ଭୁବନେଶ୍ୱର, ୨୩।୪(ସୁନିତ୍ ମିଶ୍ର):ଦେଶରେ ୭ଟି ପର୍ଯ୍ୟାୟ ମଧ୍ୟରୁ ଆସନ୍ତା ମେ ୧୩ରୁ ଓଡ଼ିଶାରେ ୪ଟି ପର୍ଯ୍ୟାୟରେ ଭୋଟ୍ ହେବ। ଯଦିଓ ରାଜ୍ୟର ୩ ପ୍ରମୁଖ ଦଳ ନିଜର ଶତପ୍ରତିଶତ ବିଧାନସଭା ପ୍ରାର୍ଥୀ ତାଲିକା ପ୍ରକାଶ କରିନାହାନ୍ତି, ତଥାପି ତାହାର ପାଖାପାଖି ପହଞ୍ଚିଲେଣି। ସେହିକ୍ରମରେ ଆସନ୍ତା ୧୩ରୁ ଓଡ଼ିଶାରେ ହେବାକୁ ଥିବା ପ୍ରଥମ ପର୍ଯ୍ୟାୟ ଭୋଟ୍ ଲାଗି ନାମାଙ୍କନପତ୍ର ଦାଖଲ କାର୍ଯ୍ୟ ଆରମ୍ଭ ହୋଇସାରିଲାଣି। ତେଣୁ ଖୁବଶୀଘ୍ର ସବୁ ଦଳର ତାରକା ପ୍ରଚାରକମାନେ ମଇଦାନକୁ ଓହ୍ଲାଇବାକୁ ଏକ ପ୍ରକାର ଯୋଜନା କରିସାରିଲେଣି। ବିଜେଡି ପାଇଁ ମୁଖ୍ୟମନ୍ତ୍ରୀ ତଥା ଦଳର ସଭାପତି ନବୀନ ପଟ୍ଟନାୟକ ପ୍ରଚାରର ମଙ୍ଗ ଧରିବେ। ସେହିଭଳି ଭାଜପା ପାଇଁ ଦଳର ରାଷ୍ଟ୍ରୀୟ ଅଧ୍ୟକ୍ଷ ଏବଂ କଂଗ୍ରେସ ପାଇଁ ପୂର୍ବତନ ଅଖିଳ ଭାରତ କଂଗ୍ରେସ କମିଟି (ଏଆଇସିସି) ସଭାପତି ରାହୁଲ ଗାନ୍ଧୀ ପ୍ରଚାର କରିବେ। ଏନେଇ ଏକ ପ୍ରକାର ତାରିଖ ମଧ୍ୟ ସ୍ଥିର ହୋଇସାରିଛି। ତେବେ ସବୁ ଦଳ ନିଜର ପ୍ରଚାର କାର୍ଯ୍ୟକ୍ରମ କିପରି କରୁଛନ୍ତି ତାହା ଉପରେ ସମସ୍ତଙ୍କ ନଜର ରହିଛି।
୨୪ ତାରିଖରେ ନବୀନ ହିଞ୍ଜିଳିରୁ ନିଜର ପ୍ରଚାର କାର୍ଯ୍ୟକ୍ରମ ଆରମ୍ଭ କରିବେ। ଏହାପରେ ପ୍ରଥମ ପର୍ଯ୍ୟାୟରେ ହେବାକୁ ଥିବା ୪ ଲୋକ ସଭା ଏବଂ ଏହା ଅନ୍ତର୍ଗତ ୨୮ ବିଧାନସଭା ଆସନର ପ୍ରଚାର ମଇଦାନକୁ ନବୀନ ଓହ୍ଲାଇବେ। ସେହିକ୍ରମରେ ଆସନ୍ତା ୨୫ ତାରିଖରେ ରାୟଗଡାରେ ନବୀନଙ୍କ ପ୍ରଚାର କାର୍ଯ୍ୟକ୍ରମ ରହିଥିବା ଦଳ ଯୋଜନା କରିଛି। ସେହିପରି ନିର୍ବାଚନ ସମୟରେ ପ୍ରଥମ ଥର