ନୟାଗଡ଼,୨୩।୬(ଲୋକନାଥ ମିଶ୍ର): ନୟାଗଡ଼ ଟାଉନ ଥାନା ଡିଆଁପଡ଼ା ଗାଁର ଚାଷୀ ଶ୍ୟାମ ସୁନ୍ଦର ବେହେରା(୫୯) ଅପହରଣ ଘଟଣାର ନୂଆମୋଡ଼। ଅପହରଣ ଘଟଣାରେ ବାରମ୍ବାର କଥା ବଦଳାଇ ଫସିଲେ ଚାଷୀ ଓ ଉଦ୍ଧାର କରିଥିବା ବ୍ୟକ୍ତି। ଫିଟିଲା ଅପହରଣ ଘଟଣାର ଗୁମର। ଡିଆଁପଡ଼ା ଓ ପଣ୍ଡୁସର ଗାଁଲୋକ ଏକାଠି ହୋଇ ନ୍ୟାୟ କରି ଉଭୟଙ୍କୁ ଅର୍ଥ ଦଣ୍ଡରେ ଦଣ୍ଡିତ କରି ଭବିଷ୍ୟତରେ ମିଥ୍ୟା ନାଟକ କଲେ ପରିସ୍ଥିତି ଭଲ ହେବ ନାହିଁ ଦର୍ଶାଇ ଚେତାବନୀ ଦେଇ ଛାଡିଛନ୍ତି। ସେପଟେ ପୋଲିସ ମାମଲାକୁ ଆଗକୁ ନ ନେଇ ପୂର୍ଣ୍ଣାଛଦ ପକାଇଛି।
ପ୍ରକାଶ ଯେ, ଗତ ୧୯ ତାରିଖ ସୋମବାର ରାତି ୮ଟାରେ ଡିଆଁପଡ଼ା ଗାଁରେ ଗ୍ରାମସଭା ଥିଲା । ଚାଷୀ ଶ୍ୟାମ ସୁନ୍ଦର ବେହେରା ଜଣେ ସଭ୍ୟ ଥିଲେ। ଗାଁ ସଭା ଆରମ୍ଭ ହେବା ପୂର୍ବରୁ ପନିପରିବା କ୍ଷେତକୁ ବୁଲିବାକୁ ଯାଇ ଆଉ ଫେରି ନ ଥିଲେ। ଶ୍ୟାମ ସଭାକୁ ନ ଆସିବାରୁ ପରିବାର ଲୋକଙ୍କୁ ପଚରାଯାଇଥିଲା। ହେଲେ ବିଲରୁ ଫେରି ନ ଥିବା ଜଣା ପଡିବା ପରେ କିଛି ଲୋକ ଡାକିବାକୁ ଯାଇଥିଲେ। ତେବେ ବିଲରେ ଶ୍ୟାମଙ୍କ ଗାମୁଛା ଓ ବ୍ୟବହାର କରୁଥିବା ଭଙ୍ଗା ଟର୍ଚ୍ଚ ଜବତ କରି ଅପହରଣ ସନ୍ଦେହରେ ପୋଲିସକୁ ଖବର ଦେଇଥିଲେ। ସୋମବାରଠାରୁ ବୁଧବାର ପର୍ଯ୍ୟନ୍ତ ଖୋଜାଖୋଜି ଜାରି ରହିଥିଲେ ମଧ୍ୟ ସୁରାକ ମିିଳି ନ ଥିଲା। ବୁଧବାର ରାତିରେ ବାରପଲା ପଣ୍ଡୁସର ଗାଁର କବି ମହାନ୍ତି ସ୍ଥାନୀୟ ପୋଖରୀକୁ ଗାଧୋଇବାକୁ ଯାଇଥିଲେ। ଗାଧୋଇବା ବେଳେ ଏକ ପ୍ରଜାପତି ତାଙ୍କ ଦେହରେ ବାରମ୍ବାର ବସି ଉଡୁଥିଲା। ପୁଣି ବସୁଥିଲା। ପ୍ରଜାପତିକୁ ଠାବ କିଛି ବାଟ ଯିବା ପରେ ଶୁଳିଆମୁଣ୍ଡିଆର ମୂଳିଝରଠାରେ ପ୍ରଜାପତି ଯାଇ ଅଚେତ ଲୋକର ଶରୀରରେ ବସିଥିଲା। ଘଟଣା ସମ୍ପର୍କରେ କବି ଗାଁରେ ଜଣାଇବା ପରେ ସ୍ଥାନୀୟ ଲୋକ ଶ୍ୟାମଙ୍କୁ ଅଚେତ ଅବସ୍ଥାରେ ଡିଆଁପଡ଼ାରେ ଛାଡିଥିଲେ। ପରେ ଗାଁ ପକ୍ଷରୁ ଶ୍ୟାମଙ୍କୁ ନୟାଗଡ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତେବେ ଶ୍ୟାମ ସୁସ୍ଥ ଅଛି ବୋଲି ଡାକ୍ତର କହି ରାତିରେ ଡିସ୍ଚାଜ୍ କରିଥିଲେ। ଏଭଳିସ୍ଥଳେ ଚାଷୀ ଗଣମାଧ୍ୟମକୁ ଓ ଗାଁଲୋକଙ୍କୁ ଭିନ୍ନ ଭିନ୍ନ କଥା କହି ଫସି ଯାଇଥିଲେ। ବିଲ ନିକଟରେ ଖଣ୍ଡିଆ ଭୂତ ରହିଛି। ତା’ର ପ୍ରଭାବରେ କ’ଣ ହେଲା ଜାଣି ପାରିଲେନି। ମଙ୍ଗଳବାର ଜାଣିବାକୁ ପାଇଲେ ସେ ମୁଣ୍ଡିଆରେ ଅଛନ୍ତି। ହେଲେ ଅଖିଆ ଅପିଆ ଯୋଗୁ ଘରକୁ ଆସି ପାରିଲେନି। ପରେ କହିଲେ ପନିପରିବା କ୍ଷେତ ନିକଟରେ ମୋ ଗାଁର ଜଣେ ବୋହୁଙ୍କୁ ଦେଖି ରାତିରେ କ’ଣ ବୁଲୁଛ ପଚାରିଥିଲି। ପରେ ସ୍ବାମୀଙ୍କୁ ଦେଖି ତୁମେ ଦୁହେଁ କ’ଣ ବୁଲୁଛ ପଚାରିବାରୁ ମୋତେ ମାରପିଟ୍ କରିବାକୁ ଉଦ୍ୟମ କରଉଥିବାବେଳେ ମୁଁ ଖସି ମୁଣ୍ଡିଆକୁ ଚାଲି ଯାଇଥିଲି। ହେଲେ ମୁଁ କିଛି ଜାଣି ପାରିଲିନି। ପୁଣି କହିଥିଲେ ଗାମୁଛା ମୋର। ଉଦ୍ଧାର ଟର୍ଚ୍ଚ ମୋର ନୂହେଁ। ମୋ ଟର୍ଚ୍ଚ ମୋ ପାଖରେ ରହିଛି। ଅନ୍ୟପକ୍ଷେ ଗାଁ ଲୋକଙ୍କୁ ମଧ୍ୟ ଭିନ୍ନ ଭିନ୍ନ କଥା କହିଥିଲେ। ସେହିପରି ଉଦ୍ଧାରକାରୀ ବ୍ୟକ୍ତି ମଧ୍ୟ ପ୍ରଜାପତି ଗପ କହି ମିଛ କହୁଥିବା ଜଣାପଡିଥିଲା। ଏଭଳିସ୍ଥଳେ ଉଦ୍ଧାରକାରୀ ବ୍ୟକ୍ତି ଓ ଚାଷୀଙ୍କୁ ଗାଁଲୋକ ସତ କଣ ଜାଣିବାକୁ ପଚରାଉଚୁରା କରିଥିଲା। ଏନେଇ ଡିଆଁପଡ଼ା ଓ ପଣ୍ଡୁସର ଗାଁର କିଛି ଲୋକଙ୍କ ସୂଚନା ଅନୁସାରେ ଚାଷୀ ଅପହରଣ ନେଇ ଚିନ୍ତା ବଢ଼ିଥିଲା। କେବଳ ଡିଆଁପଡ଼ା ନୁହେଁ ଆଖପାଖ ୫ରୁ ୭ଟି ଗାଁ ଖୋଜାଖୋଜିରେ ୩ ଦିନ ପର୍ଯ୍ୟନ୍ତ ସାମିଲ ଥିଲେ। ଗାଁ ଲୋକଙ୍କୁ ମିଥ୍ୟା କହି ଅପହରଣ ନାଟକ ରଚା ଯାଇଥିବା ଜଣାପଡିଥିଲା। ଚାଷୀ ଓ ଉଦ୍ଧାରକାରୀ ବ୍ୟକ୍ତିଙ୍କୁ ବାରମ୍ବାର ପଚରାଉଚୁରା କରାଯାଇଥିଲା। କାହା ସହ କାହାର କଥା ମେଳ ଖାଉ ନ ଥିଲା। ଏଣୁ ଉଭୟଙ୍କୁ ଅର୍ଥ ଦଣ୍ଡରେ ଗାଁ ଲୋକେ ଦଣ୍ଡିତ କରିଛନ୍ତି। ଚାଷୀ ଜଣେ ବ୍ୟକ୍ତିଙ୍କ ଘରେ ରହି ସମସ୍ତଙ୍କୁ ହଇରାଣ କରିଛନ୍ତି। ଏହି ଘଟଣା ପଛରେ ପ୍ରେମ ସମ୍ପର୍କ ରହିଥିବା ଜଣାପଡୁଛି। ପୋଲିସ ମଧ୍ୟ ମିଥ୍ୟା କଥା ଅନୁଭବ କରି ଅଧା ବାଟରେ ତଦନ୍ତକୁ ଶେଷ କରି ଦେଇଛି। ଏନେଇ ନୟାଗଡ ଟାଉନ ଥାନା ଆଇଆଇସି ପ୍ରଜ୍ଞା ପରମିତା ଜେନା କୁହନ୍ତି, ଚାଷୀ କିପରି ଜୀବନ୍ତ ଅବସ୍ଥାରେ ଉଦ୍ଧାର ହେଉ ପୋଲିସ ଚାହୁଁଥିଲା। ଅପହରଣ ଘଟଣାରେ ଚାଷୀ ମିଛ କହୁଥିବାର ଜଣାପଡିଛି। ନିଜେ ଜାଣିଶୁଣି କୁଆଡେ ଚାଲି ଯାଇ ଅପହରଣ ନାଟକ ରୂପ ଦେଇଛି ବୋଲିି ଜଣାପଡିବାରୁ ତଦନ୍ତକୁ ଶେଷ କରି ଦିଆଯାଇଛିି ବୋଲି କହିଛନ୍ତି।
