କେନ୍ଦ୍ରପଡ଼ା,୭ା୭(ଜଗନ୍ନାଥ ଧଳ): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଅଞ୍ଚଳରେ ପୂଜାପାଠ କରୁଥିବା ବ୍ରାହ୍ମଣ ବରକୁ କନ୍ୟା ମିଳୁନାହାନ୍ତି। ଏଥିଯୋଗୁ ବ୍ରାହ୍ମଣ ପୁଅ ଏବେ ଯଜମାନୀ ଛାଡ଼ି ବିଦେଶରେ ଚାକିରି କରିବାକୁ ବାହାରିଲେଣି। ବ୍ରାହ୍ମଣ ଜାତିର ଝିଅ ମିଳୁ ନ ଥିବାରୁ ଏବେ ସେମାନେ ଚିନ୍ତାରେ ପଡ଼ିଛନ୍ତି। ଯଦି ଯଜମାନୀ କାମ ପାଇଁ ବ୍ରାହ୍ମଣ ନ ମିଳନ୍ତି, ତାହାଲେ ସଭ୍ୟତା ଧୀରେ ଧୀରେ ଲୋପ ପାଇଯିବ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।
ବୁଦ୍ଧିଜୀବୀ ତଥା ଶିକ୍ଷାବିତ୍ ପ୍ରଫୁଲ୍ଲ ଦାଶ କୁହନ୍ତି, ବ୍ରାହ୍ମଣ ଜାତିର ଉତ୍ପତ୍ତି ବୈଦିକ ଯୁଗରୁ ହୋଇଛି। ବେଦରୁ ପ୍ରମାଣମିଳେ ଯେ, ଗୁଣ, କର୍ମ ଓ ବିଭାଗ ଅନୁସାରେ ବ୍ରାହ୍ମଣାଦି ଜାତିର ଉତ୍ପତ୍ତି ହୋଇଥିଲା। କାଳକ୍ରମେ ସେହି ଜାତି ବିଭାଗ ବଂଶାନୁକ୍ରମରେ ଚାଲିଲା। ପରେ ବ୍ରାହ୍ମଣଙ୍କ ପୁତ୍ର ହିଁ ବ୍ରାହ୍ମଣ ବୋଲି ପରିଚିତ ହେଲେ। ପ୍ରତ୍ୟେକ ବ୍ରାହ୍ମଣ ପରିବାର କୌଣସି ଗୋଟିଏ ବୈଦିକ ଶାଖାର କଳ୍ପସୂତ୍ରକୁ ଅବଲମ୍ବନ କରି ନିଜର ଷୋଡ଼ଶ ସଂସ୍କାର, ପୂଜାପର୍ବ, ଗାୟତ୍ରୀ ଉପାସନା, ପଇତା, ଶ୍ରାଦ୍ଧ ଆଦି କରିଥା’ନ୍ତି। ଯଦି ଯଜମାନୀ କରିବାକୁ ବ୍ରାହ୍ମଣ ନ ମିଳନ୍ତି, ତାହା ହେଲେ ଆମ ସଂସ୍କୃତି, ସଭ୍ୟତା ଲୋପ ପାଇଯିବା ସଙ୍ଗେ ସଙ୍ଗେ ହିନ୍ଦୁଧର୍ମ ପ୍ରତି ମଧ୍ୟ ବିପଦ ମାଡ଼ିଆସିବ। ପ୍ରଶାନ୍ତ ପଣ୍ଡା କହିଛନ୍ତି, ଗଁାରେ ଥିବା ମନ୍ଦିରଗୁଡ଼ିକୁ କେନ୍ଦ୍ର କରି ପାର୍ଶ୍ୱବର୍ତ୍ତୀ ବ୍ରାହ୍ମଣ ଯୁବକମାନଙ୍କୁ ଅଭିଜ୍ଞ ବ୍ରାହ୍ମଣମାନଙ୍କ ଦ୍ୱାରା ବେଦ, ଗୀତା ଓ ଯଜମାନ କର୍ମ ଇତ୍ୟାଦି ଶିକ୍ଷା ଦିଆଯିବା