ପିପିଲି,୨୧ା୫(ଡି.ଏନ୍.ଏ./ସ୍ବ.ପ୍ର.): ପିପିଲି ଏନ୍ଏସି ଅନ୍ତର୍ଗତ ୧୧ନଂ. ୱାର୍ଡର ଏକ ପରିବାର ବହୁ ଦୁର୍ଦ୍ଦିନରେ ଜୀବନ ଅତିବାହିତ କରୁଥିବାବେଳେ ମା’ ଓ ମାନସିକଗ୍ରସ୍ତ ବାପାଙ୍କ ପାଇଁ ଆଶାବାଡ଼ି ସାଜିଛନ୍ତି ୬ ବର୍ଷୀୟ ସାଇ ଶୁଭମ। ଏହି ଖବର ବିଭିନ୍ନ ଗଣମାଧ୍ୟମରେ ପ୍ରସାରଣ ପରେ ଶନିବାର ତାଙ୍କୁ ପିପିଲି ଏନ୍ଏସି ଅଧ୍ୟକ୍ଷ ସେକ ବାବୁ ଓ ତାଙ୍କ ସହଯୋଗୀ ସହଯୋଗର ହାତ ବଢାଇଛନ୍ତି।
ଅଧ୍ୟକ୍ଷ ସେକ ବାବୁ ଓ ତାଙ୍କ ସହଯୋଗୀ ମଧ୍ୟାହ୍ନରେ ସାଇ ଶୁଭମ୍ ଓ ତାଙ୍କ ମା’ଙ୍କ ପାଇଁ କିଛି ନୂଆ ବସ୍ତ୍ର କିଣିବା ସହ କର୍ମୀଙ୍କ ସହ ତାଙ୍କ ଘରେ ପହଞ୍ଚି କିଛି ଆର୍ଥିକ ସହାୟତା ପ୍ରଦାନ କରିଛନ୍ତି। ଆଗାମୀ ଦିନରେ ସରକାରୀସ୍ତରରେ ବିଭିନ୍ନ ସହାୟତା ପ୍ରଦାନ ସହ ସାଇ ଶୁଭମ୍ଙ୍କ ସମସ୍ତ ପାଠପଢା ଖର୍ଚ୍ଚ ନିଜେ ବହନ କରିବେ ବୋଲି ଅଧ୍ୟକ୍ଷ ପ୍ରତିଶ୍ରୁତି ଦେଇଛନ୍ତି। ତାଙ୍କ ସହ ଅଞ୍ଚଳର କାଉନସିଲର ଏବଂ ସାମାଜିକ କର୍ମୀ ମଧ୍ୟ ସହଯୋଗର ହାତ ବଢାଇଛନ୍ତି। ଗଣମାଧ୍ୟମ ଏଭଳି ଘଟଣାକୁ ଲୋକଲୋଚନକୁ ଆଣିଥିବାରୁ ସେ ସମସ୍ତଙ୍କୁ ଧନ୍ୟବାଦ ଦେଇଛନ୍ତି। ଏହାପରେ ପିପିଲି ଟାଏକୋଣ୍ଡୋ ଏକାଡେମୀ ପକ୍ଷରୁ ସାଇ ଶୁଭମଙ୍କୁ ଆର୍ଥିକ ସହାୟତା ପ୍ରଦାନ କରାଯାଇଛି। ଅନୁଷ୍ଠାନର ପ୍ରଶିକ୍ଷକ ନୃସିଂହ ସିଂ ଓ ଛାତ୍ରୀଛାତ୍ର ସାଇ ଶୁଭମଙ୍କ ଘରେ ପହଞ୍ଚି ତାଙ୍କୁ ଆର୍ଥିକ ସହାୟତା ପ୍ରଦାନ କରିଛନ୍ତି। ଏନେଇ ସାଇ ଓ ତାଙ୍କ ମା’ ଊର୍ମିଳା ସେଠୀ ସମସ୍ତ ଗଣମାଧ୍ୟମକୁ ଧନ୍ୟବାଦ ଜଣାଇଛନ୍ତି। ସୂଚନାଥାଉକି, ଗତ ୧୮ ତାରିଖରେ ପିପିଲି ଏନ୍ଏସି ୧୧ନଂ. ୱାର୍ଡ ପୁରୀ-ଭୁବନେଶ୍ୱର ମୁଖ୍ୟ ରାସ୍ତାକଡ଼ରେ ଗୋଟେ ୬ବର୍ଷୀୟ ସାଇ ଶୁଭମ ତାଙ୍କ ବାପାଙ୍କ ଛୋଟ ଦୋକାନକୁ ଜଗି ବସି ସେଠାରେ ପାଠ ପଢୁଥିବାର ଦୃଶ୍ୟ ସମସ୍ତଙ୍କୁ ଆଚମ୍ବିତ କରିଥିଲା। ତାଙ୍କୁ ପଚାରିବାରେ, ଦୋକାନରେ ବସି ବାପାଙ୍କୁ ସାହାଯ୍ୟ କରିବା ସହ ଆଗକୁ ବହୁତ ପାଠ ପଢି ସରକାରୀ ଚାକିରି କରିବେ ବୋଲି କହିଥିଲେ।
