ନୂଆଦିଲ୍ଲୀ,୧।୨: ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୬ ବଜେଟ ଉପସ୍ଥାପିତ କରିଛନ୍ତି। ବଜେଟକୁ ନେଇ ନିରାଶା ପ୍ରକାଶ କରିଛନ୍ତି ବିରୋଧୀ ଦଳ ନେତା। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହି ବଜେଟକୁ ତୀବ୍ର ସମାଲୋଚନା କରି ଏହାକୁ ଏକ “ହମ୍ପଟି ଡମ୍ପଟି ବଜେଟ” ବୋଲି ଆଖ୍ୟା ଦେଇଛନ୍ତି। ବଜେଟ ଉପସ୍ଥାପନା ପରେ ଭାରତୀୟ ଶେୟାର ବଜାରରେ ଦେଖାଦେଇଥିବା ବଡ଼ ଧରଣର ହ୍ରାସକୁ ସେ ଏହି ନର୍ସରୀ ରାଇମ୍ ମାଧ୍ୟମରେ କଟାକ୍ଷ କରିଛନ୍ତି।
ମମତା ବାନାର୍ଜୀ ଅଭିଯୋଗ କରିଛନ୍ତି ଯେ, ଏହି ବଜେଟରେ ପଶ୍ଚିମବଙ୍ଗ ପାଇଁ କୌଣସି ଆର୍ଥିକ ସହାୟତା ପ୍ରଦାନ କରାଯାଇ ନାହିଁ। ସେ କହିଛନ୍ତି, “ଏହି ବଜେଟ ଦିଗହୀନ, ଦୂରଦୃଷ୍ଟିହୀନ ଏବଂ ଜନବିରୋଧୀ। ଏହା ମହିଳା, କୃଷକ, ଶିକ୍ଷା ଏବଂ ଅନୁସୂଚିତ ଜାତି ଓ ଜନଜାତି ବିରୋଧୀ।”
#BudgetWithNDTV | “A Humpty Dumpty Budget”: Mamata Banerjee Jabs Centre https://t.co/0dBJmn4Pdn pic.twitter.com/oI49AxTFic
— NDTV (@ndtv) February 1, 2026
କଂଗ୍ରେସ ମଧ୍ୟ ଏହି ବଜେଟକୁ ନେଇ ଅସନ୍ତୋଷ ପ୍ରକାଶ କରିଛି। ବଜେଟରେ କୃଷକ ଓ ଯୁବପିଢ଼ିଙ୍କ ନିଯୁକ୍ତି ପାଇଁ କୌଣସି ଖୋରାକ ନଥିବା ଦଳ ପକ୍ଷରୁ କୁହାଯାଇଛି।
ବଜେଟ ଘୋଷଣା ସମୟରେ ବଜାରରେ ଭୟଙ୍କର ହ୍ରାସ ଦେଖିବାକୁ ମିଳିଥିଲା। ସେନସେକ୍ସ ଦ୍ୱିପ୍ରହର ସମୟରେ ପ୍ରାୟ ୧,୬୦୦ ପଏଣ୍ଟ ହ୍ରାସ ପାଇଥିଲା। ନିଫ୍ଟି ପ୍ରାୟ ୫୦୦ ପଏଣ୍ଟ ତଳକୁ ଖସିଥିଲା। ତେବେ ବଜେଟ ଅଭିଭାଷଣ ଶେଷ ହେବା ପରେ ବଜାର କିଛିଟା ସୁଧାର ଦେଖାଇଛି। ବର୍ତ୍ତମାନ ସେନସେକ୍ସ ୬୦୦ ପଏଣ୍ଟ ଏବଂ ନିଫ୍ଟି ୨୫୦ ପଏଣ୍ଟ ହ୍ରାସ ସହ କାରବାର କରୁଛି।
ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟରେ ବ୍ୟାଙ୍କିଙ୍ଗ କ୍ଷେତ୍ରର ସମୀକ୍ଷା ପାଇଁ ଏକ “ହାଇ ଲେଭଲ୍ କମିଟି” ଗଠନ ଓ ପରୋକ୍ଷ ଟିକସ କ୍ଷେତ୍ରରେ କେତେକ ସଂସ୍କାର ପାଇଁ ପ୍ରସ୍ତାବ ରଖିଛନ୍ତି। ଅନ୍ୟପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ବଜେଟକୁ “ଐତିହାସିକ” ବୋଲି ବର୍ଣ୍ଣନା କରିଛନ୍ତି। ଏହା ୧୪୦ କୋଟି ଭାରତୀୟଙ୍କ ଆଶା ଆକାଂକ୍ଷାର ପ୍ରତିଫଳନ ଏବଂ ‘ବିକଶିତ ଭାରତ-୨୦୪୭’ ର ମାର୍ଗଚିତ୍ର ବୋଲି ସେ କହିଛନ୍ତି।
ମୁଡିସ୍ ରେଟିଙ୍ଗ୍ସ ଅନୁଯାୟୀ, ଏହି ବଜେଟ ଏକ ରଣନୈତିକ ପଦକ୍ଷେପ ହୋଇଥିଲେ ମଧ୍ୟ ଏହା କୌଣସି ବଡ଼ ଧରଣର ପରିବର୍ତ୍ତନ ଆଣିବା ଭଳି ମନେ ହେଉନାହିଁ।