ଦରକାର। ଏଥିସହ ସଂସ୍କୃତ ବିଦ୍ୟାଳୟକୁ ପୁନଃ କାର୍ଯ୍ୟକ୍ଷମ କରାଯାଉ। ଏହାସହ ସରକାର ବ୍ରାହ୍ମଣ ଯୁବକମାନଙ୍କୁ ଏକ ନିର୍ଦ୍ଦିଷ୍ଟ ଭତ୍ତା ପାଇଁ ଯୋଜନା ପ୍ରସ୍ତୁତ କରନ୍ତୁ। ତେବେ ବ୍ରାହ୍ମଣ ଯୁବକମାନେ ନିଜର କୌଳିକ ବୃତ୍ତିରେ ଲିପ୍ତ ରହିବା ସହ ରୋଜଗାରକ୍ଷମ ହେବେ ଏବଂ ସେମାନଙ୍କୁ ବିବାହ କରିବାକୁ ଝିଅ ମିଳିବେ। ଦିଲୀପ ଦାଶ କହିଛନ୍ତି, ସମାଜରେ ସମସ୍ତ ମାତାପିତା ଚାହାନ୍ତି ନିଜର ପିଲାଙ୍କୁ ଭଲରେ ରଖିବାକୁ। ସେଥିପାଇଁ ବ୍ୟୟବହୁଳ ଦୁନିଆରେ ନିଜର ଆର୍ଥତ୍କ ସୁରକ୍ଷା ପ୍ରତି ଦୃଷ୍ଟି ଦେଇଥା’ନ୍ତି। ଏହାକୁ ନେଇ ଝିଅଙ୍କ ପିତା ଆର୍ଥତ୍କ ସ୍ତରରେ ସ୍ବାବଲମ୍ବୀ ଥିବା ଅର୍ଥାତ୍ ଚାକିରି କରିଥିବା ଜ୍ୱାଇଁ ଖୋଜି ବିବାହ କରିବାକୁ ନିଷ୍ପତ୍ତି ନେଉଛନ୍ତି। ମାତ୍ର କୌଳିକ ବୃତ୍ତି କରୁଥିବା ବ୍ରାହ୍ମଣ ପୁଅ ପ୍ରତି ଅମଙ୍ଗ ନୀତି ଆପଣାଉଛନ୍ତି। ଏହାକୁ ନଜରକୁ ରଖି ବ୍ରାହ୍ମଣ ଯୁବକମାନେ ନିଜର କୌଳିକ ବୃତ୍ତି ଛାଡ଼ି ବିଦେଶ ଯିବାକୁ ପଟ୍ଟାମୁଣ୍ଡାଇ ଅଞ୍ଚଳରେ ଅଣ୍ଟା ଭିଡ଼ିଛନ୍ତି। ଏ ନେଇ ଅନନ୍ତ କୁମାର ଦାଶ, ପ୍ରତାପ କୁମାର ପାଢୀ, ସଞ୍ଜୟ ପଣ୍ଡା, ପ୍ରେମାନନ୍ଦ ଦାଶ, ବ୍ରହ୍ମାନନ୍ଦ ଦାଶ, ଭବନୀ ଶଙ୍କର ପଣ୍ଡା ପ୍ରମୁଖ କହିଛନ୍ତି, ଯଦି ସରକାର ବ୍ରାହ୍ମଣ ବୃତ୍ତି ଆପଣାଇଥିବା ଯୁବକମାନଙ୍କ ପାଇଁ ଭତ୍ତା ଯୋଜନା କରି ସେମାନଙ୍କୁ ସାମିଲ କରି ଆର୍ଥତ୍କ ସ୍ବାବଲମ୍ବୀ କରନ୍ତେ, ତେବେ ଆମ ସଂସ୍କୃତି, ସଭ୍ୟତା ପ୍ରତି ଆସୁଥିବା ବିପଦକୁ ଏଡ଼ାଇ ଦିଆଯାଇପାରନ୍ତା। ଅନ୍ୟପକ୍ଷେ ବ୍ରାହ୍ମଣ କନ୍ୟାପିତାମାନେ ସେମାନଙ୍କ ଝିଅକୁ ବ୍ରାହ୍ମଣ ବୃତ୍ତି କରୁଥିବା ପୁଅ ସହ ବିବାହ ଦେବାକୁ ଆଉ କୁଣ୍ଠାବୋଧ କରିବେ ନାହିଁ।