ପାଇଁ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଆସନ୍ତା ୨୫ ତାରିଖରେ ଓଡ଼ିଶା ଗସ୍ତରେ ଆସିବାକୁ ଯୋଜନା କରିଛନ୍ତି। ସୋନପୁରଠାରେ ଶାହାଙ୍କ ପ୍ରଚାର କାର୍ଯ୍ୟକ୍ରମ ରହିଛି। ଏହି ଗସ୍ତସୂଚୀ ଆସିବାର ଦିନକ ପୂର୍ବରୁ ଶାହା ଏକ ଜାତୀୟ ଗଣମାଧ୍ୟମରେ ନବୀନଙ୍କ ସହ ସାମ୍ନାସାମ୍ନି ଲଢ଼େଇ ହେବ ବୋଲି ସେ ମତ ରଖିଥିଲେ। ତାଙ୍କ ରାଜ୍ୟ ନେତାମାନେ ବିଜେଡି ସହିତ ମେଣ୍ଟ କରିବାକୁ ସିଧାସଳଖ ମନା କରିଥିବା ଶାହା ଗଣମାଧ୍ୟମ ଆଗରେ କହିଥିଲେ। ଏଭଳି ସ୍ଥିତିରେ ଶାହା ଓଡ଼ିଶା ଗସ୍ତରେ ଆସି ନିଜ ଆଭିମୁଖ୍ୟରେ ବିଜେଡି ପାଇଁ କ’ଣ ରଖୁଛନ୍ତି ତାହା ଉପରେ ସମସ୍ତଙ୍କ ନଜର ରହିଛି। କାରଣ ପୂର୍ବରୁ ମେଣ୍ଟ ଚର୍ଚ୍ଚା, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶା ଗସ୍ତରେ ଆସି ନବୀନଙ୍କୁ ପ୍ରଶଂସା କରିବା, ବିଜେଡି ନେତା କାର୍ତ୍ତିକ ପାଣ୍ଡିଆନ ଏକ ଜାତୀୟ ଗଣମାଧ୍ୟମରେ ପୁଣିଥରେ ନରେନ୍ଦ୍ର ମୋଦି ଦେଶରେ ପ୍ରଧାନମନ୍ତ୍ରୀ ହେବେ ବୋଲି କହିବା କଥା ଏପର୍ଯ୍ୟନ୍ତ ଲୋକଙ୍କ ମନରୁ ଯାଇନାହିଁ। ତେଣୁ ଶାହା ଓଡ଼ିଶା ଆସି ରାଜ୍ୟବାସୀଙ୍କ ଆଗରେ ନିଜର ଆଭିମୁଖ୍ୟ କ’ଣ ରଖୁଛନ୍ତି ତାହା ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି ଚର୍ଚ୍ଚା ହେଉଛି। ଅନ୍ୟପଟେ ଆସନ୍ତା ୨୮ ତାରିଖରେ ରାହୁଲ ଗାନ୍ଧୀଙ୍କ ଓଡ଼ିଶା ଗସ୍ତ କାର୍ଯ୍ୟକ୍ରମ ରହିଛି। ରାହୁଲ କଟକ ଜିଲାର ଏକ କାର୍ଯ୍ୟକ୍ରମରେ ଯୋଗଦେବେ। ତେଣୁ ସେ ଓଡ଼ିଶା ଗସ୍ତରେ ଆସି କଂଗ୍ରେସ କର୍ମୀଙ୍କ ମନରେ କିଭଳି ବଳ ଦେଉଛନ୍ତି ତାହା ମଧ୍ୟ ଦେଖିବାର ବିଷୟ ବୋଲି ଚର୍ଚ୍ଚା ଜୋର୍ ଧରିଛି।
