ବଲାଙ୍ଗିର,୧୧।୫( ସୁନିଲ କୁମାର ମହାନ୍ତି): ଖପ୍ରାଖୋଲ ବ୍ଲକରୁ ଏକ ପରିବାର ନିଜ ସ୍ତ୍ରୀ ଛୁଆ ପିଲା ସହ ରାଜ୍ୟ ବାହାରକୁ ଦାଦନ ଖଟିବାକୁ ଯାଇଥିଲେ। ରାଜ୍ୟ ବାହାରେ କାମ କରୁଥିବାବେଳେ ପରିବାରର ଜଣଙ୍କ ଦେହ ସାମାନ୍ୟ ଅସୁସ୍ଥ ହେବା ପରେ ସେଠାରେ ପ୍ରାଥମିକ ଚିକିତ୍ସା କରି ଟ୍ରେନ ଯୋଗେ ପରିବାର ସହ ବଲାଙ୍ଗିର ଜିଲା ନିଜ ଘରକୁ ଫେରୁଥିଲେ । ଆଜି ସକାଳୁ ପାସେଞ୍ଜର ଟ୍ରେନ ଯୋଗେ ନିଜ ଭିଟାମାଟି ଘରକୁ ଫେରୁଥିବାବେଳେ ବଲାଙ୍ଗିର ଜିଲା ମୁରିବାହାଲ ଷ୍ଟେଶନଠାରେ ଅଚେତ ହୋଇ ପଡିଥିଲେ l ପରିବାର ଲୋଜେ କଣ୍ଟାବାଞ୍ଜି ଷ୍ଟେଶନରେ ଓହ୍ଲାଇଥିଲେ। କଣ୍ଟାବାଞ୍ଜି ଷ୍ଟେଶନରେ ଡାକ୍ତର ଯାଞ୍ଚ କରିବା ପରେ ଡାକ୍ତର ମୃତ ଘୋଷଣା କରିଥିଲେ। ମୃତକ ଦାଦନ ଶ୍ରମିକ ହେଲେ ଖପ୍ରାଖୋଲ ଥାନା ଭାରୁଆମୁଣ୍ଡା ଗାଁର ଲୋକନାଥ ମାଝି ବୋଲି ଜଣାପଡ଼ିଛି l ଲୋକନାଥ ପାଞ୍ଚ ମାସ ପୂର୍ବରୁ ରାଜ୍ୟ ବାହାରକୁ ଦାଦନ ଖଟିବାକୁ ନିଜ ସ୍ତ୍ରୀ ଓ ଛୋଟ ପୁଅକୁ ଧରି କାମ କରିବାକୁ ଯାଇଥିଲେ। ହେଲେ ସୋମବାର ନିଜ ଭିଟାମାଟି ଭରୁଆମୁଣ୍ଡା ଗ୍ରାମ ପହଞ୍ଚିବା ପୂର୍ବରୁ ଶବ ହୋଇ ଫେରିଥିଲେ। କଂଟାବାଞ୍ଜି ଜିଆରପି ରେଳବାଇ ପୋଲିସ ମୃତଦେହକୁ ଜବତ କରି କଣ୍ଟାବାଞ୍ଜି ଡାକ୍ତରଖାନାରେ ବ୍ୟବଚ୍ଛେଦ କରାଇ ପରିବାରବର୍ଗଙ୍କୁ ହସ୍ତାନ୍ତର କରିବା ସହ ତଦନ୍ତ ଆରମ୍ଭ କରିଛି l