କଣ୍ଟାବାଞ୍ଜି,୫ା୧(ଗୁରୁଦୟାଲ ହଂସ): ରବିବାର ଅପରାହ୍ନରେ ବୁଢ଼ୀବାହାଲ ଗାଁ ନିକଟରେ ଏକ କାର୍ ବାଇକକୁ ମୁହାଁମୁହିଁ ଧକ୍କା ଦେଇଥିଲା। ଏଥିରେ ଘଟଣାସ୍ଥଳରେ ବାଇକ୍ଚାଳକଙ୍କର ମୃତ୍ୟୁ ଘଟିଛି। ମୃତ ଯୁବକ ଜଣକ ତୁରେକେଲା ଥାନା ବୁଢ଼ୀବାହାଲ ଗାଁର ତ୍ରିଲୋଚନ ମାଝୀ (୩୨) ବୋଲି ଜଣାପଡ଼ିଛି। ଲାଠୋରରୁ ବଜାର କରି ନିଜ ଗାଁକୁ ବାଇକ୍ ଯୋଗେ ଫେରୁଥିବା ବେଳେ ତୁରେକେଲା ପଟୁ ଯାଉଥିବା ଏକ କାର୍ ତାଙ୍କୁ ମୁହାଁମୁହିଁ ଧକ୍କା ଦେଇଥିଲା। ଏଥିରେ ଯୁବକଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। ଦୁର୍ଘଟଣା ଘଟାଇଥିବା କାର୍ରେ ଜଣେ ଆଇନଜୀବୀ ଥିଲେ ବୋଲି କୁହାଯାଇଛି। ଉକ୍ତ କାର୍ର ଡ୍ରାଇଭରକୁ ଗାଁ ଲୋକେ ତୁରେକେଲା ଜଙ୍ଗଲରୁ ଉଦ୍ଧାର କରି ପୋଲିସ ଜିମା ଦେଇଥିବା ଜଣାଯାଇଛି। ତୁରେକେଲା ଥାନା ଅଧିକାରୀ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି କଣ୍ଟାବାଞ୍ଜି ଡାକ୍ତରଖାନାକୁ ବ୍ୟବଚ୍ଛେଦ ପାଇଁ ପଠାଇଥିଲେ।ଏ ସଂକ୍ରାନ୍ତରେ ତୁରେକେଲା ପୋଲିସ ଏକ ମାମଲା ରୁଜୁ କରି ଅଧିକ ତଦନ୍ତ ଚଳାଇଛି।
