ପାରଳାଖେମୁଣ୍ଡି(ଗିରିଧାରୀ ପରିଛା): ୧୧।୬: ରଜ ପର୍ବର ଆଗମନ ସହ ଉତ୍ସବମୁଖର ପରିବେଶ ମଧ୍ୟରେ ଉତ୍କଳ ବାଳାଶ୍ରମର ଶିଶୁମାନଙ୍କ ପାଇଁ ଏକ ସ୍ମରଣୀୟ ଦିନ ସୃଷ୍ଟି କରିଛନ୍ତି ଆଇପିଓ ଆକର୍ଷ ରଞ୍ଜନ ପ୍ରଧାନ। ଗଜପତି ଜିଲାର ପାରଳାଖେମୁଣ୍ଡି ସ୍ଥିତ ଏହି ବାଳାଶ୍ରମର ଅନ୍ତେବାସୀମାନଙ୍କୁ ସେ ନିଜ ଉଦ୍ୟମରେ ନୂତନ ପୋଷାକ କିଣାଇ ଦେଇ ରଜର ଆନନ୍ଦକୁ ଆହୁରି ରଙ୍ଗୀନ କରିଛନ୍ତି। ଗୁରୁବାର ସାରେ ଜିଲା ଶିଶୁ ସୁରକ୍ଷା ଅଧିକାରୀ ଅରୁଣ କୁମାର ତ୍ରିପାଠୀଙ୍କ ନେତୃତ୍ୱରେ ବାଳାଶ୍ରମର ଶିଶୁମାନଙ୍କୁ ଏକ ସପିଂ ମଲ୍କୁ ନିଆଯାଇଥିଲା। ସେଠାରେ ପ୍ରତ୍ୟେକ ଶିଶୁ ନିଜ ପସନ୍ଦ ଅନୁଯାୟୀ ପୋଷାକ ବାଛିଥିଲେ। ନୂଆ ପୋଷାକ ପାଇବା ପରେ ସେମାନଙ୍କ ମୁହଁରେ ଦେଖାଯାଇଥିବା ଖୁସି ଓ ଉତ୍ସାହ ସମସ୍ତଙ୍କ ମନକୁ ଛୁଇଁଥିଲା।
ଆଇପିଓ ଆକର୍ଷ ରଞ୍ଜନ ପ୍ରଧାନ କହିଛନ୍ତି, ମୋ ବାପା ସବୁବେଳେ ଅସହାୟ ଓ ଅନାଥ ଶିଶୁଙ୍କ ସେବା କରିବାକୁ ପ୍ରେରଣା ଦେଇ ଆସିଛନ୍ତି। ସେହି ଆଦର୍ଶକୁ ଆଗକୁ ନେବା ପାଇଁ ମୁଁ ମୋର ଏକ ମାସର ଦରମା ସମାଜସେବାରେ ବ୍ୟୟ କରିବାକୁ ନିଷ୍ପତ୍ତି ନେଇଥିଲି। ଆଜି ଏହି ଶିଶୁମାନଙ୍କ ହସ ଦେଖି ମୋତେ ଅପାର ସନ୍ତୋଷ ମିଳିଛି। ଜିଲା ଶିଶୁ ସୁରକ୍ଷା ଅଧିକାରୀ ଅରୁଣ କୁମାର ତ୍ରିପାଠୀ କହିଛନ୍ତି, ରଜ ପୂର୍ବରୁ ଶିଶୁମାନଙ୍କ ପାଇଁ ନୂତନ ପୋଷାକ ବ୍ୟବସ୍ଥା କରିବାର ଯୋଜନା ଥିଲା। ଆଇପିଓ ପ୍ରଧାନଙ୍କ ସହଯୋଗ ଏହି ଉଦ୍ୟମକୁ ସଫଳ କରିଥିବା ବେଳେ ଶିଶୁମାନଙ୍କ ମୁହଁରେ ହସ ଫୁଟାଇବା ହିଁ ଏହାର ସବୁଠାରୁ ବଡ଼ ସଫଳତା ବୋଲି ସେ କହିଛନ୍ତି। ମାନବିକତା ଓ ସାମାଜିକ ଦାୟିତ୍ୱବୋଧର ଏହି ନିଆରା ଉଦାହରଣ ସମାଜର ଅନ୍ୟମାନଙ୍କୁ ମଧ୍ୟ ଏଭଳି ସେବାମୂଳକ କାର୍ଯ୍ୟ ପାଇଁ ପ୍ରେରଣା ଯୋଗାଇବ ବୋଲି ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି।