ଅନୁଗୋଳ ଅଫିସ,୯ା୯: ଦୀର୍ଘ ଦୁଇ ବର୍ଷ ପରେ ଅନୁଗୋଳ ସହରରେ ହୋଇଥିଲା ଗଣେଶ ପୂଜା। ପୂଜା ପରି ଭସାଣିକୁ ଆକର୍ଷଣୀୟ କରିବାକୁ ପୂର୍ବରୁ ହୋଇଥିଲା ଆବଶ୍ୟକ ପ୍ରସ୍ତୁତି। ହେଲେ ବୁଧବାର ଭସାଣି ବେଳେ ସମସ୍ତ ବ୍ୟବସ୍ଥାରେ ଅବ୍ୟବସ୍ଥା ଜଳ ଜଳ ଦିଶିଥିଲା। ଆରମ୍ଭରୁ ଶେଷଯାଏ ବିଭ୍ରାଟ ଦେଖିବାକୁ ମିଳିଥିଲା। ନା ସେଣ୍ଟ୍ରାଲ ପୂଜା କମିଟି ନେଇଥିବା ଦାୟିତ୍ୱ ତୁଲାଇ ପାରିଥିଲା ନା ଟ୍ରାଫିକକୁ ନିୟନ୍ତ୍ରଣ କରିବାରେ ସଫଳ ହୋଇଥିଲା ପୋଲିସ। ଏ ନେଇ କେତେକ ପୂଜା କମିଟି ଓ ସହରବାସୀ ତୀବ୍ର ଅସନ୍ତୋଷ ବ୍ୟକ୍ତ କରିବା ସହ ସେଣ୍ଟ୍ରାଲ ପୂଜା କମିଟି କର୍ମକର୍ତ୍ତା ଏବଂ ପୋଲିସ ଅଧିକାରୀଙ୍କ ଉପରେ ଦୋଷ ଲଦିଛନ୍ତି।
କୋଭିଡ୍ ପରେ ଅନୁଗୋଳ ସହରରେ ସବୁଠାରୁ ବଡ଼ ଜନ ସମାଗମ ଭସାଣି ବେଳେ ହୋଇଥିଲା। ୫୦ ହଜାରରୁ ଊର୍ଦ୍ଧ୍ୱ ଦର୍ଶକ ଉପସ୍ଥିତ ଥିଲେ। କିନ୍ତୁ ଶୋଭାଯାତ୍ରା ନିର୍ଦ୍ଧାରିତ ସମୟ ଅପରାହ୍ନ ୩ଟାରେ ହୋଇପାରି ନ ଥିଲା। ଆରମ୍ଭରୁ ବିଭ୍ରାଟ ସହ ୨ ଘଣ୍ଟା ବିଳମ୍ବରେ ହୋଇଥିବା ଭସାଣି ଶୋଭାଯାତ୍ରା ଠିକଣା ସମୟରେ ମଧ୍ୟ ଶେଷ ହୋଇପାରି ନ ଥିଲା। କେଉଁ କମିଟି ଅଧାରୁ ମେଢ଼ ନେଇ ଚାଲିଯାଇଥିଲା ତ ଆଉ କିଏ କେଉଁ କମିଟି ବାଟରୁ ଫେରିଆସିଥିଲା। ଶୃଙ୍ଖଳା ତଥା ଭସାଣିକୁ ବ୍ୟବସ୍ଥିିତ କରିବାକୁ ଗଢ଼ା ହୋଇଥିବା ସେଣ୍ଟ୍ରାଲ ପୂଜା କମିଟି ମଧ୍ୟ ସ୍ଥାଣୁ ପାଲଟି ଯାଇଥିଲା। କମିଟି ସଭାପତି ରଶ୍ମିରଞ୍ଜନ ସାମଲ ଓ ସମ୍ପାଦକ ଶିବାନୀ ଗୌଡ଼ ଶୋଭାଯାତ୍ରା ବେଳେ ଉପସ୍ଥିତ ଥିଲେ ମଧ୍ୟ ବିଭ୍ରାଟକୁ ରୋକିପାରି ନ ଥିଲେ। ଅନ୍ୟ କର୍ମକର୍ତ୍ତାମାନେ ମଧ୍ୟ ଧରାଛୁଅଁା ଦେଇ ନ ଥିଲେ। ବିଚାର ମଞ୍ଚରେ ଅଧିକାରୀମାନେ ହଇରାଣ ହରକତ ହେଉଥିଲେ ବି ତାହା କାହାକୁ ଦେଖାଯାଇ ନ ଥିଲା। ଏହାକୁ ନେଇ ବିଭିନ୍ନ ପୂଜା କମିଟି ଅସନ୍ତୋଷ ବ୍ୟକ୍ତ କରିଛନ୍ତି। ୨ ହଜାର ଟଙ୍କା ଲେଖାଏ ଦେଇ ଶୋଭାଯାତ୍ରାରେ ସାମିଲ ହୋଇଥିଲେ ମଧ୍ୟ ଶୃଙ୍ଖଳିତ ଭାବେ ଭସାଣି କରିପାରି ନ ଥିବା ପୂଜା କମିଟି କର୍ମକର୍ତ୍ତମାନେ ପ୍ରକାଶ କରିଛନ୍ତି। ସେହିପରି କିଭଳି ଶୃଙ୍ଖଳିତ ଭାବେ ମେଲଣ ହେବ, ସେଥିପାଇଁ ଜଣେ ଆଡିଶନାଲ ଏସ୍ପିଙ୍କ ସହ ଜଣେ ଡିଏସ୍ପି, ୪ ଜଣ ଇନ୍ସପେକ୍ଟର, ୨୦ ଊର୍ଦ୍ଧ୍ୱ ଅଧିକାରୀ ଓ ୨ ପ୍ଲାଟୁନ୍ ଫୋର୍ସ ମୁତୟନ କରାଯାଇଥିଲା। ହେଲେ ଏତେ ସଂଖ୍ୟାରେ ପୋଲିସ ବ୍ୟବସ୍ଥା କରାଯାଇଥିଲେ ମଧ୍ୟ ଟ୍ରାଫିକ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଥିଲା। ଏପରି କି ଏକାଧିକ ଆମ୍ବୁଲାନ୍ସ ଅଟକି ଯାଇଥିଲା। ଏ ନେଇ ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି, ଏଥିପ୍ରତି ଆଗକୁ ଦୃଷ୍ଟି ଦିଆଯିବ। ଯେଭଳି ଭାବେ ଆମ୍ବୁଲାନ୍ସ ନ ଅଟକିବ ସେ ନେଇ ବ୍ୟବସ୍ଥା କରାଯିବ। ସେଣ୍ଟ୍ରାଲ ପୂଜା କମିଟି ସଭାପତି ରଶ୍ମିରଞ୍ଜନ ସାମଲ କହିଛନ୍ତି, ଆରମ୍ଭରୁ ଭସାଣି ଶୋଭାଯାତ୍ରାରେ ବିଳମ୍ବ ଯୋଗୁ କିଛିଟା ବିଭ୍ରାଟ ଘଟିଛି। ତେବେ ବଚାର ମଞ୍ଚର ସମସ୍ୟା ଜଣାପଡ଼ିବା ପରେ ତାହାକୁ ଦୂର କରାଯାଇଥିଲା।
