ରସୁଲପୁର,୨୪।୯(ରଞ୍ଜିତ ରାଉତ): ଝଡ଼ବର୍ଷା ଯୋଗୁ ରସୁଲପୁର ବ୍ଲକ ନରସିଂହପୁର ପଞ୍ଚାୟତ ହରିପୁର ବଜାର ଦେଇ ଯାଇଥିବା ୨୦ନଂ. ଜାତୀୟ ରାଜପଥର ମା’ଝାଡ଼ଖଣ୍ଡି ଠାକୁରାଣୀଙ୍କ ନିକଟରେ ଶନିବାର ରାତି ପ୍ରାୟ ସାଢ଼େ ୭ଟାରେ ଏକ ଆମ୍ବଗଛ ଡାଳ ଭାଙ୍ଗି ପଡ଼ିଛି। ଏଥିଯୋଗୁ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଥିଲା। ରସୁଲପୁର ଦମକଳ ବାହିନୀ, କୁଆଖିଆ ପୋଲିସର ମିଳିତ ସହାୟତାରେ ରାସ୍ତାରୁ ଗଛ ଡାଳ ହଟାଯିବା ପରେ ଯାତାୟାତ ସ୍ବାଭାବିକ ହୋଇଛି। ତେବେ ଗଛ ଡାଳ ପଡି ଯିବାରୁ ଏହି ବାଟ ଦେଇ ୧ଘଣ୍ଟାରୁ ଊର୍ଦ୍ଧ୍ୱ ଭାରିଯାନ, ହାଲୁକା ଯାନ, ଯାତ୍ରୀବାହୀ ବସ୍ ଓ ବାଇକ୍ ଚଳାଚଳ ହୋଇ ପାରି ନ ଥିଲା। ରାସ୍ତା ଉପରେ ଶତାଧିକ ଗାଡ଼ିମୋଟର ଠିଆ ହୋଇ ରହିଥିଲା।
ସନ୍ଧ୍ୟାରେ ହଠାତ୍ କଳାହାଣ୍ଡିଆ ମେଘ ଘୋଟି ଆସିବା ସହ ଜୋରରେ ପବନ ବହିବାରୁ ରାସ୍ତା ପାର୍ଶ୍ୱରେ ଥିବା ଏକ ଗଛ ଡାଳ ରାସ୍ତା ଉପରେ ଭାଙ୍ଗି ପଡିଥିଲା। ଗଛ ଡାଳଟି ରାସ୍ତାର ଉଭୟ ପାର୍ଶ୍ୱକୁ ଅତିକ୍ରମ କରୁଥିବାରୁ ଏହି ବାଟ ଦେଇ ଯାନବାହାନ ଚଳାଚଳ ଠପ୍ ହୋଇଯାଇଥିଲା। ଏ ସମ୍ପର୍କରେ ବଜାରର ବ୍ୟବସାୟୀମାନେ ପୋଲିସକୁ ଖବର ଦେଇଥିଲେ। ଉକ୍ତ ଖବର ମୁତାବକ ଥାନା ଅଧିକାରୀ ଶ୍ରୀକାନ୍ତ କୁମାର ବାରିକ ପୋଲିସ ପାଟ୍ରୋଲିଂ ଭ୍ୟାନ ସହ ଅଧିକାରୀ ନରେନ ଦାସଙ୍କୁ ଘଟଣାସ୍ଥଳକୁ ପଠାଇଥିଲେ। ଏଥି ସହ ପୋଲିସ ପକ୍ଷରୁ ରସୁଲପୁର ଦମକଳ କେନ୍ଦ୍ରକୁ ଅବଗତ କରାଯାଇଥିଲା। ଥାନା ଅଧିକାରୀ ଓ ସ୍ଥାନୀୟ ଅଞ୍ଚଳର ଲୋକଙ୍କଠାରୁ ଖବର ପାଇ ଦମକଳ କେନ୍ଦ୍ରର କର୍ମଚାରୀ ଓ ପୋଲିସର ଏକ ଟିମ୍ ପହଞ୍ଚତ୍ ଗଛ ଡାଳ କାଟି ରାସ୍ତା ସଫା କରିଥିଲେ।
