସ୍ଥଳରେ ପହଞ୍ଚତ୍ କବାଟ ଭାଙ୍ଗି ଖୋଲିବାରୁ ଅଞ୍ଜଳିଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲେ।
