ପୁରୀ ଅଫିସ,୧୦ା୩: ଲକ୍ଷ୍ମୀ ମାର୍କେଟ କମ୍ପ୍ଲେକ୍ସରେ ଦୋକାନ କରି ପେଟ ପୋଷୁଥିବା ବ୍ୟବସାୟୀମାନେ ଏବେ ମୁଣ୍ଡରେ ହାତ ଦେଇ ବସିଛନ୍ତି। ଅଗ୍ନିକାଣ୍ଡ ଯୋଗୁ ସେମାନଙ୍କର ସମସ୍ତ ଜିନିଷପତ୍ର ପୋଡ଼ି ନଷ୍ଟ ହୋଇଯାଇଛି। ଅନେକ ଦେକାନୀ ଧାରକରଜ ଆଣି ଦୋକାନ କରିଥିଲେ। ଏବେ ଦୋକାନ ଜଳିଯିବା ପରେ କିପରି ଧାରକରଜ ଶୁଝିବେ ଓ ପରିବାର ଭରଣପୋଷଣ କରିବେ ସେହି ଚିନ୍ତା ସେମାନଙ୍କୁ ଘାରିଛି। ଏହି କମ୍ପ୍ଲେକ୍ସ ପରିସରରେ ଦୋକାନ କରିଥିବା ବିପିନ ପୃଷ୍ଟି କହିଛନ୍ତି, କ୍ରିଷ୍ଣା ଗାର୍ମେଣ୍ଟ ନାମରେ ତାଙ୍କର ଏକ ଡ୍ରେସ୍ ଦୋକାନ ରହିଥିଲା। ସେ ପ୍ରାୟ ୫ ବର୍ଷ ହେବ ଏଠାରେ ଦୋକାନ କରି ପରିବାର ପ୍ରତିପୋଷଣ କରୁଥିଲେ। ନିଆଁ ଲାଗିବା ଫଳରେ ତାଙ୍କର ପ୍ରାୟ ୩ ଲକ୍ଷ ଟଙ୍କାର ଡ୍ରେସ ନଷ୍ଟ ହୋଇଛି। ସେ ଏବେ କ’ଣ କରିବେ ସେ ନେଇ ଚିନ୍ତାରେ ପଡ଼ିଛନ୍ତି। ସେହିପରି ବିଶ୍ୱନାଥ ଶର୍ମା କହିଛନ୍ତି, ସେ ପ୍ରାୟ ୨୨ବର୍ଷ ହେବ ଏଠାରେ ମା’ ଦୁର୍ଗା ଡ୍ରେସ୍ ନାମକ ଦୋକାନ କରିଥିଲେ। ସେଥିରେ ଥିବା ସମସ୍ତ ଜିନିଷ ପୋଡ଼ିଯାଇଛି। ପ୍ରାୟ ୭ଲକ୍ଷ ଟଙ୍କାର ଜିନିଷ ରଖିଥିଲେ ବୋଲି ସେ ପ୍ରକାଶ କରିଛନ୍ତି। ସାଇ ଲେଡିଜ୍ କର୍ନର ନାମରେ ଦୋକାନ କରିଥିବା ବି. ଶ୍ରୀକାନ୍ତ କହିଛନ୍ତି, ସେ ଦୀର୍ଘବର୍ଷ ହେବ ଦୋକାନ କଲେଣି। ଏଭଳି ଘଟଣା ଆଗରୁ କେବେ ହୋଇ ନ ଥିଲା। ନିଆଁ ଲାଗିବା ଫଳରେ ପ୍ରାୟ ୧୫ରୁ ୧୭ଲକ୍ଷ ଟଙ୍କାର ଜିନିଷ ତାଙ୍କର କ୍ଷତି ହୋଇଛି। ପ୍ରଶାସନ ପକ୍ଷରୁ ସେମାନଙ୍କୁ ସହାୟତା ଯୋଗାଇ ଦିଆଯାଉ। ସେହିପରି ପୂଜା ଗାର୍ମେଣ୍ଟ ନାମରେ ଡ୍ରେସ ଦୋକାନ କରିଥିବା ରବିନ୍ଦ୍ର କୁମାର ପୃଷ୍ଟି କହିଛନ୍ତି, ତାଙ୍କର ୩୦ରୁ ୩୫ ଲକ୍ଷ ଟଙ୍କାର ଜିନିଷ ନିଆଁରେ ପୋଡ଼ିି ପାଉଁଶ ହୋଇଯାଇଛି। ସେ ପରିବାର କିପରି ଭରଣପୋଷଣ କରିବେ କିଛି ବୁଝିପାରୁନାହାନ୍ତି। ନିଜ ଆଖିଆଗରେ ତାଙ୍କର ସବୁ ଜିନିଷପତ୍ର ପୋଡ଼ି ଯାଉଥିଲେ ମଧ୍ୟ ସେ ଦେଖିବା ଛଡ଼ା ଅନ୍ୟ କିଛି ଉପାୟ ନାହିଁ।
