କାଏମା,୧୪ା୬(ଶିବପ୍ରସାଦ ମହାନ୍ତି): ଧର୍ମଶାଳା ବ୍ଲକ୍ ଅନ୍ତର୍ଗତ କାଏମା କେଲୁଅ ନଦୀରୁ ଦୈନିକ ଶହଶହ ଟ୍ରିପ୍ ବାଲି ପରିବହନ ହେଉଛି। ବାଲି ବୋଝେଇ ହାଇୱା, ଡମ୍ଫର ଓ ଟ୍ରାକ୍ଟରଗୁଡ଼ିକ ଓଭର ଲୋଡ୍କରି କାଏମା ବ୍ରିଜ୍ ଓ ବଜାର ମଧ୍ୟ ଦେଇ ଯାତାୟାତ କରୁଛନ୍ତି। ଫଳରେ ରାସ୍ତାରେ ପ୍ରାୟ ଆଣ୍ଠୁଏ ଉଚ୍ଚର ବାଲି ଜମାହୋଇ ରହୁଛି। ଏଥିଯୋଗୁ ଦୁର୍ଘଟଣା ଘଟି ଅନେକ ଲୋକଙ୍କ ଜୀବନଯାଉଛି। ବାଲି ପରିବହନ ସମୟରେ ଗାଡ଼ିରେ ପାଲ ଢାଙ୍କିବାର ନିୟମ ରହିଛି। ଯଦି କୌଣସି ଗାଡ଼ି ବିନା ପାଲରେ ରାସ୍ତାରେ ବାଲି, ଗୋଡ଼ି କିମ୍ବା ମେଟାଲ ପରିବହନ କଲେ ତେବେ ସମ୍ପୃକ୍ତ ଗାଡ଼ି ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପରିବହନ ବିଭାଗ ଚେତାବନୀ ଦେଇଛି। ହେଲେ ଏସବୁ ନିୟମ ଏଠି କେବଳ କାଗଜକଲମରେ ସୀମିତ ଥିବା ଦେଖିବାକୁ ମିଳିଛି। ଗାଡ଼ିଗୁଡ଼ିକ ବିନା ପାଲରେ ଓଭର ଲୋଡ୍କରି ଦ୍ରୁତଗତିରେ ଯାତାୟାତ କରୁଥିବାରୁ ଗଦାଗଦା ବାଲି ବ୍ରିଜ୍ ମୁଣ୍ତ ଓ ରାସ୍ତା ସାରା ପଡୁଛି। ଏହା ଦୁର୍ଘଟଣାର ମୁଖ୍ୟ କାରଣ ହୋଇଥିଲେ ବି ପ୍ରଶାସନ ଏ ସବୁ ଦେଖି ଚୁପ୍ ରହିଛି। ଏହି ରାସ୍ତା ପାର୍ଶ୍ୱରେ ସରସ୍ବତୀ ଶିଶୁ ବିଦ୍ୟାମନ୍ଦିର ଓ ଲାଲବାହାଦୁର ଉଚ୍ଚ ବିଦ୍ୟାଳୟ ରହିଛି। ଏଥିସହ ଧର୍ମଶାଳା ମହାବିଦ୍ୟାଳୟକୁ ଉକ୍ତ ରାସ୍ତା ସଂଯୋଗ କରୁଛି। ତେଣୁ ଛାତ୍ରୀଛାତ୍ରଙ୍କ ଏହା ନିତିଦିନିଆ ରାସ୍ତା ହୋଇଛି।
ଗତ ୭ ତାରିଖ ବୁଧବାର ରତପୁର ଗ୍ରାମର ନିରଞ୍ଜନ କର ଓ ତାଙ୍କ ସ୍ତ୍ରୀ ମଞ୍ଜୁଲତା ମିଶ୍ର ବାଇକ୍ରେ ଜାରକା ଯାଉଥିବାବେଳେ କାଏମା ବଜାର ମଧ୍ୟରେ ଏକ ବାଲି ବୋଝେଇ ଟ୍ରାକ୍ଟର ଦ୍ରୁତଗତିରେ ଆସି ସେମାନଙ୍କୁ ଧକ୍କା ଦେଇଥିଲା। ଫଳରେ ମଞ୍ଜୁଲତା ପଡ଼ି ଯାଇଥିଲେ ଓ ଟ୍ରାକ୍ଟର ତାଙ୍କ ଗୋଡ଼ରେ ଚଢ଼ିଯାଇଥିଲା। ତାଙ୍କୁ ପ୍ରଥମେ ଧର୍ମଶାଳା ସ୍ବାସ୍ଥ୍ୟକେନ୍ଦ୍ର ଓ ପରେ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଥିଲା। ତାଙ୍କ ପାଦ କଟାଯିବ ବୋଲି ଡାକ୍ତର କହିଥିବା ସୂଚନା ମିଳିଛି। ସେହିପରି ଗତ ରବିବାର ଖବରଦାତା ସୁଶାନ୍ତ ସାହୁ ବାଇକ୍ ଯୋଗେ ଯିବା ସମୟରେ କାଏମା ବ୍ରିଜ୍ରେ ବାଇକ୍ ଚକା ଖସି ଯିବାରୁ ସେ ଏକ ବାଲି ବୋଝେଇ ହାଇୱା ପଛପଟେ ପଡ଼ିଯାଇଥିଲେ। ସୌଭାଗ୍ୟ ତାଙ୍କର କୌଣସି କ୍ଷତି ହୋଇନାହିଁ। ରାସ୍ତାରେ ବାଲି ପଡୁଥିବାରୁ ଦୈନିକ ଏହିଭଳି ଅନେକ ଲୋକ ଦୁର୍ଘଟଣାର ଶିକାର ହେଉଛନ୍ତି।
ଅନ୍ୟପକ୍ଷରେ ଆଗକୁ ବର୍ଷାଦିନ ଆସୁଥିବାରୁ ନଦୀରେ ପାଣି ହୋଇଯିବ ବୋଲି ସ୍ଥାନୀୟ ଜଣେ କଣ୍ଟ୍ରାକ୍ଟର ଦୈନିକ ଶହ ଶହ ଟ୍ରିପ୍ ବାଲି ନେଇ ଗଚ୍ଛିତ କରି ରଖୁଛନ୍ତି। ଏହାକୁ ପରବର୍ତ୍ତୀ ସମୟରେ ଚଢ଼ା ଦରରେ ବିକ୍ରି କରାଯିବ ବୋଲି ସୂଚନା ମିଳିଛି। ଏସବୁ ପ୍ରଶାସନର ଜାଣତରେ ହେଉଛି କି ଅଜାଣତରେ ହେଉଛି ତାହାକୁ ନେଇ ଲୋକଙ୍କ ମନରେ ପ୍ରଶ୍ନବାଚୀ ସୃଷ୍ଟି ହୋଇଛି। ତେଣୁ ଲୋକଙ୍କ ସ୍ବାର୍ଥକୁ ଦୃଷ୍ଟି ଦେଇ ତୁରନ୍ତ ପ୍ରଶାସନ ଏ ଦିଗରେ ପଦକ୍ଷେପ ନେବାକୁ ଦାବି ହୋଇଛି।
