କୋଲକତା,୧।୨: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କେନ୍ଦ୍ର ବଜେଟକୁ ନେଇ ନରେନ୍ଦ୍ର ମୋଦି ସରକାର ଉପରେ ବର୍ଷିଛନ୍ତି। ଆଗାମୀ ଲୋକ ସଭା ନିର୍ବାଚନ ସହିତ ବଜେଟ ସଂଯୋଗ କରି ମମତା ସରକାରଙ୍କୁ ଟାର୍ଗେଟ କରିଛନ୍ତି। ୨୦୨୪ ଲୋକ ସଭା ନିର୍ବାଚନକୁ ଦୃଷ୍ଟିରେ ରଖି ବଜେଟ ପ୍ରସ୍ତୁତ ହୋଇଛି। ଯଦି ତାଙ୍କୁ ଅଧା ଘଣ୍ଟା ଦିଆଯାଏ, ତେବେ ଏହା ଅପେକ୍ଷା ଏକ ଉତ୍ତମ ଜନସାଧାରଣ ଅନୁକୂଳ ବଜେଟ ଉପସ୍ଥାପନ କରିପାରିବେ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ମମତା ବାନାର୍ଜୀ ପଶ୍ଚିମବଙ୍ଗର ବୀରଭୂମ ଜିଲାର ବୋଲପୁରରେ ବୁଧବାର ସରକାରୀ କାର୍ଯ୍ୟକୁ ସମ୍ବୋଧିତ କରି କହିଛନ୍ତି, ଏହି ବଜେଟରେ କୌଣସି ଆଶାର କିରଣ ନାହିଁ। କେନ୍ଦ୍ର ବଜେଟ ଲୋକ ବିରୋଧୀ ଏବଂ ଗରିବ ଲୋକଙ୍କ ଉପରେ ଧ୍ୟାନ ଦଆଯାଇ ନାହିଁ। ଆୟକର ସ୍ଲାବରେ ପରିବର୍ତ୍ତନ କରି କାହାକୁ ଲାଭ ମିଳିବ ନାହିଁ। ଏହି ୟୁନିୟନ ବଜେଟ ଭବିଷ୍ୟତବାଦୀ ନୁହେଁ, ସଂପୂର୍ଣ୍ଣ ସୁବିଧାବାଦୀ, ଲୋକ ଏବଂ ଗରିବ ବିରୋଧୀ। ଏହା କେବଳ ଗୋଟିଏ ଶ୍ରେଣୀର ଲୋକଙ୍କୁ ଉପକୃତ କରିବ। ଦେଶରେ ବେକାରୀ ସମସ୍ୟା ସମାଧାନ କରିବାରେ ଏହା ସାହାଯ୍ୟ କରିବ ନାହିଁ। ୨୦୨୪ ଲୋକ ସଭା ନିର୍ବାଚନକୁ ଦୃଷ୍ଟିରେ ରଖି ଏହା ପ୍ରସ୍ତୁତ କରାଯାଇଛି। ଏହା ଏକ ଡାର୍କ ବଜେଟ। ମୋତେ ଅଧ ଘଣ୍ଟା ଦିଅ, ମୁଁ ଦେଖାଇବି କିପରି ଗରିବଙ୍କ ପାଇଁ ବଜେଟ ପ୍ରସ୍ତୁତ କରିବେ
କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ବୁଧବାର ସଂସଦରେ ୨୦୨୩-୨୪ ପାଇଁ ବଜେଟ ଉପସ୍ଥାପନ କରିଛନ୍ତି। ନୂତନ ଟିକସ ବ୍ୟବସ୍ଥାରେ ବାର୍ଷିକ ଆୟ ୭ ଲକ୍ଷ ଟଙ୍କା ପର୍ଯ୍ୟନ୍ତ ଥିବା ବ୍ୟକ୍ତିଙ୍କ ପାଇଁ କୌଣସି ଟିକସ ପଡିବ ନାହିଁ।
