ଓ୍ବାଶିଂଟନ୍: ଯୁବପିଢ଼ି ଓ ବୟସ୍କ ବର୍ଗଙ୍କ ମଧ୍ୟରେ ଟାଟୁ କରିବାର ଆଗ୍ରହ ବଢ଼ିବାରେ ଲାଗିଛି। ଖାଲି ଟୁଟୁ ନୁହେଁ ବଡି ଅଲଟରେଶନ୍ (ଶରୀରରେ କୃତ୍ରିମ ପରିବର୍ତ୍ତନ କରିବା)ର ଚାହିଦା ବି ବଢ଼ିଛି। ସୁନ୍ଦର ଦେଖାଯିବା ଲାଗି ଅନେକ ଟାଟୁ କରୁଥିବାବେଳେ କିଛି ଲୋକ ସ୍ମୃତିକୁ ସାଇତି ରଖିବା ପାଇଁ ଏହା କରୁଛନ୍ତି। ଆର୍ଜେଣ୍ଟିନାର ଏକ ଦମ୍ପତି ଏବେ ଟାଟୁ ଓ ବଡି ଅଲଟରେଶନ୍ କରି ଗିନିଜ ରେକର୍ଡରେ ନିଜ ନାଁକୁ ସାମିଲ କରିଛନ୍ତି। ଗାବ୍ରିିଲା ଏବଂ ଭିକ୍ଟୋର ହ୍ୟୁଗୋ ପେରାଲଟା ନିଜ ଦେହରେ ୯୮ ଟାଟୁ ସାଙ୍ଗକୁ ବଡି ଅଲଟରେଶନ କରି ଏହି ରେକର୍ଡର ଅଧିକାରୀ ହୋଇଛନ୍ତି। ୨୦୧୪ରେ ଏହି ଦମ୍ପତି ୮୪ଟି ଟାଟୁ କରି ଗିନିଜ୍ ଓ୍ବାଲର୍ଡ ରେକର୍ଡ କରିଥିଲେ। ଉଭୟେ ନିଜ ଦେହରେ ୫୦ କାନଫୁଲ, ୮ ମଇକ୍ରୋଡର୍ମାଲ, ୧୪ ବଡି ଇମପ୍ଲାଣ୍ଟ, ୫ ଡେଣ୍ଟାଲ ଇମପ୍ଲାଣ୍ଟ, ୪ ଇଅର ଏକ୍ସପାଣ୍ଡର, ଏକ ଫର୍କଡ ଟଙ୍ଗ ଏବଂ ୨ଟି ଇଅର ବୋଲ୍ଡ ଲଗାଇଛନ୍ତି।
୨୪ ବର୍ଷ ପୂର୍ବେ ଗାବ୍ରିିଲା ଓ ଭିକ୍ଟୋର ଏକ ମୋଟର ସାଇକେଲ ଇଭେଣ୍ଟରେ ପ୍ରଥମ ଥର ଭେଟ ହୋଇଥିଲେ। ଏହି କାର୍ଯ୍ୟକ୍ରମ ଆର୍ଜେଣ୍ଟିନାର ବୁଇନୋସ ଏରିସ୍ରେ ଆୟୋଜିତ ହୋଇଥିଲା। ସେମାନଙ୍କ ମଧ୍ୟରେ ଗଢ଼ିଉଠିଥିବା ବନ୍ଧୁତା ପରେ ପ୍ରେମର ରୂପ ନେଇଥିଲା। ବଡି ଅଲଟରେଶନ୍ ଓ ଟାଟୁ ପ୍ରତି ଉଭୟଙ୍କ ଦୁର୍ବଳତା ଥିବା ଜଣାପଡ଼ିବା ପରେ ଦୁହେଁ ବାକି ଜୀବନ ଏକାଠି ବିତାଇବାର ନିଷ୍ପତ୍ତି ନେଇଥିଲେ।
