ଆଡିଲେଡ୍,୫ା୧୧(ପି.ଟି): ଅଷ୍ଟ୍ରେଲିଆରେ ଅନୁଷ୍ଠିତ ଟି୨୦ ବିଶ୍ୱକପ୍ରେ ଘରୋଇ ଦଳ ଆଫଗାନିସ୍ତାନ ବିପକ୍ଷରେ ବିଜୟ ସହିତ ଏହାର ଅଭିଯାନ ଶେଷ କରିଛି। ରଶିଦ୍ ଖାନଙ୍କ ବିସ୍ଫୋରକ ବ୍ୟାଟିଂ ଝଡକୁ ସାମ୍ନା କରିଥିବା ଅଷ୍ଟ୍ରେଲିଆ ଶେଷ ଓଭରରେ ସଂଘର୍ଷପୂର୍ଣ୍ଣ ବିଜୟ ହାସଲ କରିଥିଲେ ହେଁ ସେମିଫାଇନାଲ ପ୍ରବେଶ ପାଇଁ ଏହାକୁ ଇଂଲଣ୍ଡ ଓ ଶ୍ରୀଲଙ୍କା ମ୍ୟାଚର ଫଳାଫଳକୁ ଅପେକ୍ଷା କରିବାକୁ ପଡିବ। ପ୍ରଥମେ ବ୍ୟାଟିଂ କରିଥିବା ଅଷ୍ଟ୍ରେଲିଆ ୨୦ ଓଭରରେ ୬ ଉଇକେଟରେ ୧୬୮ ରନ୍ କରିଥିଲା। ଆଫଗାନିସ୍ତାନକୁ ବିଜୟ ପାଇଁ ଶେଷ ୩ ଓଭରରେ ୪୬ ରନ୍ ଆବଶ୍ୟକ ଥିଲା। ରଶିଦ୍ ଖାନଙ୍କ ୨୩ ବଲ ୪୮ ରନ ସତ୍ତ୍ୱେ ଆଫଗାନିସ୍ତାନ ୪ ରନ୍ରେ ପରାସ୍ତ ହୋଇଥିଲା।
ଆଫଗାନିସ୍ତାନ ଟସ୍ ଜିତି ପ୍ରଥମେ ବୋଲିଂ କରିଥିଲା। ଗ୍ଲେନ୍ ମ୍ୟାକ୍ସଓ୍ବେଲ ଅପରାଜିତ ୫୪ ରନ୍ କରିଥିବା ବେଳେ ମିଚେଲ ମାର୍ଶ ୪୫ ରନ କରିଥିଲେ। ଅନ୍ୟମାନଙ୍କ ମଧ୍ୟରେ ଡେଭିଡ୍ ଓ୍ବାର୍ନର ଓ ମାର୍କ୍ସ ଷ୍ଟୋଇନିସ୍ ୨୫ ରନ୍ ଲେଖାଏ ସଂଗ୍ରହ କରିଥିଲେ। ମ୍ୟାକ୍ସଓ୍ବେଲଙ୍କ ୩୨ ବଲ୍ ଇନିଂସରେ ୬ ଚୌକା ଓ ୨ ଛକା ସାମିଲ ଥିଲା। ଆଫଗାନିସ୍ତାନ ପକ୍ଷରୁ ନବୀନ ଉଲ୍ ହକ୍ ସର୍ବାଧିକ ୩ ଉଇକେଟ ନେଇଥିଲେ। ଅନ୍ୟମାନଙ୍କ ମଧ୍ୟରେ ଫଜହଲକ୍ ଫାରୁକି ୨ ଉଇକେଟ ନେଇଥିଲେ। ଏକାଧିକ କ୍ୟାଚ୍ ଓ ରନ ଆଉଟ ସୁଯୋଗ ହାତଛଡା କାରଣରୁ ଆଫଗାନିସ୍ତାନ ଅନୂ୍ୟନ ୧୫-୨୦ ରନ୍ ବ୍ୟୟ କରିଥିଲା। ଆଫଗାନିସ୍ତାନ ୧୬୯ ରନ୍ ଲକ୍ଷ୍ୟର ପିଛା କରି ୯୯/୨ ରହିଥିଲା। ତେବେ ମାତ୍ର ୪ ରନରେ ୪ ଉଇକେଟ ହରାଇ ଦଳ ସଙ୍କଟରେ ପଡିଥିଲା। ୧୮ ବଲରୁ ୪୮ ରନ୍ ଆବଶ୍ୟକ ଥିବା ବେଳେ ଆଡିଲେଡ ଓଭାଲରେ ରଶିଦ୍ଙ୍କ କାରନାମା ଦେଖିବାକୁ ମିଳିଥିଲା। ସେ ୨୩ ବଲ୍ ଖେଳି ୩ ଚୌକା ଓ ୪ ଛକା ସହିତ କ୍ୟାରିୟର ଶ୍ରେଷ୍ଠ ଅପରାଜିତ ୪୮ ରନ୍ କରିଥିଲେ। ଅନ୍ତିମ ଓଭରରେ ୨୨ ରନ୍ ଆବଶ୍ୟକ ଥିବା ବେଳେ ଆଫଗାନିସ୍ତାନ ୪ରନ୍ ଦୂରରେ ରହି ଯାଇଥିଲା। ଗ୍ଲେନ ମ୍ୟାକ୍ସଓ୍ବେଲଙ୍କୁ ମ୍ୟାଚର ଶ୍ରେଷ୍ଠ ଖେଳାଳି ଘୋଷଣା କରାଯାଇଥିଲା।
ସଂକ୍ଷିପ୍ତ ସ୍କୋର
ଅଷ୍ଟ୍ରେଲିଆ ୨୦ ଓଭରରେ ୧୬୮/୬ (ଗ୍ଲେନ୍ ମ୍ୟାକ୍ସଓ୍ବେଲ୍-୫୪, ମିଚେଲ ମାର୍ଶ-୪୫, ମାର୍କ୍ସ ଷ୍ଟୋଇନିସ-୨୫, ନବୀନ ଉଲ ହକ୍-୩/୨୨, ଫଜହଲକ୍ ଫାରୁକି-୨/୨୯, ରଶିଦ୍ ଖାନ୍-୧/୨୯)। ଆଫଗାନିସ୍ତାନ ୨୦ ଓଭରରେ ୧୬୪/୭ (ରଶିଦ୍ ଖାନ- ୪୮*, ଗୁଲବାଦିନ ନାଏବ-୩୯, ରହମାନଉଲ୍ଲା ଗୁରବାଜ-୩୦, ଆଡାମ ଜାମ୍ପା-୨/୨୨, ଜୋଶ ହାଜେଲଉଡ୍-୨/୩୩, କେନ୍ ରିଚାର୍ଡସନ୍-୧/୪୮)।
