ବ୍ରହ୍ମପୁର ଅଫିସ,୨୨ା୨:ଦିନକ ପରେ ଅର୍ଥାତ୍ ଆସନ୍ତା ବୁଧବାର ଝିଅ ବାହାଘର ନିର୍ଦ୍ଧାରିତ ହୋଇଛି। ଅନ୍ୟପଟେ ତାଙ୍କ ବାପା ଅନ୍ୟ ଜଣେ ମହିଳାଙ୍କୁ ବଳାତ୍କାର କରିବା ଅଭିଯୋଗରେ ପୋଲିସ ତାଙ୍କୁ ଗିରଫ କରିଛି। ଅଭିଯୁକ୍ତ ଜଣଙ୍କ ବ୍ରହ୍ମପୁର ବଡବଜାର ଥାନା ଅଞ୍ଚଳରେ ରହୁଥିବା ଅଭି ପ୍ରଧାନ (୪୮)। ପୋଲିସ ସୋମବାର ଉଭୟ ପୀଡ଼ିତା ଓ ଅଭିଯୁକ୍ତଙ୍କ ଏମ୍କେସିଜିରେ ଡାକ୍ତରୀ ମାଇନା ପରେ କୋର୍ଟରେ ପୀଡ଼ିତାଙ୍କ ବୟାନ ରେକର୍ଡ କରାଯାଇଛିି। ମାମଲା ନଂ.୩୬/୨୨ରେ ଅଭିଯୁକ୍ତଙ୍କୁ ସୋମବାର କୋର୍ଟ ଚାଲାଣ କରାଯାଇଛି। ପ୍ରକାଶ ଯେ, ପୀଡ଼ିତା ବିବାହିତା ହୋଇଥିବା ବେଳେ ତାଙ୍କର ଏକ ପୁତ୍ରସନ୍ତାନ ରହିଛି। ସେ ଭଞ୍ଜନଗର ଅଞ୍ଚଳରେ ରହୁଥିଲେ। ଅନ୍ୟପଟେ ପୀଡ଼ିତା ଜଣେ ଭଲ ଗାୟିକା। ସେ ବିଭିନ୍ନ ଅପେରା ଓ ନାଟକରେ ଗୀତ ଗାଇଥାନ୍ତି। କୌଶଳକ୍ରମେ ଅଭି ଉକ୍ତ ମହିଳାଙ୍କୁ ପ୍ରଲୋଭନ ଦେଖାଇ ବ୍ରହ୍ମପୁର ଆଣିଥିଲେ। ସେ ରହୁଥିବା ସାହିରେ ଏକ ଘରଭଡା ନେଇ ସେଠାରେ ତାଙ୍କୁ ରଖିଥିଲେ। ପରେ ପୀଡ଼ିତାଙ୍କ ଅନିଚ୍ଛା ସତ୍ତ୍ୱେ ତାଙ୍କୁ ଅଭି ବଳାତ୍କାର କରିଥିଲେ। ଏକଥା କାହାକୁ କହିଲେ ତୋର ଏକମାତ୍ର ପୁଅକୁ ଜୀବନରେ ମାରିଦେବାକୁ ଅଭି ପୀଡ଼ିତାଙ୍କୁ ଧମକ ଦେଇଥିଲେ। ଏନେଇ ପୀଡ଼ିତା ରବିବାର ବଡବଜାର ଥାନାରେ ଲିଖିତ ଅଭିଯୋଗ କରିଥିଲେ।
