ଭଦ୍ରକ, ୨୬।୨ (ସନାତନ ରାଉତ):୫-ଟି ଅଧ୍ୟକ୍ଷ ଶନିବାର ଭଦ୍ରକ ଜିଲାର ଧାମନଗର ଓ ଭଣ୍ଡାରିପୋଖରୀ ବ୍ଲକ ଗସ୍ତ ସାରି ଫେରିବା ପରେ ସନ୍ଧ୍ୟାରେ ବିଜେଡିର ଯୁବନେତା ଅସିତ୍ ପଟ୍ଟନାୟକଙ୍କ ବାସଭବନରେ ଭଦ୍ରକ ବିଧାୟକ ବିରୋଧୀଙ୍କ ମେଳି ହୋଇଛି। ନିର୍ବାଚନ ପାଖେଇ ଆସୁଥିବାରୁ ଭଦ୍ରକ ବିଧାନସଭା ଟିକେଟ୍ ପାଇଁ ଅସିତ୍ଙ୍କୁ ତାଙ୍କର ସମର୍ଥକମାନେ ନୀରବ ନ ରହି ନିଜର ନେତୃତ୍ୱ ଜାହିର କରିବାକୁ ଚାପ ପକାଉଥିବାର ଭିଡିଓ ଭାଇରାଲ ହେଉଛି। ଭଦ୍ରକ ପୌରାଧ୍ୟକ୍ଷାଙ୍କ ସ୍ବାମୀ ଜାହିଦ୍ ହବିବ ନୀରବ ନ ରହି ଏବେଠାରୁ ସ୍ବର ଉତ୍ତୋଳନ କରିବାକୁ ଅସିତ୍ଙ୍କୁ କହିବା ସହ ବିଜେଡିରୁ ଟିକେଟ୍ ନ ମିଳିଲେ ଆଗକୁ ଦଳୀୟ ବିଶୃଙ୍ଖଳା ହେବ ବୋଲି ଚେତାବନୀ ଦେଉଥିବା ଭିଡିଓରୁ ଜଣାପଡ଼ିଛି। ଭଦ୍ରକର ବିକାଶ କେବଳ ଚା’ ଖଟିରେ ସୀମିତ ରହିଛି ବୋଲି କହିଥିଲେ।
ସରପଞ୍ଚ ଭରତ ତ୍ରିପାଠୀ, ପଞ୍ଚାନନ ଲେଙ୍କା, ଯୁବନେତା ତପନ ରାଉତ, ନାରାୟଣ ଜେନା, ନାସିରୁଦ୍ଦିନ ଖାଁ, ଶରତ ସ୍ବାଇଁ, ବିପ୍ଳବ ରାଉତଙ୍କ ସମେତ ବହୁ ପୂର୍ବତନ ସରପଞ୍ଚ, ସମିତିସଭ୍ୟ ଓ ଜିଲା ପରିଷଦ ସଭ୍ୟ ଉପସ୍ଥିତ ଥିବା ଜଣାପଡ଼ିଛି। ଏନେଇ ଅସିତ୍ କହିଛନ୍ତି, ୫-ଟି ଅଧ୍ୟକ୍ଷଙ୍କ ଭଦ୍ରକ ଗସ୍ତ କାର୍ଯ୍ୟକ୍ରମ ସାରି ମୁଁ ଘରକୁ ଆସିଥିଲି। ସନ୍ଧ୍ୟାରେ ସମର୍ଥକମାନେ ପହଞ୍ଚତ୍ ଏକାଠି ହୋଇଥିଲେ। ବିଧାୟକଙ୍କ କାର୍ଯ୍ୟରେ ଅସନ୍ତୋଷ ପ୍ରକାଶ କରିବା ସହ ବିଭିନ୍ନ ଅଭିଯୋଗ ଉଠାଇଥିଲେ। ୨୦୧୯ରେ ଟିକେଟ୍ ନ ପାଇ ମୁଁ ନୀରବ ରହିଥିଲି। ଏଥର ତା’ର ପୁନରାବୃତ୍ତି ନ ହେବାକୁ ସେମାନେ ମୋତେ ଚାପ ପକାଇଥିଲେ। ମୋର ଆଶା ଅଛି, ଦଳ ମୋତେ ନ୍ୟାୟ ପ୍ରଦାନ କରିବ। ଲୋକଙ୍କ ନିଷ୍ପତ୍ତିକୁ ମୁଁ ସମ୍ମାନ ଜଣାଇବି। ନିର୍ବାଚନମଣ୍ଡଳୀକୁ କୋଟି କୋଟି ଟଙ୍କା ଆସୁଥିବା ବେଳେ ତାହାର ସଦୁପଯୋଗ ହୋଇପାରୁ ନାହିଁ। ଏହି କାରଣରୁ ନିର୍ବାଚନ ମଣ୍ଡଳୀରେ ଅସନ୍ତୋଷ ବୃଦ୍ଧି ପାଉଛି ବୋଲି ସେ କହିଛନ୍ତି।
