ବେଙ୍ଗାଲୁରୁ,୨୪।୪: ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ଅଧିନାୟକ ରଜତ ପାଟିଦାର ଟସ ଜିତି ପ୍ରଥମେ ଗୁଜରାଟକୁ ବ୍ୟାଟିଂ ପାଇଁ ଆମନ୍ତ୍ରଣ କରିଛନ୍ତି। ତେବେ ମ୍ୟାଚ୍ ଆରମ୍ଭରୁ ହିଁ ଆରସିବି ପାଇଁ ଏକ ବଡ଼ ଝଟକା ଲାଗିଛି। ଦଳର ବିସ୍ଫୋରକ ଓପନର୍ ଫିଲ ସଲ୍ଟ ଆହତ କାରଣରୁ ଏହି ମ୍ୟାଚ୍ରୁ ବାଦ ପଡ଼ିଛନ୍ତି। ଫିଲ ସଲ୍ଟଙ୍କ ସ୍ଥାନରେ ଆରସିବି ଯୁବ ତାରକା ଜ୍ୟାକବ ବେଥଲଙ୍କୁ ସୁଯୋଗ ଦେଇଛି।
ବେଥଲ ଟି-୨୦ ବିଶ୍ୱକପ ସେମିଫାଇନାଲରେ ଭାରତ ବିପକ୍ଷରେ ଏକ ବିସ୍ଫୋରକ ଶତକ ହାସଲ କରି ଚର୍ଚ୍ଚାକୁ ଆସିଥିଲେ। ଚଳିତ ସିଜନରେ ସେ ପ୍ରଥମ ଥର ପାଇଁ ପଡ଼ିଆକୁ ଓହ୍ଲାଇବେ।
ଗୁଜରାଟ ଟାଇଟନ୍ସ ମଧ୍ୟ ନିଜ ଦଳରେ ଦୁଇଟି ପରିବର୍ତ୍ତନ କରିଛି। ୱେଷ୍ଟଇଣ୍ଡିଜର ଅଭିଜ୍ଞ ଅଲରାଉଣ୍ଡର ଜେସନ ହୋଲ୍ଡର ଆଜି ଗୁଜରାଟ ପାଇଁ ଡେବ୍ୟୁ କରିଛନ୍ତି। ହୋଲ୍ଡରଙ୍କ ପାଖରେ ୩୪୨ଟି ମ୍ୟାଚ୍ର ଅଭିଜ୍ଞତା ରହିଛି, ଯେଉଁଥିରେ ସେ ୩୬୫ଟି ୱିକେଟ ନେବା ସହ ୩ ହଜାରରୁ ଅଧିକ ରନ ସଂଗ୍ରହ କରିଛନ୍ତି। ତାଙ୍କ ବ୍ୟତୀତ ସ୍ପିନର ମାନବ ସୁଥାରଙ୍କୁ ମଧ୍ୟ ଦଳରେ ସ୍ଥାନ ମିଳିଛି।
ଚଳିତ ଆଇପିଏଲ୍ରେ ଆରସିବିର ପ୍ରଦର୍ଶନ ବେଶ ଦମଦାର ରହିଛି। ଦଳ ୬ଟି ମ୍ୟାଚ୍ରୁ ୪ଟି ଜିତି ୮ ପଏଣ୍ଟ ସହ ଟେବୁଲର ତୃତୀୟ ସ୍ଥାନରେ ରହିଛି। ଅନ୍ୟପଟେ ଗୁଜରାଟ ୬ଟି ମ୍ୟାଚ୍ରୁ ୩ଟି ଜିତି ୬ ପଏଣ୍ଟ ସହ ସପ୍ତମ ସ୍ଥାନରେ ରହିଛି। ବେଙ୍ଗାଲୁରୁର ଚିନ୍ନାସ୍ବାମୀ ଷ୍ଟାଡିୟମରେ ପ୍ରଥମେ ବ୍ୟାଟିଂ କରି ଜିତିବା ସହଜ ନୁହେଁ, ତେଣୁ ଗୁଜରାଟ ପାଇଁ ଏହି ମ୍ୟାଚ୍ ଏକ ବଡ଼ ଚ୍ୟାଲେଞ୍ଜ ହେବାକୁ ଯାଉଛି।
Dharitri – Odisha’s No.1 Odia Daily