ଅହମଦାବାଦ,୫।୧୧ : ଗୁଜୁରାଟରେ ବିଧାନସଭା ନିର୍ବାଚନ ପୂର୍ବରୁ ଭାଜପା ଏକ ବଡ଼ ଝଟ୍କା ଲାଗିଛି। ରାଜ୍ୟର ପୂର୍ବତନ ସ୍ବାସ୍ଥ୍ୟମନ୍ତ୍ରୀ ତଥା ବରିଷ୍ଠ ନେତା ଜୟନାରାୟଣ ବ୍ୟାସ ଶେଷରେ ଭାଜପା ଛାଡିଛନ୍ତି। ଜୟ ନାରାୟଣ ଭାଜପାର ପ୍ରାଥମିକ ସଦସ୍ୟତାରୁ ଇସ୍ତଫା ଦେଇଛନ୍ତି। ସେ ସିଦ୍ଧପୁର ଆସନରୁ ପ୍ରତିଦ୍ୱନ୍ଦ୍ୱିତା କରିବାକୁ ଚାହୁଁଥିଲେ।
ନିକଟରେ ସେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କୁ ଭେଟିଥିଲେ। ଗେହଲଟ କଂଗ୍ରେସ ପକ୍ଷରୁ ଗୁଜରାଟର ସ୍ବତନ୍ତ୍ର ନିର୍ବାଚନ ଅଧିକାରୀ ଭାବେ ନିଯୁକ୍ତ ହୋଇଛନ୍ତିି। ସେବେଠାରୁ ଜୟ ନାରାୟଣ କଂଗ୍ରେସରେ ଯୋଗ ଦେଇପାରନ୍ତି ବୋଲି ଅନୁମାନ କରାଯାଉଥିଲା।
ଗଣମାଧ୍ୟମ ସହ କଥାବାର୍ତ୍ତା କରି ସେ କହିଛନ୍ତି ଯେ ଦଳରେ ଭିନ୍ନ ଭିନ୍ନ ଗୋଷ୍ଠୀ ଗଠନ ହେବା କାରଣରୁ ଗୁଜରାଟରେ ଭଜପାର ଅବସ୍ଥା ବିଗିଡି ଯାଇଛି।
ସଂଗଠନ ଭାଙ୍ଗିବା ପାଇଁ ଗୁଜରାଟ ଭାଜପା ଅଧ୍ୟକ୍ଷ ସିଆର୍ ପାଟିଲଙ୍କ ବିରୋଧରେ ସେ ଅଭିଯୋଗ ଆଣିଛନ୍ତି। ପାଟିଲ ସର୍ବଦା ଗୋଷ୍ଠୀବାଦ ସହ ଜଡିତ। ସଂଗଠନର କାମ ହେଉଛି ଏକଜୁଟ ହେବା। କିନ୍ତୁ ଏହାର ଉଲ୍ଲଂଘନ ସେମାନେ କରୁଛନ୍ତି।
ସେ ଦଳ ଛାଡିବା ପରେ ପାଟିଲ କହିଛନ୍ତି ଯେ ସେ ୩୨ ବର୍ଷ ଧରି ଭାଜପା ସହଥିଲେ। ଗତ ୧୦ ବର୍ଷରେ ଜୟ ନାରାୟଣ ଦୁଇଥର ନିର୍ବାଚନରେ ହାରିଛନ୍ତି। ତଥାପି ଭାଜପା ତାଙ୍କୁ ଟିକେଟ ଦେଇଥିଲା। ଏଥର ଦଳ ୭୫ ବର୍ଷରୁ ଅଧିକ ବୟସ୍କ ପ୍ରାର୍ଥୀଙ୍କୁ ଟିକେଟ ନ ଦେବାକୁ ନିଷ୍ପତ୍ତି ନେଇଛି। ତାଙ୍କ ଇସ୍ତଫା ପାଇଁ ଏହା ଏକ କାରଣ ହୋଇପାରେ ।
